¹ E wɛ zɔn, nyɔ omɛ xeni le gankpamɛ mɛ do Aklunɔ lɔ we ozɔn go,un le byɔ mi xɔn ɖɔ mi zan ogbɛ xeni sɔgbe xa oylɔ xena mi yi lɔ, ² mi nɔ sɔ miɖe sɔ hwe a bo nɔ blo dɔmɛfa,a bo nɔ do ayi do.Mi nɔ kuhun do miɖe go le owanyiyi mɛ, ³ mi blo nukpokpo a bo nɔ okpɔjijɛ we gbigbɔmɛ le fifa we okancica mɛ. ⁴ Gbaza lokpo gee wɛ le,gbigbɔ lokpo gee wɛ le,lemɔha ke wɛ miye can gba nukunɖiɖo xena ye yɔ mi na lɔ lokpo gee wɛ; ⁵ Aklunɔ lokpo gee wɛ le,yise lokpo gee wɛ le,Mawu we osin lilɛ lokpo gee wɛ le, ⁶ Mawu lokpo gee wɛ le bo nyi otɔ na omɛ sesekpo,bo kpacɛ na omɛ lɛye kpokpo,bo nɔ wa ozɔn le omɛ kpokpo mɛ,bo le sese mɛ. ⁷ Co lokpo-lokpo mitɔn yi onunina kpatakli ɖe,e bo sɔgbe xa onunina xena Klisi na lɔ. ⁸ E wɛzɔn e nyi wiwlan ɖɔ:"Xena e yi oji,e dɔn gantɔ lɛye do sɔn,e na onu gbɛtɔlɛye. ⁹ Ani wɛ ye le ɖɔ xɔn bo ɖɔ ɖɔ e bo yi oji xlaan?Ote mɛ jɛ hwɛkpo wa wa okɔmɛ le anyizan ji gɛ wɛɛ? ¹⁰ Omɛ ni jɛ ote lɔ,eyɔ ke wɛ yi oji xlaan bo gbɔn lɛmɛ,enɛ e na do gbakpe ogbɛ lɔ sese mɛ. ¹¹ Eyɔ tesu wɛ na onunina hamɛ-hamɛ ye.E na na omɛ ɖeye nyi omɛ ɖeɖoxlanye ɖeye nyi ɖɔɖanyiɖɔtɔ ye,ɖeye nyi wɛnɖagbe jlatɔye ɖeye nyi agun kplantɔye,ɖeye nyi onukplanmɛtɔye, ¹² e nɛ,e na do jla yisenɔye ɖo anyi na ozɔn xena ye na wa na agun xeni nyi klisi we gbaza lɔ a do yi nukɔn le yise mɛ, ¹³ kaka mimɛ sese na blo lokpo le yise mɛ,a bo nyɔ Mawu we ovi lɔ wi-i ganji,a bo hwɛn le yise mɛ,a bo le ɖi Klisi lɔ ha,ninɔmɛ mitɔn bo na sɔ̧gbe xa etɔn sese. ¹⁴ Enɛ,mi ma gɔ le nyi vikpɛvu ye xɔn gɛ,onukplanmɛ ɖekpokpwe we jɛhɔn ma gɔ le dɔn mi do yi bubugbenu xɔn gɛ ɖi ɖena tɔjihun nɔ xosin ɖo ha.Gbɛtɔye ma gɔ le blɛ mi ɖu xɔn kpodo aglanmɛ we oxo lɛye a bo dɔn mi do yi onu nyinyla mɛ gɛ, ¹⁵ vɔ na mi le jla oxojɔxo lɔ le wannyiyi mɛ xɔn mi na hwɛn le nuɖe kpekpe mɛ a bo le sɛkpɔ Klisi xeni nyi ota lɔ xɔn. ¹⁶ E yɔ wɛzɔn alɔklan hamɛ-hamɛ ye kpli bo nyi agbaza lokpo kpikpetɛn hamɛ-hamɛ ye kpli bo hɛn gbaza lɔ do ote ganji,e nɛ na alɔklan lokpo-lokpo le wa ozɔn etɔn xɔn ɖi ɖena e jɛ ɖo ha,agbaza lɔ sese na hwɛn bo na le yi nukɔn le wannyiyi mɛ xɔn. ¹⁷ Oxo