¹ Vɔ le osan,ɖɔɖanyiɖɔtɔ awonɔye can tɔn sɔn togun lɔ mɛ,lemɔha ke wɛ onukplan omɛtɔ awonɔye na wa tɔn sɔn mi mɛ ɖo nɛ,ye na wa yɛnu a bo do hɛn okplan nyinyla,xeni nɔ dɔn omɛ yi bubu mɛ do wa mi mɛ,ye na gbɛ Aklunɔ xeni gɔ vɔ xɔ ye lɔ,e nɛ lɔ bo na dɔn vasudo do wa ye ji bleŋu. ² Omɛ susu na xo do ye le ogbɛ ɖuɖu zinzan nɛ lɔ mɛ,e wɛ do ye wutu,omɛye na nɔ le kɔn acɔn do oxojɔxo we omɔ lɔ go. ³ E wɛ,do owan xena ye yi na kɔbɔ wutu,ye na kpa oxo ɖɔ na mi,a do blɛ mi,vɔ le osan xoxo gbɔɔn,ye o do ohwɛ na omɛ nɛ lɛye ɖo anyi,vasudo yetɔn bo ma gɔ wa le dɛn xɔn gɛ. ⁴ Ɖo Mawu ma gɔn oba ma ɖo na wɛnzangun xe hu ohwɛ do-e lɛye gɛ,vɔ e bɛ ye do ozo mɛ,bo do caba na ye do zinvlu mɛ flɛn na ohwɛ dida zangbe; ⁵ Mawu ma gɔn ohwɛ ma da ogbɛ xoxo lɔ gɛ,amɔ otɔgigɔ ɖaxo wa ogbɛ xe mɛ na sisi ma ɖo na Mawu tɔye kɛɖɛ le,Nɔwe xeni jla ogbɛ jijlɔ zinzan we oxo xɔn,jan wɛ e ɖe tɔn,e yɔ kpodo omɛ canwe bu ɖeye; ⁶ Mawu gbo vasudo we ohwɛ na Sodɔmu kpodo Gomɔɔ we toxoye,bo na na ye ji afin,e nɛ lɔ bo nyi kpɔndego na onu xeni tle kpɔn sisi ma ɖo na Mawutɔye xeni na wa lɛye, ⁷ Vɔ e hwlɛn Lɔtu omɛ jijlɔ lɔ gan,e yɔ xeni nɔ se vivɛ xɔn taŋu do ogbɛ ɖuɖu zantɔ danuwatɔ mɛ ye we walɔ lɛye go. ⁸ Ɖo omɛ jijlɔ nɛ lɔ xeni le ye mɛ,nɔ le kpɔn ye xɔn,a bo se onuwiwa yetɔn xɔn,anyihɔngbe-anyihɔngbe,ayixa jijlɔ etɔn nɔ se vivɛ taŋu,do danuwiwa yetɔn lɛye go. ⁹ E nɛ lɔ ɖexlɛ ɖɔ Aklunɔ Mawu lɔ bo nyɔ ɖena e nɔ ɖe omɛ xeye ni nɔ ɖo sisi ni-i lɛye tɔn le didokpɔn mɛ ɖo,bo gɔ nyɔ ɖena e nɔ hwla omɛ xeye ni ma nyi omɛ jijlɔ ye ɖo anyi,a do wa dɔn oto na ye le ohwɛ dida zangbe. ¹⁰ Le ota ji,na na dɔn oto na omɛ xeye ni nɔ le wezun nu le godo na agbaza mɛ we onuye le ojlo ɖuɖu yetɔn lɛye mɛ,ye ka mɔ sɔ Aklunɔ lɔ we acɛkpikpa do yɔ onu ti gɛ,ye nɔ ɖe oji do ye tesu lɛye go,a bo nɔ kan ogbe na omɛ,ye ka ma ɖo sisi na onu dida susunɔ xeni le sɛxwe lɛye gɛ,amɔ zun wɛ ye nɔ zun ye, ¹¹ wɛnzangun Mawutɔn lɛye ɖo hɔnhlɔn,bo ɖo acɛ hugan onukplanmɛtɔ enɛ lɛye,ye nɔ ze ozun do do ohwɛ onu dida susunɔ lɛye na le Aklunɔ nukɔn. ¹² Amɔ omɛ e nɛ lɛye,ye le ɖi