¹ Na odin mi a lɛkɔ yi mɛxo we okplan ji a bo jo bibɛnu we okplan do Klisi gɔo do,okplan nɛ lɛye we do lili wɛ mi ɖo na gɔ ɖo;ye wɛ nyi okɔ lilɛ le nuwiwa xeni mɔ nɔ dɔn mɛ do yi nukɔn gɛ lɛye gon,yise ɖiɖo do Mawu ji, ² Mawu we osin lilɛye we okplan kpodo alɔ ɖo ta na mɛ,omɛ kukulɛye we fifɔn sɔn ku kpodo kojoɖiɖo mavɔ-mavɔ. ³ Na e jlo Mawu,onu xena mi na blo lɛye nɛ. ⁴ Omɛ ni nɔ weziza kpɔn mɛ lɛye,bo ɖɔ nunina sɛxwetomɛ tɔn kpɔn lɛye,omɛ xeni yi gbigbɔ ɖeɖovo tɔn kpɔn lɛye, ⁵ ye bo ɖɔ Mawu we oxo ɖagbwɛ lɔ kpɔn,bo ɖɔ ogbɛ xeni ja we hɔnhlɔn lɛye kpɔn, ⁶ co bo wa ja nyi le yise mɛ lɛye,mɛ ti ma gɔ kpego na lɛkɔ na ye wa wɛ ye na gɔ do wa lɛ vɔ jɔ gɛ.Ɖo ye gɔ yi ka Mawu we ovi lɔ do atinsoga ji bu,bo do ŋunya wi le gbaŋugba. ⁷ Na anyizan ɖe nu jokun ni nɔ ja de ji le hɔnlokpo-hɔnlokpo we osin bo na atinkun sisyɛn ɖagbwɛ-ɖagbwɛ omɛ ni nɔ lɛ anyizan nɛ lɔ lɛye,Mawu nɔ do na anyizan nɛ lɔ; ⁸ amɔ na e nyi ɖɔ oŋu ja lɛye kpodo ogbe nyinyla lɛye wɛ nɔ wu de ji,be e ma nyi onu ti gɛ,Mawu na do nu wiwɛ ye na do-e zo le vivɔnu. ⁹ Anɛyevi vɛna-vɛna lɛye,mi le ɖɔ lemɔha co mi kan de ji ɖɔ mye bo le omɔ ɖagbwɛ lɔ ji,e wɛ nyi hwlɛngan we omɔ lɔ. ¹⁰ Le oxojɔxo mɛ,Mawu ma nyi afutamɛtɔ bo na do wɔn ozɔn mitɔn lɛye gɛ.Wanyiyi xena mi ɖo ni bo do kpedo yisenɔ lɛye go,bo gɔ kpo le kpedo ye go kaka wa jɛ din,e ma le wɔn xɔn gɛ. ¹¹ Amɔ mi jlo na lokpo-lokpo mitɔn a ɖo akpakpa lokpo nukunmɛ lɛye kaka do yi vivɔnu,e nɛ onu xena mi ɖo nukun te na na do wa cicɛmɛ sese, ¹² wɛ mi ma do wa le tlɔzun aɖiɖɔnɔ lɛye gɛ,vɔ mi na sɔ afɔ do afɔ do mɛ na omɛ xeni ɖo yise bo kuhun kaka bo yi onu xe we kpagbe na Mawu do na ye. ¹³ Hwenu na Mawu do akpagbe na Ablaxamu,Mawu lɔ xwle eɖe ni-i;ɖo omɛ xena e na xwle ti ma le bo xugan-ɛ gɛ, ¹⁴ Mawu bo ɖɔ ni ɖɔ:Le oxojɔxo mɛ,na kɔn do na do ji we jan wɛ,na na we jijimɛvi susu gbagbagba. ¹⁵ E wɛ,xena Ablaxamu nɔte kpodo hun kunkun kpo,e yi nu xe we kpagbe na Mawu do ni-i. ¹⁶ Gbɛtɔ lɛye nɔ xwle omɛ xeni xugan ye tesu lɛye na onu didɔn ɖe ni nɔ kpɔn gɔ do nɔ anyi gɛ,ye nɔ xwle nu a bo do do kpɛn oxo xena ye ɖɔ ji. ¹⁷ E wɛzɔn,xena Mawu jlo na ɖe xlɛ ceɖe-ceɖe,omɛ xeni na yi nu xe we kpagbe na e do lɔ,ɖɔ onu ɖe bo mɔ nɔ susu gbeta myetɔn lɛye gɛ,e xwle nu, ¹⁸ onu awe xena onu ti mɔ nɔ susu gɛ,xe mɛ na Mawu ma kpego na ɖo awo le gbeɖe gɛ le do akpakpa ɖaxo ɖe lanmɛ na mi mɛ xeni jo onu sese do bo tɛ do nukun ɖiɖo xena ye sɔ ɖo nukun mɛ na mi lɔ go. ¹⁹ Nukunɖiɖo nɛ lɔ le ɖi ogan kpinkpɛn xeji na okla mitɔn le ha,e bo syɛnxu,nukunɖiɖo lɔ byɛ Mawu we xwegbe kaka bo byɛ tɛnmɛ mimɛ lɔ we xɔmɛ gbovɔ lɔ godo, ²⁰ flɛn lɔ wɛ Jesu byɛ jɛ nukɔn na mi,ɖo e tlɔ zun avɔsantɔ lɛye we oga kaka do yi mavɔ-mavɔ ɖi ɖena Mɛlicisedɛki tɔn nyi ɖo ha.