¹ Le oxojɔxo mɛ, un jlo ɖɔ mia nyɔ ahwan kpatakli xena un le fun do ota na mi xɔn, bo le fun do ota na Lawodisetɔye kpo omɛ sese xeni ma mɔ nukun ce mɛ kpɔn gɛ ye tɔn. ² Un le blo lemɔha xɔn na ye a do do oji, a bo ɖo gbekpɔ le owannyiyi mɛ, a bo do ɖo kandeji blebu xena zinzin adodwe lɔ nɔ na omɛ, a bo do nyɔ Mawu we onu budo lɔ, xeni nyi Klisi lɔ. ³ E yɔ lɔ mɛ wɛ onu nyinywɛ kpo onugɔnmɛ sise we dɔkun lɛye kpokpo hwla do. ⁴ Un le ɖɔ oxo e xe lɔ na mi xɔn, e nɛ, omɛ ɖe ma gɔ wa le ɖu aglanmɛ a bo do blɛ mi ɖu xɔn gɛ. ⁵ Ɛɛn, un ma le okpɔ xa mi le agbaza mɛ gɛ, a mɔ, un le okpɔ xa mi le gbigbɔ mɛ ojijwɛ wɛ e nyi na-un taŋu, ɖo mi nɔ blo onu do tito ji, bo lido le yise xena mi ɖo do Klisi go. ⁶ E wɛ zɔn, xena mi yi Jesu Klisi Aklunɔ lɔ, mi bo nɔ ogbɛ le e mɛ. ⁷ Mi li okyɔn a bo do aɖɔ odo do Klisi lɔ mɛ na mi mia do lido le yise mɛ ɖi ɖena ye kplan mi ɖo ha, a bo nɔ do okpɛ na Mawu. ⁸ Mi cɔ miɖe, na mi a nɔ kpɔn do flɛ jɛ omɛ biblɛɖu we oxo lɛye, oxo maɖi oxo xeni nɔ sɔn gbɛtɔ we onu nyinywɛ mɛ lɛye we omɔ mɛ gɛ. Onu nyinywɛ e nɛ lɔ nɔ flɔn anyi do gbɛtɔ ye we akɔnu biblo lɛye ji, kpo hɔnhlɔn gbɛmɛ fi tɔn lɛye ji, e ma flɔn anyi do Klisi ji gɛ. Mi nɔ kpɔn ɖoto ye gɛ. ⁹ Ɖo onu xena Mawu nyi blebu, wɛ le Jesu we agbaza mɛ. ¹⁰ Gbɔn e yɔ lɔ ji wɛ mi yi onu kpokpo le, e yɔ xeni le ota na acɛ kpikpa ɖekpokpwe kpo hɔnhlɔn ɖekpokpwe. ¹¹ E yɔ lɔ ke mɛ wɛ ye gbo ada na mi le, e ka ma nyi alɔ gbɛtɔ tɔn mɛ ye do gbo-e gɛ, vɔ adu xena ye gbo na mi le Klisi mɛ; e wɛ nyi ɖɔ ye ɖe onu nyinyla xeye na mi blo le agbaza mɛ lɛye sɛ. ¹² Xena ye lɛ Mawu we osin na mi, ye ɖi miye kpo Klisi lɔ, miye kpo e yɔ lɔ ke gɔ fɔn sɔn oku, ɖo mi ɖi onu do Mawu we hɔnhlɔn xeni fɔn-ɛ sɔn oku lɔ go. ¹³ Le osan xoxo, omɛ kukuye wɛ mi nyi dogbɔn onu masɔgbe biblo mitɔn kpo ada ma gbo mitɔn go. Vɔ, odin Mawu blo wɛ mi xlɔ wa ogbɛ xa Klisi lɔ, wɛ e sɔ onu nyinyla mitɔn lɛye sɔ ke mi. ¹⁴ Wema xe mɛ na ye wlan ohwɛ mitɔn lɛye do, wɛ e le da ohwɛ na mi xɔn tito etɔn lɛye bo ci ote do mi ji, e susu-i bo ka-ɛ do atin soga ji, bo bu mɔnu ni-i kaka do yi. ¹⁵ E yi hɔnhlɔn le acɛ kpikpa ye kpo ogaɖuɖu ye si, bo do ŋunya ye le agbaŋugba, bo ɖu le ye ji gbɔn oku etɔn le atin soga ji mɛ. ¹⁶ E wɛ zɔn, omɛɖe ni nɔ kpɔn nɔ gɔ do ohwɛ na mi le ɖuɖu kpo nunu mɛ gɛ, alo do oxwe ɖuɖu ɖe, alo osun yɔyɔ, alo Jwifunu ye we gbɔjwɛzan lɔ go gɛ. ¹⁷ Onu e nɛ lɛye nyi onu xeni na wa wa lɛye we alindɔn, vɔ, Klisi wɛ nyi nujɔnu lɔ. ¹⁸ Mi nɔ kpɔn dike na omɛ xeye ni nɔ yi owan na omɛɖe sɔ hwe le nukunta lɛye, bo nɔ sɛn wɛnzangun Mawutɔn lɛye a do ohwɛ na mi gɛ. Omɛ lemɔha tɔn lɛye nɔ tɛ do onu xena ye le mɔ xɔn go zinzin agbazamɛ tɔn xena ye nɔ ɖo lɛye; e nɔ zɔn wɛ ye nɔ nyigo toto. ¹⁹ Ye mɔ nɔ tɛ do Jesu xeni nyi ota lɔ go gɛ. Co ganke gbɔn Klisi lɔ mɛ wɛ agbaza lɔ blebu nɔ mɔ hudo etɔn le, kpikpetɛn lɛye kpo okan lanmɛtɔn lɛye nɔ hɛn agbaza lɔ ɖo ote ganji, wɛ e nɔ le hwɛn xɔn ɖi ɖena Mawu jlo ɖo ha. ²⁰ Xena e nyi ɖɔ mi ku xa Klisi lɔ, bo tɔn le hɔnhlɔn ogbɛ mɛ fi tɔn lɛye we acɛ gɔ, a ni ha wɛ jɔ na mi do jo miɖe do na osɛn nɛ lɛye, bo gɔ do le zan ogbɛ xɔn ɖi ogbɛmɛ fi tɔn wɛ mi nyi ha? ²¹ Nɔ kpɔn sɔ onu xe gɛ, nɔ kpɔn ɖɔ onu xe kpɔn gɛ, nɔ kpɔn ɖo alɔ onu xe go gɛ. ²² Onu xeye ni nɔ gble na ye gbɛ le zan ye xɔn wɛ osɛn nɛ lɔ kpokpo kan ogbeɖiɖe gbɛtɔye tɔn kpo onu kpinkplan ye tɔn wɛ ye nyi. ²³ Le oxojɔxo mɛ, osɛn nɛ lɛye ɖɔ ma le ɖi onu nyinywɛ we osɛnye ha, ɖo ye ɖɔ oxo do sinsɛn xena omɛ tesu nɔ blo go, bo gɔ ɖɔ oxo do omɛɖe sɔhwe kpo aya ɖido na omɛ tesu agbaza go, vɔ osɛn nɛ lɛye ma ɖo kpinkpɛn ti gɛ. Ye nɔ kpedo omɛ go kpoŋu na ye na ye a do blo ojlo agbaza tɔn.