¹ Mi sɔ afɔ ɖo afɔdo mɛ na Mawu ɖo ovi vɛna-vɛna etɔnye wɛ mi nyi; ² mi nɔ zan ogbɛ le owannyiyi mɛ ɖi ɖena Klisi lɔ nyi owan na mi ɖo ha.Eyɔ tesu wɛ sɔ eɖe sɔ xɔ na Mawu do ota mitɔn mɛ ɖi onunina kpodo avɔsinsan xeni do owan ɖi celu ha. ³ Ogbɛ ɖuɖu zinzan,onu ɖuɖu ɖekpokpwe alo owannyiyi ɖiɖona onu zɛ ojlɛ go ɖɛ ni nɔ kpɔn nɔ cɛncɛn mitɔn gɛ,ɖo yisenɔye wɛ mi nyi. ⁴ Oxo ɖuɖu ti,oklenɔ we oxo ti kpodo onu masɔgbe ti ni kpɔn nɔ tɔn sɔn onu mitɔn mɛ gɛ,vɔ onu mitɔn ni nɔ do okpɛ na Mawu. ⁵ Mi ɖo na nywɛ ganji ɖɔ ogbɛ ɖuɖu zantɔye,onu ɖuɖu watɔye,omɛ xena onu mɔ nɔ su nukunmɛ na gɛ lɛye ti ma kpego bo na ɖyɛ Klissi kpodo Mawu we xɔluɖuɖu lɔ mɛ gɛ,ɖo e nɛ lɔ nyi ohunsinsɛn. ⁶ Mɛɖɛ ni kpɔn ze oxomaɖota ɖe do blɛ mi ɖu gɛ,do onu e nɛ lɛye wɛ nɔ dɔn Mawu we aɖidido do wa otonu masetɔ lɛye ji. ⁷ E nɛ wutu,mi nɔ kpɔn do ogbɛeti xa omɛ lemɔha tɔn lɛye gɛ. ⁸ Le osan xoxo,zinvlu wɛ mi nyi vɔ odin,oweziza wɛ mi nyi le Aklunɔ mɛ.E wɛzɔn mi zan ogbɛ mitɔn ɖi weziza we vikpɛ lɛye ha! ⁹ Ɖo weziza lɔ sinsyɛn xena e nɔ na lɛye ɖiye:ayixa ɖagbwɛ,onu jijlɔ kpodo oxojɔxo. ¹⁰ Mi nɔ tɛnkpɔn a bo nɔ nyɔ onu xeni nɔ nyɔ na Aklunɔ lɔ; ¹¹ mi nɔ kpɔn ɖo alɔ do onu xena omɛ xeye ni le zinvlu mɛ nɔ blo lɛye gɛ.Amɔ mi nɔ jla ota na ye. ¹² Ɖo onu xena omɛ nɛ lɛye nɔ blo le bibɛtɛn,na ye na do ɖɔ wɛ,ŋunya tesu wɛ e na nyi; ¹³ vɔ onu ɖekpokpwe xena ye ɖetɔn jɛ agbaŋugba,ye nɔ le mɔ-ɛ xɔn ceɖe-ceɖe. ¹⁴ Ɖo onu ɖekpokpwe xena ye ɖetɔn jɛ agbaŋugba,e tlɔ zun weziza,e wɛ zɔn ye nɔ do ɖɔ ɖɔ:Fɔn, yɔ omɛ xeni le dɔ amlɔ xɔn,fɔn a bo cite le omɛ kuku lɛye mɛ,Klisi we weziza na ta do ji we. ¹⁵ E wɛzɔn mi nɔ nukle taŋu do ɖena mi le zan ogbɛ mitɔn ɖo xɔn go.Mi nɔ kpɔn zan ogbɛ ɖi oklenɔye ha gɛ,amɔ mi zan ogbɛ ɖi onunyinywɛtɔ ye ha; ¹⁶ na omɔ ɖekpokpwe hun na mi,mi ɖebla do wa onu ganji ɖo azan lɛye ma jɔhun gɛ. ¹⁷ E wɛ zɔn mi nɔ kpɔn ci ɖi oklenɔye ha gɛ vɔ,mi tɛnkpɔn a