¹ Na e n yi ɖɔ mifɔn sɔn oku xa Klisi, mi din sɛxwe we onu lɛye, ofi xena Klisi lɔ le, bo flɔn anyi le aɖusi mɛ na Mawu. ² Ayixa mitɔn lɛye ni nɔ onu sɛxwe tɔn lɛye ji, ni nɔ kpɔn gɔ nɔ anyizan ji we onu lɛye ji gɛ. ³ Ɖo, mi ku, ogbɛ mitɔn bo le Klisi si, e le hwihwla le Mawu mɛ. ⁴ Hwexenu na Klisi xeni nyi ogbɛ mitɔn lɔ na wa tɔn, miye can na wa tɔn xa-ɛ le gigo etɔn mɛ. ⁵ E wɛ zɔn mi hu walɔ anyizanji tɔn xeye ni le mi si lɛye. Ye wɛ nyi: Ogbɛ ɖuɖu zinzan, onu ɖuɖu biblo, owanyiyi na onu zɛ ojlɛ go, ojlo nyinyla, owanyiyi na dɔkunnu ɖiɖo. Owanyiyi na dɔ kunna nɛ lɔ bo nyi yɛhwesinsɛn. ⁶ Onu e nɛ lɛye nɔ hɛn xomɛsin Mawutɔn do wa otonu ma setɔ ye ji. ⁷ Walɔ nɛ lɛye ke wɛ mi nɔ zan le osan xoxo le hwexenu na onu nyinyla nɛ lɛye kpacɛ le ogbɛ mitɔn mɛ. ⁸ Odin miye can mi ɖe alɔ le onu xe lɛye kpokpo mɛ: Adidido, onu wiwa ɖi kanlin ha, ohun nyinyla, omɛxo ɖiɖɔ kpo oxo ɖaxo-ɖaxo xeye ni nɔ tɔn sɔn onu mitɔn mɛ. ⁹ Mi nɔ kpɔn gɔ nɔ ɖo awo na miɖe gɛ, ɖo mi o jo gbɛtɔ xoxo lɔ we ninɔmɛ kpo walɔ etɔn kpodo. ¹⁰ Odin gbɛtɔ yɔyɔ lɔ we ninɔmɛ wɛ mi sɔ do ɖi awu ha. Ninɔmɛ e nɛ lɔ nɔ le tlɔ wa yɔyɔ xɔn le ogan ɖekpokpwe mɛ a bo do le ɖi Mawu xeni ɖo-e lɔ ha. E nɛ na mi a do nyɔ Mawu lɔ ganji. ¹¹ Odin omɛ xeni nyi Jwifu nu ma gɔ gbɔn ovo na omɛ xeni ma nyi Jwifunu gɛ. ¹² Xena e nyi ɖɔ Mawu wɛ can mi na mi a do nyi omɛ etɔn xeye na e yi owan na ye, mi ɖo na nɔ kpɔn ɖɔŋuɖunu na omɛ ye we ayixa a bo nɔ ɖo ɖɔmɛ kinkwɛ, mɛɖe sɔhwe, xomɛ fifa kpo suulu ɖiɖo. ¹³ Mi nɔ kuhun na miɖe, na omɛɖe wa onu nyi odo na omɛɖe, mi sɔ ohwɛ sɔ kɛ miɖe ɖi ɖena Aklunɔ sɔ ohwɛ sɔ kɛ mi ɖo ha, miye can mi sɔ ohwɛ sɔ kɛ miɖe. ¹⁴ Le onu e nɛ lɛye kpokpo mɛ, mi sɔ owanyiyi ɖo ota na ye, ɖo owanyiyi lɔ wɛ nyi okan cica xeni nɔ zɔn na onu kpokpo nɔ do sɔgbe. ¹⁵ Fifa Klisi tɔn ni ɖu oga le oji mitɔn mɛ,fifa e nɛ lɔ wɛ Mawu ylɔ mi na.Ɖo mi nyi alɔklan agbaza lokpo gee tɔn,mi do okpɛ etɔn na Mawu. ¹⁶ Mi gɔ kpo Klisi we oxo lɔ kpo ganji,mi zan onunyinywɛ xe kpegan a bo do kplan onu miɖe,a bo gɔ nɔ do tɔ ogbe miɖe,mi nɔ do okpɛ na Mawu kpo oji mitɔn sese gbɔn ohan jiji tɛnmɛ-tɛnmɛ lɛye mɛ. ¹⁷ Onu ɖekpokpwe na mi na ɖɔ,alo xena mi na blo,mi blo-e le Aklunɔ Jesu we nyikɔ mɛ,a bo nɔ do okpɛ na Mawu otɔ lɔ gbɔn e yɔ ji. ¹⁸ Nyɔnusiye,mi sɔ miɖe sɔ hwe na miye su lɛye ɖi ɖena e jɛ xa ɖo le Aklunɔ lɔ mɛ. ¹⁹ Nyɔnusuye mi,mi yi owan na miye si lɛye a bo nɔ kpɔn nyla ohun do ye gɛ o. ²⁰ Vikpɛye,mi se tonu na omɛjitɔ mitɔn lɛye le onu kpokpo mɛ,onu xena Aklunɔ le din do mi si xɔn,e nɛ. ²¹ Ovitɔye mi nɔ kpɔn nɔ do xomɛsin na vikpɛ mitɔn lɛye gɛ,e nɛ kanmɛ ma gɔ le gbɔjɔ na ye xɔn gɛ. ²² Mɛsɛntɔye,mi se tonu na oga mitɔn xeye ni le anyizan ji fi lɛye,mi nɔ kpɔn nyi hwexenu na nukun yetɔn le miji ɖi gbɛtɔye wɛ mi jlo na nyɔ kpinkpɔn na ha gɛ,vɔ mi se tonu na ye le oxojɔxo mɛ,ɖo sisi xena mi ɖo na Aklunɔ wutu. ²³ Ozɔn ɖekpokpwe na mi le blo xɔn,mi blo-e kpo oji mitɔn sese ɖi Aklunɔ wɛ mi le blo na xɔn ha,ni nɔ kpɔn nyi ɖɔ gbɛtɔye wɛ mi le blo na xɔn gɛ, ²⁴ mi na nywɛ ɖɔ ajɔ xena mi na yi le Aklunɔ si wɛ nyi axɔsusu mitɔn,ɖo Aklunɔ Jesu Klisi lɔ tesu wɛ mi wa ozɔn na. ²⁵ Vɔ omɛ xeni blo nyinyla na mɔ ajɔ onu nyinyla tɔn yi,ɖo Mawu mɔ nɔ kpɔn do e mɛ na omɛ ɖe gɛ.