¹ E wɛ zɔn mi ɖo na tɛ do oxo xena mi o se lɛye go taŋu, e nɛ, mi ma gɔ do le bu omɔ xɔn gɛ. ² Ɖo xena e nyi ɖɔ oxo xena owɛndotɔ Mawutɔn lɛye lɔ nyi xojɔxo, omɛ ɖekpokpwe xeni hu ohwɛ alo e ma se tonu gɛ, bo yi todidɔn xeni jɛ xɛ, ³ Neɖe wɛ mye tesu na hɛn ɖo wɛ todidɔn lɔ na do gbɔn ta na mi, na mi ɖe kɔ sɛ le hwlɛngan ɖaxo nɛ go? Aklunɔ lɔ wɛ jɛ hwlɛngan nɛ lɔ we oxo ɖɔ ji jɛ nukɔn, e nɛ godo omɛ xeni se lɛye wa do kpɛn e ji na mi. ⁴ Mawu bo ɖo kpɛn kunu ɖiɖe yetɔn lɛye ji, gbɔn josi lɛye, onu kpaca omɛ lɛye, nujiwu hamɛ-hamɛ lɛye kpodo gbigbɔ mimɛ we onu nina lɛye ɖi ɖena e ma jlo ɖo na ji gɛ. ⁵ Ɖo ogbɛ xeni jaa, Mawu ma ze xɔ ɖo owɛndotɔ etɔn lɛye we acɛ mɛ gɛ. ⁶ Vɔ omɛ ɖe ɖekunu ɖe le fi ɖe le Mawu we xo lɔ mɛ bo ɖɔ ɖɔ: Mawu gbɛtɔ nyi na Mawu na do gbwadɔ de go? Alo a ni wɛ ovi gbɛtɔ tɔn nyi na a na do kpe nukun de go?. ⁷ A ze sɔ hwe,bonze sɔ xɔ ɖo agɔ na wɛndotɔ lɛye na ganxixo ovuɖe,bo wa sɔ gigo kpodo bubu kpo xɔ cɔn ni ɖi sɔxu gbakɔn ha, ⁸ a ze onu sese xɔ ɖo acɛ etnɔ gɔ.E wɛ xena Mawu ze nu sese sɔ xɔ ɖo acɛ etɔn gɔ,onuti ma le na e gɔn sisɔ ɖo acɛ etɔn gɔ gɛ.E le lemɔha co,mi ma o mɔ onu jɛ emɛ din ɖɔ onu lɛye sese bo le acɛ etɔn gɔ gɛ. ⁹ Amɔ onu xena mi le mɔ xɔn ɖye:Jesu xena Mawu ze sɔ hwe,bo ze xɔ ɖo agɔ na wɛnɖotɔ Mawutɔn lɛye na ganxixo ovu ɖe,wɛ e na do ku do ta na gbɛtɔ lɛye gbɔn fɛnu Mawutɔn mɛ,Mawu wa ze gigo kpodo sisi xɔ cɔn ni ɖi xɔsugbakɔn na do aya xena e ɖu bo do ku lɔ utu. ¹⁰ Le xojɔxo mɛ, e yɔn ɖɔ Mawu ni blo onu sese, wɛ onu sese nyi etɔn wa na na Jesu wa sɔgbe gbɔn aya ɖuɖu mɛ, e nɛ, e na do hɛn omɛ susu gele-gele wa gigo etɔn mɛ gbɔn Jesu xeni nɔ ɖe hwlɛngan we omɔ sɔ xɔ xlɛ lɔ ji. ¹¹ Ɖo Jesu ni nɔ sɔ omɛ do blo omɛ mimɛ kpodo omɛ xena e sɔ do blo omɛ mimɛ lɛye ɖo tɔ lokpo. E wɛ zɔn ŋunya mɔ nɔ wɛ na e nɔ do ylɔ ye ɖɔ anɛyevi lɛye gɛ. ¹² E bo nɔ ɖɔ ɖɔ: Na ɖɔ xo tɔwe na anɔwevi, na nɔ kanfu we le togun lɛye mɛ. ¹³ E gɔ ɖɔ ɖɔ: Yɔn na ɖe ji do Mawu go. Yɔn bo ɖo e go: Kpɔn yɔn kpodo vikpɛ xena Mawu na lɛye. ¹⁴ Xena vikpɛ nɛ lɛye sese nyi gbɛtɔ bo ɖo gbaza kpodo ohun kpo, Jesu can trɔ zun gbɛtɔ bo ɖo gbaza kpodo ohun kpo ɖi yetɔn ha, e nɛ do gbɔn oku xena e ku mɛ, e hu acɛ na lɛgba xe si na oku we hɔnhlɔn lɔ le. ¹⁵ E bo gɔ hwlɛn omɛ xeni le ɖibu na oku lɛye kaka bo wa trɔ zun kannumɔ le ogbɛ yetɔn lɛye mɛ gan. ¹⁶ Le xojɔxo mɛ owɛndotɔ Mawutɔn lɛye go mɛ e wa kpedo gɛ, vɔ Ablaxamu we jiji mɛ vi lɛye go wɛ e wa kpedo. ¹⁷ E wɛ zɔn e ɖo na ci ɖi nɔvyɛ lɛye le omɔ ɖekpekpe nu, e nɛ e na do nyi vɔsantɔ lɛye we oga, ɖɔŋuɖunu ku na mɛtɔ kpodo gbejinɔtɔ le ozɔn xena e le blo na Mawu a bo do susu togun etɔn we onu nyinyla lɛye sɛ. ¹⁸ Ɖo xena eyɔ tesu gbɔn xwlekpɔn mɛ bo se vivɛ, e hɛn e na kpedo omɛ ni le gbɔn xwlekpɔn mɛ lɛye go.