bo mɔ onu jɛ onu xena Mawu le din do mi si xɔn go ¹⁸ Mi nɔ kpɔn nɔ nu ahan mu gɛ:E nɔ dɔn omɛ do yi bubugbenu amɔ mi gɔ kpodo gbigbɔ mimɛ kpo; ¹⁹ mi nɔ kpɔ a bo do ji ohan hamɛ-hamɛ kpodo ohan xena yɛsisɛn mimɛ nɔ sɔ do ayixamɛ na mi lɛye,na mi na nɔ ji ohan a bo kanfu Aklunɔ lɔ kpodo ayixa mitɔn blebu kpo; ²⁰ mi nɔ do okpɛ na Mawu otɔ lɔ le azan leye kpokpo gbe,le nuɖekpokpwe mɛ, le Aklunɔ mitɔn Jesu Klisi we nyikɔ mɛ, ²¹ mi nɔ ze miɖe sɔ xɔ hwe na miɖe ɖo sisi xena mi ɖo na Klisi wutu. ²² Nyɔnusiye,mi nɔ ze miɖe sɔ xɔ hwe na miye su lɛye ɖi ɖena mi nɔ blo na Aklunɔ lɔ ɖo ha; ²³ ɖo sunnuglo wɛ nyi ota na asyɛ ɖi ɖena Klisi nyi otatɔ na agun xeni nyi agbaza etn ɖo ha. ²⁴ E wɛ,ɖi ɖena agun lɔ sɔ ɖe sɔ hwe na Klisi ɖo ha,lemɔha ke wɛ nyɔnusi can na sɔ eɖe sɔ xɔ hwe na aswa ɖo le onuɖekpokpwe mɛ. ²⁵ Sunuglo lɛye ,mi nyi owan na miye si lɛye ɖi ɖena Klisi nyi owan na agun lɔ ɖo ha,kaka bo ze eɖe do san avɔ do otamɛ ni-i ɖo ha, ²⁶ e nɛ na e sra wu ni-i gbɔn osin kpodo oxo etɔn mɛ vɔ,e na do wa nyi onu mimɛ, ²⁷ e jlo ɖɔ agun lɔ ni bo wa nukɔn miye tɔn,a bo nyɔ kpinkpɔn,oɖu ti,ofɛn ti ni nɔ kpɔn do le e go gɛ,vɔ e na nyi agun mimɛ xena ye ma le mɔ oxo ɖe bo na ɖɔ do e go xɔn gɛ. ²⁸ Lemɔha ke wɛ sunnuglo lɛye can ɖo na nyi owan na yesilɛye ɖo ɖi yete suye we agbaza ha.Omɛ ni nyi owan na asyɛ,e nyi owan na etesu. ²⁹ Le oxojɔxo mɛ,mɛti ma gbɛ owan na agbaza etesu tɔn gbeɖe gɛ,vɔ e nɔ ni-i onuɖuɖu,bo nɔ wle bo ni-i ɖi ɖena Klisi nɔ bloɖo na agun lɔ ɖo ha, ³⁰ xeni nyi agbaza etɔn miye bo nyi alɔklan etɔnye ɖo ha. ³¹ E wɛzɔn sunnuglo na lɛ le otɔ kpodo onɔ kpo kɔn a bo wa yi tɛ do asyɛ go wɛ ye omɛ awe lɛye na do tlɔzun agbaza lokpo gee. ³² Onuhwihwla e nɛ lɔ klo,wɛ nyɔ un sɔ-ɛ ɖɔ e nɛ lɔ bo kan Klisi kpo agun kpo . ³³ Oxo xeni le flɛn kpoŋu wɛ nyi ɖɔ lokpo-lokpo mitɔn ɖo na yi owan na asyɛ ɖi etesu lɔ ha,nyɔnusi lɔ bo na nɔ ɖo sisi na aswɔ.