¹ E wɛ zɔn nɔvi yisenɔ lɛye, mi mɛ xena Mawu ylɔ lɛye, mi ze tamɛ bubu mitɔn sɔxɔ ɖo Jesu ji e yɔ wɛ nyi mɛsɔdoxlan kpodo avɔsantɔ lɛye we ga na yise we oxà na mi le jla xɔn lɔ. ² Mawu can-ɛ na ozɔn nɛ lɔ, e bo nɔ gbeji ni ɖi ɖena Moyizi can blo ɖo ha le Mawu lɔ we xwegbe. ³ Le xojɔxo mɛ, ɖi ɖena ye nɔ ɖo sisi na omɛ ni gba oxwe xugan oxwe le tesu ɖo ha, lemɔhake wɛ e jɛ ɖɔ afukikan Jesutɔn ni xugan Moyizi tɔn. ⁴ Le xojɔxo mɛ, oxwe ɖekpekpwe ɖo egbatɔ, omɛ xeni blo onu sese kpo wɛ ka nyi Mawu. ⁵ Xeni kan Moyizi, e nɔ gbeji le Mawu we oxwe lɔ gbe, ɖi zɔnwavi ha, bo na do wa ɖe kunu na onu xena Mawu na wa ɖɔ. ⁶ Amɔ, Klisi eyɔ, e nɔ gbeji ɖi ovi ha le Mawu we xwelɔnu.Miye wɛɍ ka nyi oxwe lɔ,na mi hɛn kandeji kpatakli kpodo nukun ɖiɖo xena mi nɔ ɖo sya lɔ gɔ. ⁷ E wɛzɔn ɖiɖena gbigbɔ ɖeɖovo ɖɔ do ha ɖɔ:Egbe na mi se ogbe Mawu tɔn, ⁸ mi nɔ kpɔn na na oji mitɔn ni syɛnxu gɛ,ɖi ɖena dagbo mitɔn lɛye blo ɖo ha, le hwenu xena ye fɔn ogu bo do Mawu kpɔn le ogbe totlomɛ, ⁹ Le flɛn lɔ,dagbo mitɔn lɛye tɛn-un kpɔn wɛ ye ka mɔ ozɔn ce lɛye na oxwe kanɖe. ¹⁰ Ewɛzɔn aɖi ɖo-un do jijimɛvi enɛ lɛye go,wɛ un le ɖɔ xɔn ɖɔ:Ayixa yetɔn lɛye nɔ bu omɔ tɛgbɛ,mɛ nɛ lɛye ye ma nukun nu jɛ onu xena un le din sɔn yede gɛ. ¹¹ Ɖo xena aɖi lɔ ɖo-un un xwle nu bo ɖɔ ɖɔ:Ye ma le byɔ gbɔjwɛ ce mɛ xɔn gɛ! ¹² Nɔvi yisenɔ lɛye,mi cɔ miɖe,mɛti ni nɔ kpɔn le mimɛ a bo ɖo oji nyinyla gɛ,a bo nɔ kpɔn onu ma ɖi tɔ gɛ,e nɛ lɔ na dɔn-ɛ sɛ le Mawu gbɛɖe lɔ go. ¹³ Vɔ na egbe we oxo xena onu winwlan mimɛ lɔ ɖɔ kpo le,mi do hɔnhlɔn lanmɛ na miɖe lɛye,ayihɔngbe-ayihɔngbe,e nɛ mɛti ma ja wa le mimɛ a bo syɛn oji,wɛ onu nyinyla na wa blɛ ɖu gɛ. ¹⁴ Le oxojɔxo mɛ na mi gbɛ le ote gliŋu,kaka do yi vivɔnu ɖi ɖena mi le sɔn do jɛ gbɔn ha,be mi nyi xwedotɔ Klisi tɔn lɛye, ¹⁵ onu winwlan mimɛ lɔ ɖɔ:Egbe na mi se ogbe Mawu tɔn,mi nɔ kpɔn na oji mitɔn lɛye ni syɛnxu gɛ ɖi ɖena ye blo bo do fɔn ogu do Mawu ji ɖo ha. ¹⁶ Vɔ,mɛ wɛ nyi omɛ xeni se ogbe Mawutɔn bo fɔn ogu de ji lɛye?E ma nyi omɛ sese xena Moyizi ɖe tɔn le Ejipu lɛye mɛ? ¹⁷ Mɛ lɛye wɛ Mawu do aɖi do le oxwe kanɖe gban mɛ?E ma nyi omɛ xeni wa onu nyinyla bo ku kplɛlɛlɛ le gbetotlo mɛ lɛye mɛ wɛ? ¹⁸ Mɛ lɛye wɛ e xwle onu bo ɖɔ na ɖɔ ye bo ma le byɔ gbɔjwɛ myetɔn mɛ gɛ?E ma nyi omɛ xeni gbɛ tonu sise lɛye gɛ mɛ? ¹⁹ Mi ma mɔ ɖɔ ye ma kpego byɔ e mɛ gɛ do onu maɖi yetɔn wutu.