¹ Vikpɛye,mi nɔ se tonu na myetɔ lɛye le Aklunɔ lɔ mɛ ɖo enɛ lɔ sɔgbe. ² Osɛn tintan xena akpagbe xo do wɛ nyi(Ɖo sisi na atɔwe kpodo anɔwe kpo), ³ na onu ni do nyɔ na we,na a do dɔji le anyizan ji. ⁴ Mi mɛ vitɔye,mi nɔ kpɔn nɔ do aɖi na vikpɛ mitɔn lɛye gɛ,vɔ mi hɛn ye a bo nɔ do kplangbe ye,a bo nɔ gbɛ nu na ye ɖi ɖena Aklunɔ jlo ɖo ha. ⁵ Omɛxixɔye,mi se tonu na omɛ ni nyi oga le ogbɛ xemɛ kpodo sisi kpo buɖisi kpo,wɛ e na sɔn ayixamɛ na mi le oxojɔxo ɖɔ:"Aklunɔ ha wɛ mi le sɛn. ⁶ Ni nɔ kpɔn nɔ nyi hwexenu na nukun yetɔn le mi ji kɛlɛ wɛ gɛ,ɖi gbɛtɔye kɛlɛ wɛ mi le wazɔn na ha,vɔ mi se tonu na ye ɖi Klisi we ozɔn wavi ni nɔ wa ojlo Mawutɔn kpodo ayixa yetɔn kpo ha. ⁷ Mi nɔ wa omɛxixɔ we ozɔn mitɔn kpodo ojlo ɖagbwɛ ɖi ɖɔ Aklunɔ wɛ mi le blo na ha,ni kpɔn nyi ɖɔ gbɛtɔye wɛ mi le blo na gɛ. ⁸ Mi nyɔ-ɛ ɖɔ omɛxixɔ alo omɛ ni jɛ e ɖe si,omɛ lokpo-lokpo na ɖu onu ɖagbwɛ xena e blo we ale le Aklunɔ de. ⁹ Mi mɛ xwetɔye,mye can mi zan jijɔ lemɔhatɔn do yi omɛ xixɔ mitɔn ye de.Mi jo adansinsin do a bo nyɔ-ɛ ɖɔ mye kpo omɛxixɔ lɛye kpo bo ɖo Aklunɔ lokpo ge,e bo le sɛxwe bo mɔ nɔ ɖe mɛɖe do vo na mɛ ɖe gɛ. ¹⁰ Do yi vivɔnu,mi do hɔnhlɔn lanmɛ na miɖe le Akunɔ lɔ mɛ dogbɔn hɔnhlɔn etɔn ɖaxo lɔ ji. ¹¹ Mi ze ahwanfunnu Mawutɔn sese sɔ kpla na mi na do kpego a bo nɔte gliŋu le nukɔn na omɔ xena lɛgba nɔ ɖo na omɛye. ¹² Ɖo gbɛtɔ mɛ mi din na fun ahwan xa gɛ,vɔ acɛkpikpa lɛye,ogaɖuɖu lɛye zinvlu mɛ we hɔnhlɔn lɛye kpodo gbigbɔ mawe ni le jɛhɔnmɛ lɛye wɛ. ¹³ E wɛzɔn mi sɔ ahwanfunnu Mawutɔn lɛye sese sɔ xɔ kpla na mi na do kpego do nɔte gliŋu le azan nyinyla lɔ gbe,na mi fun ahwan lɔ bo gɔ ɖu ɖe ji can,mi na le aceji. ¹⁴ E wɛzɔn mi nɔte gliŋu!Xojɔxo ni nyi akplakan xena mi na do do alin,onu jijlɔ wiwa bo na nyi oganwu na mi na sɔ xɔ do. ¹⁵ Akpakpa xeni nɔ jla wɛnɖagbe lɔ ni nyi fɔkpa na mi na sɔ xɔ do. ¹⁶ Le ogan ɖekpokpwe mɛ,yise ni nyi ahwangbanu na mi wɛ mi na nɔ ze do ci zo na awovi we ohwan ozotɔnye lɛye. ¹⁷ Hwɛngan ni nyi gangba na mi na sɔ xɔ cɔn.Mawu we oxo bo na nyi ohi gbigbɔ mɛtɔn le alɔ mɛ na mi. ¹⁸ Dogbɔn gbigbɔ mimɛ ji,mi nɔ xo oɖɛ hamɛ-hamɛ lɛye a bo nɔ fankwe na Mawu le ogan ɖekpokpwe mɛ.E wɛzɔn,mi nɔ nukle a bo do vivɛnu,a bo nɔ xo ɖɛ do tamɛ na yisenɔ lɛye. ¹⁹ A bo xo ɖɛ do tamɛ na nyɔ can gba,e nɛ na un le din na ɖɔ xo,Mawu na ze oxo xena na ɖɔ lɔ do blo wɛnɖagbwɛ we onu mamɔ dona gɔnmɛ kpodo jiɖiɖe kpo sɔ xɔ na-un, ²⁰ un nyi afɔsɔxɔɖote xeni le gankpamɛ do owɛn ɖagbowɛ nɛ lɔ wutu.E wɛzɔn mi xo ɖɛ na-un na ma ɖo jiɖiɖe a do jla xo lɔ ɖi ɖena e jɛxa ɖo ha. ²¹ Nɔvi yisenɔ vɛna-vɛna Ticiki xeni nyi ozɔnwatɔ gbejinɔtɔ le Aklunɔ lɔ mɛ na wa ɖɔ oxo lɛye kpokpo na mi.E nɛ mye can mi na do nyɔ ɖena un le kpodo onu na un le blo xɔn kpo. ²² Onu ni zɔn taŋu na un do sɔ-ɛ xɔ ɖo do xlan mi wɛ nyi ɖɔ e na wa ɖɔ ɖena mi le lɔ na mi,a bo fa oji na mi. ²³ Mawu otɔ kpodo Aklunɔ Jesu ni na fifa,wannyiyi kpodo yise,nɔvi yisemɛtɔn lɛye sese. ²⁴ Mawu we fɛnu ni nɔ okpɔ xa omɛ ni ɖo wannyiyi mavɔ-mavɔ na Aklunɔ Jesu Klisi