¹ Xena mi lɛ le ye de,mi ɖyɛ otɔjihun mɛ,bo zɔn tlɔlɔlɔ yi otɔ cɛncɛn we oto xena ye nɔ yɔ ɖɔ Kɔsu mɛ,ayihɔngbe etɔn mi wa yi jɛ otɔ cɛncɛn we oto xemɛ na ye nɔ yɔ ɖɔ Hlodɛsi mɛ,mi bo lɛ le flɛn bo wa yi Patala. ² Mi mɔ otɔjihun ɖaxo ɖe le flɛn,e bo nyi Fenisi we kansinmɛ xɔn,mi bo ɖyɛ e mɛ,bo sɔn. ³ Xena mi mɔ otɔ cɛncɛn we oto xena ye nɔ yɔ ɖɔ Ciplu ɖoxlan xɔn,mi gbɔn afɔligbe etɔn,bo sɔn yi Sili we kansinmɛ,mi bo wa yi gli otɔjihun lɔ do Tilu,ɖo flɛn wɛ otɔjihun lɔ ɖo na ɖe agban etɔn lɛye do. ⁴ Mi nɔ flɛn na azan canwe,ɖo mi mɔ onukplanvi ɖe lɛye le flɛn,dogbɔn gbigbɔ mimɛ we oxo ɖiɖɔ na omɛ mɛ,onukplanvi lɛye ɖɔ na Pɔlu ɖɔ,ni bo nɔ kpɔn yi Jeluzalɛmu gɛ. ⁵ Vɔ,xena azan xeye na mi na do nɔ flɛn lɔ wa yi vɔ,mi jɛ omɔ hwexenu na mi jɛ afɔ bo le sɔn,omɛ lɛye sese kpo,wɛ le xodo mi xɔn,nyɔnusiye kpodo vikpɛye can,gbɔɔn mi bo tɔn le toxo lɔ mɛ,mi jɛ oklo le oxuta bo xo oɖɛ. ⁶ Xena mi klan le miɖe lɛye de vɔ,miye mi ɖyɛ otɔjihun mɛ,e wɛ ye bo lɛkɔ sɔn yi oxwe yetɔnye gbe. ⁷ Miye hwexenu na mi lɛ le Tilu,mi wa yi vɔ omɔji yiyi mitɔn kpodo otɔjihun le Putolemayisi,xena mi do ogbe na nɔvi yisenɔ xeye ni le flɛn lɛye vɔ,mi nɔ ye de na anyihɔngbe lokpo. ⁸ Le anyihɔngbe etɔn mi sɔn le toxo nɛ lɔ mɛ,bo wa yi jɛ Sezale,mi bo zɛ owɛn ɖagbejlatɔ Filipu we oxwegbe,e bo nyi omɛ lokpo le omɛ canwe xeye na ye can le Jeluzalɛmu ye mɛ. ⁹ Filipu lɔ bo ɖo ovi nyɔnuvi ɛnɛ xeye ni le alɔji ye,Mawu bo nɔ ɖɔ oxo na ye,ye bo nɔ ɖo ogbe etɔn. ¹⁰ Mi nɔ flɛn na azan susu,e wɛ Mawu we ɖɔɖanyiɖɔtɔ ɖe xena ye nɔ yɔ ɖɔ Agabwisi sɔn Jude bo wa mide, ¹¹ bo sɔ Pɔlu we gojiblanu do bla afɔ kpo alɔ etɔnye,bo ɖɔ mɔsin: Oxo xena gbigbɔ mimɛ ɖɔ ɖiye: Omɛ xe tɔn ni nyi gojiblanu e xe,ɖena Jwifuye na bla-ɛ ɖo le Jeluzalɛmu ɖiye,ye bo na sɔ-ɛ sɔ jo na omɛ xeye ni ma nyi Jwifuye gɛ. ¹² Xena mi se oxo nɛ lɔ,miye kpodo omɛ xeni le flɛn lɛye,fan okwe na Pɔlu ɖɔ ni bo nɔ kpɔn yi Jeluzalɛmu gɛ. ¹³ E wɛ Pɔlu ɖo e go na ye ɖɔ:A ni we avi wɛ mi le vi xɔn,bo le gba ayixa do na-un xɔn?Nyɔ e ma nyi bibla kɔkɔlɔkɔ mɛ un le ogbesisɔ na gɛ,un gɔ le