¹ Ogaye,mi sɔ ayixa jijlɔ kpo ayixa xeni sɔgbe do hɛn mɛsɛntɔ mitɔn lɛye,mi na nɔ nywɛ ɖɔ miye can bo ɖo oga lokpo le sɛxwe. ² Mi do vivɛnu le oɖɛ xixo mɛ,a bo nɔ nukle,mi nɔ blo onue nɛ lɛye kpo okpɛ dido kpo. ³ Na mi ka le xo oɖɛ lɔ xɔn,mi nɔ xo na miye can gba na Mawu a hun omɔ na mi,na mi a do jla oxo etɔn,a bo do ɖɔ onu budo we oxo xe wutu na un le gankpa mɛ do, ⁴ e nɛ na ma do ɖɔ-ɛ ceɖe-ceɖe ɖi ɖena e jɛ xa ɖo. ⁵ Mi nɔ zan walɔ jijɔhun do yi kosi lɛye de,hweɖekpokpwe na omɔ etɔn gbɛ hu na mi,a bo ɖe obla kpaŋu. ⁶ Oxo mitɔn ni nyɔ sise tɛgbɛ,a bo nɔ dɔn omɛye,mi ɖo na nyɔ ɖena mi na nɔ na oxosin omɛ lokpo-lokpo ɖo. ⁷ Nɔvi le yise mɛ vɛna-vɛna,Ticiki xeni nyi ozɔn watɔ ogbeji nɔtɔ,bo nyi ozɔn wagbɛ mitɔn le Aklunɔ lɔ mɛ,na wa ɖɔ oxo kpokpo na mi ɖo ɖena un le wutu. ⁸ Onu xeni zɔn taŋu-taŋu,na un do sɔ-ɛ sɔ le ɖoxlan mi xɔn,wɛ nyi ɖɔ,e na ɖɔ eɖna mi le ɖo na mi a bo do fa akɔn na mi. ⁹ Onezimu nɔvi vɛna-vɛna ogbejinɔtɔ na xodo-e do wa,omɛ mitɔn wɛ.Ye na ɖɔ onu xeni le jɔ le fixe xɔn kpokpo na mi. ¹⁰ Alisitaki,xe kpo nyɔ kpo ni le ogankpamɛ le fi do ogbe na mi,Maki xeni nyi Banabasi nɔvyɛ can do ogbe na mi,ɖena mi na yi Maki lɔ ɖo,ye o ɖɔ-ɛ na mi,na ye wa mi de,(mi yi ye ganji); ¹¹ Jesu xena ye nɔ ylɔ ɖɔ Jusitusi can do ogbe na mi.Ye mɛ atɔn e nɛ lɛye can wɛ nyi yisenɔ Jwifunu xeye ni wa ozɔn na-un na xɔluɖuɖu Mawutɔn lɔ. ¹² Ekpaflasi xeni nyi omɛ mitɔn lokpo do ogbe na mi:Mɛsɛntɔ Jesu Klisi tɔn nɛ lɔ,ma gɔn oɖɛ xodo ota mitɔn mɛ kpɔn gɛ,na mi a do nɔ ote gliŋu,a bo sɔ ogbe le ojlo Mawu tɔn bilbo mɛ le onu sese mɛ. ¹³ Un le ɖe kunnu xeni xɔn ɖɔ e bo jɛ tagba taŋu do Lawodisetɔye,kpodo Iyelakpolisitɔye go. ¹⁴ Wanyinanɔ mitɔn Lwiki xeni nyi doto kpo Demasi kpo do ogbe na mi. ¹⁵ Mi do ogbe na nɔvi yisenɔ xeye ni le Lawodise lɛye,mi na do ogbe na Nɛfa can,a bo do ogbe na agunvi xeni nɔ kpli do oxwe etɔn gbe lɛye. ¹⁶ Na mi xlɛ wema e xe lɔ vɔ,mi bo sɔ do yi Lawodise we agun ji na ye lɛye can a xlɛ-ɛ,miye can gba na xlɛ wema xena Lawodisetɔye na sɔ ɖoxlan mi. ¹⁷ Mi ɖɔ na Acipu ɖɔ:Ni bo wle obo na ozɔn xena Aklunɔ zɔn-ɛ lɔ a bo blo-e ganji. ¹⁸ Nyɔ Pɔlu tesu wɛ sɔ alɔ ce bo do wlan oxo e xe lɛye.Un do ogbe na mi,mi flin ɖɔ ogankpamɛ bɛ un bo le.Na fɛnu Mawutɔn ni nɔ okpɔ xa mi!