¹ Xena Mawu gbɔn ɖɔɖanyiɖɔtɔ etɔn lɛye ji le san xoxo bo do ɖɔ xo na dagbo mitɔn lɛye hwenɛnu ɖe gbɔn alɔ kpa susu mɛ vɔ, ² Odin le azan kpotwi mɛ na mi wa le lɛye, e gbɔn ovyɛ ji bo do wa le ɖɔ xo na mi, ovi nɛ lɔ wɛ e sɔ do ɖo oguɖutɔ na onu lɛye sese, e yɔ lɔ ke ji wɛ e gbɔn bo do da ogbɛ lɔ. ³ Ovi nɛ lɔ wɛ nyi gigo Mawu tɔn we weziza, onu xena Mawu lɔ nyi pɛpɛpɛ wɛ e nyi; e bo hɛn ogbɛ lɔ do te kpodo oxo etɔn we hɔnhlɔn kpo, do onu nyinyla utu, xena e sra wu na gbɛtɔ lɛye vɔ, e wa yi flɔn anyi le aɖusi mɛ na axɔsu hɔnhlɔn lɛye sesekpo nɔ le sɛxwe. ⁴ Ovi lɔ xugan owɛndotɔ Mawu tɔn lɛye ɖo Mawu sɔ nyi xeni xugan owɛndotɔ lɛye tɔn sɔ xɔ ni. ⁵ Le xojɔxo mɛ, owɛndotɔ bɔtɔn wɛ Mawu ɖɔ na kpɔn ɖɔ: Ovi ce wɛ a nyi, bɛ sɔn egbe, yɔn wɛ ji we? Alo owɛndotɔ bɔtɔn wɛ e ɖɔ na kpɔn gbede ɖɔ: Yɔn na nyi otɔ ni, e yɔ bo na nyi ovi na-un? ⁶ Co, hwexenu na Mawu ze ovyɛ titan lɔ sɔ ɖoxlan ogbɛ lɔ mɛ e ɖɔ ɖɔ: Wɛnzangun Mawutɔn lɛye sese ni bo do nu do ni. ⁷ Xeni nyi owɛndotɔ Mawutɔn lɛye tɔn, e ɖɔ na ye ɖɔ: Mawu nɔ sɔ wɛnzangun etɔn lɛye do trɔ jɛhɔn, bo nɔ sɔ ozɔnwavi etɔn lɛye do trɔ ozoɖɛ. ⁸ Vɔ e ɖɔ do ovi lɔ go ɖɔ: O Mawu axɔluzinkpwe tɔwe le anyi tɛgbɛ xɔluɖuɖu tɔwe flɔn anyi do onu jijrɔ wiwa ji. ⁹ A anyi wan na onu jijrɔ wiwa bo gbɛ wan na onu nyinylan wiwa e wɛ zɔn, o Mawu tɔwe can we, bo kɔn onu jijrɔ mimɔ we ami do ota na we, e can we le awegɔ tɔwe lɛye mɛ. ¹⁰ E gɔ ɖɔ: Aklunɔ Mawu, yɔ wɛ ɖo anyizan sɔn bibɛnu, jinukunsin bo nyi onu xena a ze a lɔ tɔwe ɖo blo. ¹¹ Onu nɛ lɛye sese kpo wa gɔ ɖin na wa le gɛ vɔ, yɔ a na nɔ anyi tɛgbɛ. Ye na doxo sese ɖi avɔ ha, ¹² A na mlan ye ɖi ɖena ye nɔ mlan awu ɖaxo do ha, ye bo na nyi ɖiɖyɔ ɖi awu ha, vɔ yɔ, ɖena a le jan wɛ a le tɛgbɛ, ogbɛ tɔwe ka ma ɖo do gɛ. ¹³ Wɛnzangun Mawutɔn bɔtɔn wɛ Mawu ɖɔ na kpɔn ɖɔ: Flɔn anyi le aɖusi mɛ na un kaka do yi hwenu na na sɔ kɛntɔ tɔwe lɛye do blo afɔ tɔwe gɔ? ¹⁴ Owɛndotɔ Mawutɔn lɛye we gbigbɔ jan wɛ omɛ sese nyi, bo le a bo do wa zɔn na Mawu wɛɛ? Mawu lɔ nɔ sɔ ye doxlan na ye na do wa yi kpedo omɛ xeni na mɔ hwlɛngan lɛye go.