¹ Le oxojɔxo mɛ,vɔsantɔ lɛye we oga ɖekpokpwe,gbɛtɔ lɛye mɛ wɛ ye nɔ sɔ-ɛ le,a bo ze-e sɔ ɖa nyi,wɛ e na do wa wa ozɔn na Mawu do gbɛtɔ lɛye we nyɔna wutu ozɔn etɔn wɛ nyi ɖɔ e na nɔ sɔ nunina kpodo vɔsinsan sɔ na Mawu do onu nyinyla lɛye we ta mɛ. ² Vɔsantɔ ɖaxo lɔ tesu ɖo gbɔjɔ-gbɔjɔ e wɛzɔn e hɛn e ba se onu gɔnmɛ na omɛ na omɛ ni ma nyɔ nu ɖe wi gɛ,bo le bu mɔ xɔn lɛye. ³ E wɛzɔn do gbɔjɔ-gbɔjɔ etɔn lɔ wutu e ɖo na san avɔ na Mawu ɖo e yɔ tesu onu nyinyla wiwa kpodo togun lɔ we onu nyinyla wiwa lɛye kpo we tamɛ. ⁴ Sisi ni le vɔsantɔ ɖaxo nyi nyi mɛ lɔ,omɛ tesu mɔ nɔ sɔ xɔ na e ɖe gɛ,dogbɔn Mawu we oylɔ mɛ wɛ ye nɔ yi-i le ɖi ɖena e nyi do na Alɔn ha. ⁵ Lemɔha ke avɔsantɔ lɛye we oga xena Klisi lɔ wa tlɔzun,e ma sɔ gigo etɔn sɔ xɔ na e ɖe gɛ,amɔ e yi-i sɔn Mawu de,Mawu lɔ bo ɖɔ ni-i ɖɔ:"A nyi ovi ce,bɛ sɔn egbe nyɔ wɛ ji we! ⁶ Ɖena e gɔ ɖɔ do ha le fi bu ɖɔ:A nyi avɔsantɔ kaka do yi mavɔ-mavɔ ɖi ɖena Mɛlicisedɛki tɔn nyi ɖo ha. ⁷ Hwexenu na Jesu lɔ le gbɛ le gbɛ le anyizan ji,e xo oɖɛ kpodo okwe fiinfan kpo,kpodo axwa lelele,kpodo ɖasin kpo na Mawu xeni kpego na hwlɛn-ɛ gan le oku si.Mawu lɔ bo se oɖɛ etɔn do mɛ ɖe sɔ hwe etɔn wutu, ⁸ e nyi Mawu tɔn co vivɛsise xe mɛ na e gbɔn lɛye zɔn wɛ e se tonu. ⁹ Xena Mawu lɔ na wɛ e sɔgbe sese,e wa tlɔzun hwlɛngan mavɔ-mavɔ we bibɛtɛn na omɛ ni nɔ se tonu ni lɛye, ¹⁰ Mawu lɔ bo ze do ɖo avɔsantɔ lɛye we oga ɖi ɖena Mɛlicisedɛki tɔn nyi ɖo ha. ¹¹ Onu susu le wɛ mi na ɖɔ do oxo nɛ go,amɔ,e vi a wu na mi na dotin ye mɛ, ɖo mi mɔ na ɖebla nyɔ nu wi gɛ. ¹² Le oxojɔxo mɛ,mi o ɖo na nyi onu kplanmɛtɔ xoxo,co mi nɔ din na ye na kplan mi bibɛnu we onu ni le Mawu xo mɛ lɛye.Anɔsin wɛ gɔ hwe do mi,nuɖuɖu sisyɛnxu lɛye wɛ mi ka ɖo na le ɖu xɔn. ¹³ Omɛ ɖekpokpwe xeni gbɛ kpo le anɔnu ma kpego na kɛ onu do onu jijlɔ wiwa we oxo go gɛ,ɖo mɛyɛ wɛ e nyi. ¹⁴ Vɔ mɛxo lɛye wɛ nuɖuɖu sinsyɛnxu lɔ le anyi na,dogbɔn nuwiwayetɔn lɛye mɛ,mɔ nu jɛ onu nyinyla kpodo onu ɖagbwɛ kpo,e o ma do susu yetɔn lɛye.