kanlin oklenɔ lɛye ha,ye jɔ na omɔ ji fiflɛ jɛ kpodo vasudo mɛ,ye nɔ kɔn acɔn do onu xeye go na ye ma mɔ nukun jɛ e go gɛ,ye na va ye sudo ɖi ɖena kanlin lɛye nɔ vasudo ɖo ha, ¹³ e nɛ lɔ bo na do nyi axɔsu yetɔn,na onu nyinyla xeye na ye blo lɛye,onu xeni nɔ vivi na ye,wɛ nyi ɖɔ ye nɔ jo yeɖe do na ogbɛ ɖuɖu zinzan le okle ceɖe-ceɖe,na ye wa agɔɖu tɛn xa mi,ye nɔ nyi ŋunya kpodo oɖu,ye bo na vivi aglan mɛ a do ɖo awo xɔn. ¹⁴ Afɔ do ogbe na omɛ wɛ le nukun ta na ye taŋu,onu nyinyla wiwa ka mɔ nɔ kpe agbɔ na ye kpɔn gbeɖe gɛ,ye nɔ ɖo omɔ na omɛ xeye ni ma li odo le yise mɛ lɛye gɛ,ye bo nɔ flɛ jɛ e mɛ,kɔbɔ bo nɔ mi a nukun na ye taŋu,nudonɔye wɛ ye nyi. ¹⁵ Xena ye lɛ le omɔ nywɛ lɔ ji,ye bu,bo sɔ omɔ xena Balamu xeni nyi Bosɔ we vyɛ sɔ,Balamu lɔ yi owan na axɔsu yiyi a do blo onu nyinyla, ¹⁶ vɔ ye bo gbɛ onu ni-i do toli vivɛ etɔn wutu,osɔkɛtɛ asi,xeni mɔ nɔ ɖɔ oxo gɛ,wɛ wa do gbɛtɔ we ogbe bo do ɖo ɖɔɖonyiɖɔtɔ lɔ we hannɔnu wiwa te. ¹⁷ Omɛ nɛ lɛye le ɖi dotɔ xeni ma ɖo osin gɛ ha,bo le ɖi sunwɔ xena jɛhɔn ɖaxo le fu xɔn wa yi ha,zinvlu yuyu kpɛnnɛ-kpɛnnɛ wɛ le tle kpɔn ye xɔn. ¹⁸ Tagba jijɛ yetɔn nɔ zun ogoyiyi kpodo oklenɔ we oxo kɛɖɛ,dogbɔn agbaza we ojlo nyinyla yetɔn lɛye mɛ,ye nɔ ɖo omɔ na omɛ xeye ni tɔn tlololo le alɔ mɛ na omɛ xeye ni le zan sisi we ogbɛ nɔ lɛye,ye bo nɔ flɛ jɛ e mɛ; ¹⁹ ye nɔ do akpagbe na ye ɖɔ,ye bo na jɛ yeɖe si,vɔ ye lɔ tesu bo nyi kannumɔnɔ n awalɔ xeye ni dɔn omɛ do yi vasudo mɛ ye,ɖo omɛ lokpo-lokpo nyi kannumɔ na onu xe we acɛgɔ an e le. ²⁰ Ɖo,na ye si na oɖu ogbɛ mɛ fi e tɔn lɛye,vɔ dogbɔn Jesu Klisi Aklunɔ mitɔn kpodo hwlɛngantɔ mitɔn nyinyɔ godo,na ye gɔ wa jo yeɖe do na oɖu lemɔha tɔn lɔ ke wle ye bo ɖu le ye ji,be ɖena ye le odin na gɔ nyla hugan ɖena ye le osan. ²¹ Ɖo na ye na gɔ do nyɔ ogbɛ jijlɔ zinzan we omɔ lɔ ɖo anyi san,e na nyɔ na ye hugan,ɖɔ ye nyɔ-ɛ hwɛkpo wa tlɔ lɛkɔ le osɛn wiwe xena Mawu lɔ na ye lɔ go. ²² Onu xena olodido lɔ pɛpɛpɛ lɔ wɛ jɔ do ye ji:E ɖɔ ɖɔ:Duvi gɔ vɔ sɔn yi onu xena e vi xɔn,hanvi xena ye lɛ osin na odin tlololo nɔ gɔ vɔ yi do ota bab mɛ.