xena un le ɖɔ na mi xɔn bo gɔ le tɛ oɖɛ do e ji le Aklunɔ mɛ xɔn e ɖi ye mi nɔ kpɔn gɔ zan ogbɛ ɖi ɖena omɛ xeni ma nyɔ Mawu wi-i gɛ nɔ zan ɖo ha gɛ,susu yetɔn lɛye nɔ dɔn ye do ɖyɛ onu xeye ni ma ɖo ota gɛ lɛye mɛ. ¹⁸ Susu yetɔn lɛye do zinyla do onu manywɛ xena oji sinsyɛn yetɔnye nɔ hɛn do wa ogbɛ zinzan yetɔn gbɔn ovo na xena Mawu le din xɔn. ¹⁹ Ayixa yetɔnye ma le gbɛ gɛ,ye bo jo yeɖe do na ogbɛ ɖuɖu zinzan kaka nuti mɔ nɔ gɔ ɖo ye ote le onu ɖuɖu wiwa mɛ gɛ. ²⁰ Miye,okplan xena mi yi le Klisi de mɛ nyi enɛ gɛ, ²¹ le oxojɔxomɛ,Jesu lɔ we oxo wɛ ye ɖɔ mi wɛ se,ye bo kplan onu mi do oxojɔxo xeni le e mɛ lɔ go. ²² Mi ɖo na jo walɔ xoxo mitɔn osantɔn lɛye do,na mi le blo lemɔha xɔn,mi na jo ninɔmɛ osantɔn xena mi ɖo lɛye do,ninɔmɛ nɛ lɔ we omɛ blɛɖu we ojloye nɔ dɔn omɛ do yi bubugbenu. ²³ Mi jo miɖe do na gbigbɔ xeni le wa ozɔn le mi mɛ a bo blo na zinzin mitɔn ni tlɔ zun yɔyɔ, ²⁴ mi na sɔ ninɔmɛ yɔyɔ lɔ sɔ xɔ do ɖi awu ha,Mawu wɛ ɖo ninɔmɛ e nɛ lɔ,e bo nɔ ɖe e ɖe xlɛ gbɔn ogbɛ mimɛ kpodo ogbɛ jijlɔ zinzan xeni nɔ tɔn sɔn oxojɔxo mɛ,mɛ. ²⁵ E wɛ zɔn,mi jo awoɖiɖo do,lokpo-lokpo mitɔn ni nɔ ɖɔ oxojɔxo na nɔvyɛ,ɖo mi nyi agbaza lokpo gee we alɔklanye. ²⁶ Na mi do aɖi,mi nɔ kpɔn wa wa onu nyinyla gɛ,aɖi dido lɔ ni nɔ kpɔn wa le mi ji kaka na ohwe ni wa yi oxɔ gɛ, ²⁷ mi nɔ kpɔn na omɔ ti lɛgba gɛ. ²⁸ Omɛ xeni nɔ jɛ ajo le osan ni jo ajojijɛ do.Ni tɛnkpɔn a bo wa ozɔn kpodo alɔ etɔnye kpo,kpodo ayixa jijɔhun kpo e nɛ,e na do kpego do gɔ alɔ na omɛ xeni ma ɖo onu ɖe. ²⁹ Oxo nyinyla ti ni kpɔn tɔn sɔn onu mitɔn mɛ gɛ o,vɔ na mi na nɔ ɖɔ oxo,ni nɔ nyi oxo ɖagbwɛ ni na do hɔnhlɔn lanmɛ na omɛ a bo wa ɖagbwɛ na omɛ xeni nɔ se lɛye. ³⁰ Mi nɔ kpɔn ɖike na gbigbɔ mimɛ ni ci dɔŋuɖunu mɛ gɛ,e nɛ lɔ wɛ Mawu sɔ bo do ɖo josi mi go le okan tluntlun we azan lɔ gbe. ³¹ Onu vɛ le omɛ go ɖekpokpwe,aɖidido ɖekpokpwe,aɖiwlemɛ ɖekpokpwe axwa dido ɖekpokpwe, acɔn kinkɔn do omɛ go ɖekpokpwe kpodo danuwiwa ɖekpokpwe ni nɔ kpɔn gɔ nɔ mimɛ gɛ. ³² Mi nyɔ dɔmɛ do miɖe go,a bo nɔ ku ɖɔŋuɖunu na miɖe ɖi ɖena Mawu sɔ xɔ kɛ mi le Klisi mɛ ɖo ha.