¹ Nɔvi vɛna-vɛna ce lɛye, wema awegɔ ɖiye un le wlan ɖoxlan mi xɔn. Le wema awegɔ lɔ mɛ sese kpo, un nɔ ɖoŋudo onuye go na mi xɔn, a bo do fɔn zinzin xeni sɔgbe le mi mɛ. ² Mi flin oxo xeye na Mawu we ɖɔɖanyiɖɔtɔ mimɛ lɛye ɖɔ ɖanyi la ozan, kpodo osɛn xena Aklunɔ hwlɛngantɔ lɔ ɖɔ dogbɔn omɛ ɖeɖowlan mitɔn lɛye ji. ³ Jɛ nu kɔn mi ɖo na nyɔ-ɛ ɖɔ, le azan vivɔnu lɛye mɛ, omɛ kotɔye na wa kpodo omɛ kiko taŋu, ye bo na zɔn do ojlo nyinyla ye tɔn ji. ⁴ Ye bo na ɖɔ ɖɔ: E ma ɖɔ na mi ɖɔ miye bo na lɛkɔ wa? Odin ɖe, bo wɛ e le? Sɔn hwexenu na dagboye o ku, ɖena onu lɛye sese le sɔn hweɖenu kaka dojɛ egbe di jan wɛ onu lɛye lɔ le. ⁵ Vɔ, le oxojɔxo mɛ, ye bo wɔn ɖɔ jinukunsin kpodo anyizan kpo ɖe anyi sɔn xoxoxo gbɔɔn dogbɔn Mawu we oxoɖiɖɔ mɛ. ⁶ Lemɔha ke wɛ osin wɛ Mawu do va ogbɛ ɖanyitɔn dogbɔn otɔ gigɔ ɖaxo lɔ mɛ. ⁷ Jinukunsin kpodo anyizan odin tɔn, Mawu we oxo lɔ ke wɛ hɛn ye do ote ɖanyi na ozo, ye bo le anyi na ohwɛ ɖiɖa we azan lɔ, kpodo sisi ma ɖo na Mawu tɔye we vasudo. ⁸ Vɔ, nɔvi vɛna-vɛna ce lɛye mi, onu lokpo ɖe le wɛ mi ma le wɔn xɔn gɛ, le Aklunɔ mitɔn we nukunmɛ, anyihinhɔn lokpo ɖeɖi oxwe akpo lokpo(1000) ha, oxwe akpo lokpo bo gɔ ciɖi anyihinhɔn lokpo ha na Mawu. ⁹ E mɔ nɔn dɛn na Aklunɔ lɔ na do hɛn akpagbe etɔn do wa cicɛmɛ gɛ, ɖi ɖena omɛ ɖeye nɔ bu-i ɖo ha; vɔ e nɔ le kuhun na mi xɔn, ɖo e ma jlo ɖɔ omɛ ɖe ni bo yi va sudo gɛ, vɔ e ɖo ojlo ɖɔ omɛ lɛye sese ni bo lɛvɔjɔ. ¹⁰ Aklunɔ lɔ na wa a jijimɛ ɖi ajotɔ ha; wɛ le azan e nɛ gbe, jinukunsin na bu wa yi kpodo zigidi ɖaxo ɖe, onu ɖekpokpwe xena ozo na wle leye na sle, wɛ ye da ohwɛ na anyizan kpo onu xeye ni le eji lɛye kpokpo. ¹¹ Xena e nyi ɖɔ onu lɛye sese na sle ɖo lemɔha, a ni wɛ zɔn mi ma kpego na zan ogbɛ mimɛ a bo nɔ ɖo sisi na Mawu. ¹² Mi omɛ xeye ni le nɔ ote kpɔn azan e nɛ lɔ xɔn, bo le do ogan xɔn le madɛn-medɛn mɛ ye, azan nɛ lɔ gbe ojinukunsi na wle ozo a bo sle,onu xeye na ozo na wle lɛye na fiyɔ a bo sle. ¹³ Vɔ miye, mi le ote kpɔn ojinukunsi yɔyɔ kpodo anyizan yɔyɔ xɔn ɖi ɖena, e ɖɔ danyi ɖo ha, ofilin wɛ onu jijɔhun lɛye na flɔn anyi ɖo le. ¹⁴ Mi e wɛ zɔn, nɔvi vɛna-vɛna ce lɛye, le ote ninɔ kpɔn lɔ mɛ, mi do hɔnhlɔn na odu ti ni nɔ kpɔn ci mi go gɛ, ohwɛ ti ni nɔ kpɔn nɔ mi go can gɛ, wɛ mi na le fifa mɛ xa Mawu tɛgbɛ. ¹⁵ Mi ɖo na nyɔ-ɛ ɖɔ Aklunɔ lɔ le kuhun xɔn, na mi na do mɔ wlɛngan, Pɔlu miye nɔvi vɛna-vɛna can o wlan-ɛ do xlan mi kpodo onu nyinywɛ xena Mawu ni-i kpo. ¹⁶ Lemɔhake wɛ e yɔ can nɔ blo ɖo le wema etɔn lɛye sese xe mɛ na e ɖɔ oxo do onu e nɛ lɛye go, le wema lɛye mɛ, ofi ɖe lɛye le, wɛ nukun mimɔ jɛ onu lɛ mɛ bo gindin, onu manyɔɛtɔye, xeni ma li odo le yise mɛ lɛye, nɔ tlɔ ota te na oxo etɔn lɔ, ɖi ɖena ye nɔ blo ɖo na onu winwlan mimɛ lɔ we akpa ɖe lɛye ha, na ya tesu ye we vasudo. ¹⁷ Vɔ miye nɔvi vɛna-vɛna ce lɛye, un le xo okpa na mi xɔn, mi nɔ aceji, mi nɔ jo miɖe do na sisi ma ɖo na Mawu tɔye, omɛ xeni ni le bu xɔn lɛye, a wa dɔn mi na, mi na wa jɛ anyi le ote ninɔ kpɔn Mawu mitɔn lɔ mɛ gɛ. ¹⁸ Vɔ, mi ɖo nukɔn yiyi le Aklunɔ Mawu kpodo hwlɛngantɔ mitɔn Jesu Klisi we fɛnu mɛ. E tɔn wɛ nyi gigo sɔn odin kaka do yi mavɔ-mavɔ! Ami!