¹ Xena hunnya-hunnya lɛye ɖo ote le Efɛzu we toxo lɔ mɛ,Pɔlu kpli onukplanvi lɛye,bo na ye ojidido,e nɛ godo,e lɛ le yede,bo jɛ omɔ a do sɔn yi Masedwani we kansinmɛ. ² E gbɔn kansin nɛ lɔ mɛ,bo do kplangbe na xodotɔ etɔn lɛye. Odin e wa sɔn yi Glɛsi, ³ ofi xena e nɔ na sunzan atɔn. E le afɔ lɔ ji bo na do ɖyɛ otɔjihun mɛ do sɔn yi Sili, e se ɖɔ Jwifuye bo le bla ogbe ɖo mye go. E bo sɔ gbeta a do gbɔn Masedwani lɔ a bo do sɔn. ⁴ Ye xo do-e kaka do yi Azi: Sopate Beletɔn, ovi Pilisi tɔn, Alisitaki kpo Tesaloniki we awe gɔ, Gayisu Dɛbe tɔn, Timɔte, kpodo Ticiki kpo Tlofimu, xeni nyi Azi we vi jiji. ⁵ Omɛ e nɛ lɛye wɛ jɛ nukɔn, wɛ mi nɔte kpɔn ye le Tloasi. ⁶ Mye tɔn, kpɔnnɔ mafɔn-mafɔn we godo, mi kpla mi le lɛye do yi Filipu de, le azan atɔn godo, mi wa Tloasi, flin wɛ mi blo azan canwe le. ⁷ Azan tintan le kɔsiɖa lɔ mɛ, mi wa yi kple bo do wɛɛ kpɔnnɔ. Pɔlu, xeni na sɔn le anyihɔngbe etɔn, e le ɖɔ oxo xa xodotɔ lɛye kpokpo kaka e xo zan ganwyawe. ⁸ Zogbɛn susu le oxɔ xemɛ na mi kpli do lɔ. ⁹ Ɖekajɛ lokpo xena ye nɔ yɔ ɖɔ Etikusi, xeni flɔn anyi le sɛflɛnu bo wa dɔ amlɔn siso-siso hwexenu na Pɔlu le ɖɔ Mawu we oxo xɔn; zinzin amlɔn lɔ tɔn zin e ji wɛ e flɛ sɔn sanŋu atɔn gɔ ji kaka bo wa jɛ anyizan mɔ, wɛ kuku etɔn jan wɛ ye wa mɔ. ¹⁰ Vɔ Pɔlu jɛ ote bo wa ze alɔ etɔn bo ɖɔ: Mi nɔ kpɔn hlu le mi ɖe lɛye mɛ gɛ, ɖo anidɔn ovi lɔ tɔn gbɛ le e mɛ. ¹¹ Hwexenu na e gɔ lɛ okɔ do wa oji, e ze kpɔnnɔ wɛ ye wɛn bo ɖu wɛ Pɔlu gɔ le ɖɔ Mawu we oxo kaka anyihɔn. E nɛ godo e sɔn. ¹² Ɖekajɛ wa yi oxwe etɔn gbe gbɛ-gbɛ lanmɛ le ganji, wɛ e do yi oxogbɛ okɔgɔ na omɛ tɔn. ¹³ Miye tɔn, mi xodo Pɔlu le aklo lɔ mɛ bo do le yi Asɔsi, bo na do yi ze, ɖo afɔ zɔn gbe wɛ e ja. ¹⁴ Hwexenu na mi wa yi kpe la e Asɔsi, mi ze le aga do yi Mitilɛnu we otoxo lɔ mɛ. ¹⁵ Sɔn flɛn lɔ wɛ mi gɔ gbɔn oxu ji le,bo wa yi jɛ Cyo le anyihɔngbe etɔn,anyihɔngbe atɔngɔ mi bo wa yi jɛ Samɔsu,e wɛ anyihɔngbe ɛnɛgɔ etɔn,mi jɛ Milɛ. ¹⁶ Ɖo,Pɔlu o sɔ ogbeta ɖɔ mye bo na gbɔn Efɛzu we toxo lɔ nukɔn,e ka ma do le gu ganmɛ le Azi we kansinmɛ xɔn,ɖo e le hwlɛndo xɔn,e nɛ na e na do kpego jɛ e ji wɛ,e bo na jɛ Jeluzalɛmu le Pantekotu we azan lɔ gbe. ¹⁷ Hwexenu na Pɔlu le Milɛ we toxo lɔ mɛ,e zɔn omɛye ɖoxlan Efɛzu we toxo lɔ mɛ,na ye a do yɔ agunmɛxoye do wa. ¹⁸ Xena ye wa e de vɔ,e ɖɔ na ye ɖɔ:Mi nyɔ jijɔ xena un zan do wa yi mide le ogan ɖekpokpwe mɛ,sɔn gbe xe gbe na un ɖyɛ Azi we kansinmɛ. ¹⁹ Un wa ozɔn na Aklunɔ lɔ kpodo omɛ xeye na Jwifuye we ogbe bla do omɛ go ye ɖye wa na-un. ²⁰ Mi bo nyɔ-ɛ ɖɔ,un ma ɖe okɔ le onu xeni na nyi ale na mi ti go gɛ,un ɖɔ Mawu we oxo lɔ na mi,bo kplan onu mi le dogbajiye kpodo xwegbeye kpo, ²¹ un bo ɖɔ oxo na Jwifuye kpodo omɛ xeye ni ma nyi Jwifuye na ye a do lɛkɔ wa Mawu de,dogbɔn walɔ ɖiɖyɔ yetɔn mɛ a bo ɖo yise do Aklunɔ Jesu ji. ²² Odin un le sɔn yi Jeluzalɛmu xɔn,ɖo gbigbɔ mimɛ ɖɔ mɔsin nyɔ bo na yi dandan,un ka ma nyɔ onu xeni na wa jɔ do ji-e le flɛn gɛ; ²³ vɔ onu xena un nyɔ-ɛ jan wɛ nyi ɖɔ,dogbɔn toxo lopko-lokpo mɛ gbigbɔ mimɛ nɔ ɖo okpɛn e ji na-un,ɖɔ mɔsin caba kpodo vivɛsise bo le tle kpɔn xɔn-un le flɛn. ²⁴ Vɔ un mɔ nɔ bu onu ti kpɔn gɛ,ɖo ogbɛ ce go gɛ,ɖi onu xeni vɛ na-un gɛ ha,onu xena nyɔ le din jan wɛ nyi ɖɔ ma yi vivɔnu na wezun dido ce,kpodo ozɔn xena Aklunɔ Jesu lɔ sɔ xɔ do asi mɛ na-un,e wɛ nyi ɖɔ ajla Mawu we fɛnu we wɛnɖagbe lɔ. ²⁵ Odin un nyɔ-ɛ ɖɔ mi ma kpego na gɔ mɔ nukun mɛ ce gɛ,mi mɛ lɛye sese kpo,xemɛ na un gbɔn bo do jla Mawu we axɔluɖuɖu lɔ. ²⁶ E wɛ zɔn un do ɖo okpɛn e ji na mi le egbe ɖɔ,omɛ ti we ohlɔn ma ja le okɔ na-un le mimɛ gɛ, ²⁷ ɖo un ɖɔ Mawu we tito lɛye sese kpo na mi,un ka ma hwla ti do mi gɛ. ²⁸ Mi cɔ miɖe a bo kpe nukun do togun xena gbigbɔ mimɛ sɔ mi sɔ do ɖo mɛkplantɔ na ye,mi bo na do kplan agun Mawutɔn xena e xɔ kpodo ohun e yɔ tesu tɔn. ²⁹ Ɖo un nyɔ-ɛ ɖɔ na un sɔn vɔ omɛ xeye ni le ɖi ohwla danuwatɔ lɛye ha na ɖyɛ mi mɛ,a bo wa onu nyinyla kpo togun lɔ, ³⁰ e wɛ le mi mɛ,omɛye na cite a bo ɖo a wo,a do dɔn onukplanvi lɛye do godo. ³¹ E wɛ zɔn,mi nɔ nukle a bo nyɔ-ɛ ɖɔ,le oxwe atɔn gblamɛ,ozan kpodo okle kpo un ma ja gɔn afɔ ma ɖo afɔji na lokpo-lokpo mitɔn kpodo ɖasin le nukun mɛ kpo xɔn gɛ. ³² Odin,un sɔ mi sɔ do alɔmɛ na Mawu bo jo mi do na fɛnu we oxo etɔn,Mawu ɖo hɔnhlɔn a do na mi nukɔn yiyi le yise mɛ,a bo gɔ do na cinnɔ yisenɔ lɛye kpokpo. ³³ Kɔbɔ alo sika alo onuzinzan omɛ ɖe tɔn,ma ja ci nukun ji na-un gɛ. ³⁴ Miye tesu lɛye mi nyɔ-ɛ ɖɔ alɔ ce xe lɛye wa ozɔn bo ɖo hudo ce kpodo omɛ xeye ni nɔ xodo-un lɛye tɔn kpo. ³⁵ Le onu lɛye sese kpo mɛ,un ɖe xlɛ mi ɖɔ mi bo ɖo na nɔ wa ozɔn do lemɔha a bo do gɔ alɔ na ayanɔ ye,mi bo ɖo na nɔ kpe nukun do Aklunɔ Jesu lɔ we oxo lɛye go,e yɔ tesu wɛ ɖɔ mɔsin: Nyɔna le onunina mɛ hugan onuyiyi mɛ. ³⁶ Xena Pɔlu ɖɔ oxo vɔ,e jɛ oklo xa ye na omɛ lɛye sese a do xo oɖɛ. ³⁷ E wɛ yemɛ lɛye sese kpo zɔn kpla Pɔlu kpodo avi vivi kpo taŋu bo kpla asi kɔmɛ ni-i, ³⁸ ye bo le onulilo mɛ taŋu ɖo e ɖɔ na ye ɖɔ ye bo ma gɔ ja mɔ nukunmɛ mye tɔn gɛ,e nɛ godo ye bo kplan-ɛ do yi otɔjihun lɔ kɔn.