ogbesisɔ na ye a hu-un do Aklunɔ Jesu lɔ we nyikɔ go le Jeluzalɛmu. ¹⁴ Xena mi ma kpego na,e kan do oxo mitɔn ji gɛ,mi gbɔjwɛ bɔ onu mi ɖɔ mɔsin Aklunɔ Jesu lɔ we ojlo ni bo nyi wiwa! ¹⁵ Xena azan enɛ lɛye wa yi vɔ,mi blo vɔjlaɖo bo sɔn yi Jeluzalɛmu. ¹⁶ Onukplanvi ɖe lɛye xeye ni le Sezale bo xodo mi,e wɛ ye kplan mi do yi dahwe ɖe xena ye nɔ yɔ ɖɔ Munasɔn de,e bo nyi Ciplu tɔ,mi zɛ e de,dahwe lɔ bo nyi onukplanvi odin e dɛn. ¹⁷ Xena mi lɛkɔ wa Jeluzalɛmu,nɔvi yisenɔye yi kpodo awajijɛ. ¹⁸ Le ayihɔngbe etɔn,Pɔlu kpo miye kpo yi Jaki de,agun mɛxo lɛye kpokpo can bo wa. ¹⁹ Xena Pɔlu do ogbe na ye vɔ,e ɖɔ onu lɛye sese kpo xena Mawu blo na omɛye xeni ma nyi Jwifuye dogbɔn ozɔn wiwa etɔn mɛ,ɖe xodo ɖe. ²⁰ Xena ye se lemɔha,ye kanfu Mawu,bo ɖɔ na Pɔlu ɖɔ mɔsin:Anɛyevi a mɔ Jwifu akpo nɛmu ɖe,wɛ tlɔ zun yisenɔye,ye mɛ lɛye sese kpo bo ɖo akpakpa na osɛn lɔ. ²¹ Vɔ,omɛye ɖɔ na ye ɖɔ mɔsin,ɖɔ yɔ bo le kplan onu Jwifuyetɔn xeni gba kpe gbɔn gbeji ye ɖɔ,ye ni bo ɖe okɔ le Mɔyizi we osɛn lɔ go,ye ni bo gbɔn gɔ gbo ada na vikpɛ yetɔn lɛye gbɔɔn a do zɔn do akɔnu Jwifuye tɔn ji can gba gɛ. ²² Naɖe mi na blo ɖo? Ɖo dandan ye na wa se ɖɔ yɔ bo wa. ²³ Onu xena mi na ɖɔ na we wɛ a na blo.Sunnuglo ɛnɛ ɖe lɛye le mide,ye bo do akpagbe na Mawu; ²⁴ dɔn ye, yɔ kpodo ye kpo bo an wa yi sla awu,a bo na zan kɔbɔ do ye go,ye bo na do xwlɛ ota na ye,e nɛ omɛ lɛye sese na nyɔ-ɛ ɖɔ xonugbo bɛ bo nyi oxo xena ye se do guwe, vɔ,yɔ tesu can bo zɔn gbɔn Mɔyizi we osɛn lɔ ji xɔn. ²⁵ Xeni kan omɛ ni ma Jwifuye gɛ bo wa tlɔ zun yisenɔye mi wlan gbeta mitɔn lɛye ɖoxlan ye ɖɔ ye ni bo nɔ kpɔn ɖu olan xena ye do san avɔ na yɛhweye gɛ,ye ni bo nɔ kpɔn ɖu ohun gɛ,lemɔha ke ye ni bo nɔ kpɔn ɖu kanlin xena ye su agbɔ do oxo na bo do hu ue gɛ,ye ni bo ɖe yeɖe do ovo le ogbɛ ɖuɖu zinzan hugan go. ²⁶ Le anyihɔngbe, etɔn Pɔlu dɔn sunnuglo ɛnɛ lɛye,ye bo wa yi sla awu,bo ɖyɛ Mawu we oxwe lɔ gbe,e bo ɖɔ azan xegbe na awu sisla lɔ na vɔ,e bo do na avɔsannu xena e na na Mawu do omɛ lokpo-lokpo nu. ²⁷ Awu sisla yetɔn we azan canwe lɛye wɛ ja vɔ xɔn kpoŋu,Jwifu Azi we kansinmɛ tɔye xeni mɔ Pɔlu le Mawu we oxwe lɔ gbe lɛye,fɔn togun lɔ kpokpo do e ji,bo wle, ²⁸ ye do axwa ɖɔ mɔsin:Izlayɛli vikpɛye mi wa kpedo migo loo,dahwe xeni nɔ kplan onu omɛ kpokpo le ofi kpokpo lɛye a do ɖɔ oxo nyinyla do Izlayɛli we togun,Mɔyizi we osɛn lɔ kpodo Mawu we osɛn go ɖye.E bo gɔ hɛn omɛ xeye ni ma nyi Jwifuye gɛ do ɖyɛ Mawu we oxwe mimɛ lɔ gbe,bo do ɖu osu na Mawu lɔ. ²⁹ Ye ɖɔ lemɔha ɖo ye o mɔ eyɔ kpo Tlofimu xeni nyi Efɛzutɔ le toxo lɔ mɛ,ye bo bu-i ɖɔ Pɔlu bo dɔn-ɛ do ɖyɛ Mawu gwe oxwe lɔ gbe lɔ wɛ ha. ³⁰ Ozin tɔ le toxo lɔ mɛ sese kpo, otoviye tɔn gbagbagba sɔn ofi ɖekpokpwe bo wa wle Pɔlu bo ɖe tɔn le Mawu we oxwe lɔ gbe, ye bo su ohɔn lɛye zɔnɖokpo. ³¹ Ye le din na hu Pɔlu, xena oxo lɔ ɖyɛ otomɛ na ahwanga Hlɔmatɔn ɖɔ Jeluzalɛmu we toxo lɔ kpokpo bo hlu. ³² Le otin lokpo lɔ mɛ, e sa ovo na sɔja ye kpodo sɔja kanweko bo do wezun do wa ye de. Otogun lɔ kpodo sɔja lɛye wutu , ye jo Pɔlu xixo do. ³³ Odin, sɔjaga lɔ wle Pɔlu bo do gɛdɛ awe wi e nɛ godo, e kan oxo wi se ɖɔ mɛ wɛ e nyi kpo a ni wɛ e blo. ³⁴ Vɔ le togun lɔ mɛ,ye le axwa nu,na omɛ ɖeye ɖɔ ɖe,omɛ ɖeye na gɔ ɖɔ obu,xena ahwanga lɔ ma kpego na se oxojɔxo ti le hunnya-hunnya nɛ lɔ mɛ gɛ,e ɖe ogbe ɖɔ ye ni bo dɔn Pɔlu do yi ahwankpa mɛ. ³⁵ Xena Pɔlu jɛ ahwankpa lɔ we kpekanji,sɔja lɛye gbɔjwɛ kɔ-ɛ,do adan xena togun lɔ wa xɔn wutu; ³⁶ ɖo otogun lɔ kpokpo xo do ye bo gɔ le axwa nu ɖɔ ye ni bo hu-i. ³⁷ Xena ye ja ɖyɛ ahwankpa lɔ mɛ xa-ɛ,Pɔlu ɖɔ na ahwanga lɔ ɖɔ mɔsin:Na kpego na ɖɔ oxo ɖe na we?Ahwanga lɔ bo ɖo e go ni-i ɖɔ mɔsin:A se glɛkigbe wɛɛ? ³⁸ Yɔ mɛ nyi Ejiputitɔ xeni hɛn ogu finfɔn wa toxo lɔ mɛ,bo dɔn omɛhutɔ akpo ɛnɛ (4000) do ɖyɛ zogbeji le azan ɖe mɛ wa yi wɛɛ? ³⁹ Pɔlu ɖo e go ni ɖɔ:Nyɔ Jwifu wɛ un nyi,ye ji-un le Tasi le Silisi we kansinmɛ,toxo xena nukun le ji ɖe mɛ wɛ un sɔn,un fan okwe na we,na ogbe na ma ɖɔ oxo na togun lɔ. ⁴⁰ Ahwanga lɔ bo ni-i ogbe,Pɔlu nɔ ote le kpekan lɛye ji,bo blo alɔ na togun lɔ na ye a do ɖo oɖa,ye mɛ lɛye sese bo bɔ onu,Pɔlu bo ɖɔ na ye do Hleble gbe mɛ ɖɔ: