¹ Simɔ,Piyɛ,xeni nyi mɛsɛntɔ Jesu Klisi tɔn,wɛ wlan wema e xe,ɖoxlan mo mɛ xeye ni ɖo yise xeni ɖo kpinkpɛnmɛ lokpo nukun mɛ ɖi miye tɔn ha,dogbɔn Mawu hwlɛngantɔ mitɔn Jesu Klisi we onu jijlɔ wiwa mɛ: ² Mawu we fɛnu kpodo fifa etɔn,ni kɔn do mi ji taŋu,dogbɔn Mawu kpo Jesu Aklunɔ mitɔn lɔ we nyi nyɔ-ɛ mɛ. ³ Mawu sɔ hɔnhlɔn etɔn,bo do na mi onu ɖekpokpwe xeni le vivɛɖe na ogbɛ ninɔ,kpodo sisi ɖiɖo ni-i,bo na na mi nyɔ omɛ xeni yɔ mi ɖɔ miye a bo ɖo alɔ le gigo miyetɔn mɛ,a bo mɔ gɔ ɖo alɔ le xomɛnywɛ miye tɔn mɛ, ⁴ e gbɔn flɛn bo do na na akpagbe xena e do na mi ɖaxo-ɖaxo ye,bo vɛ kɔbɔ ye do cɛ do miji,e nɛ na mi yi ye,mi na do tɔn le dindɔn xena ŋubya nɔ hɛn do wa ogbɛ lɔ mɛ,a bo do sɔgbe xa ninɔmɛ Mawutɔn. ⁵ E wɛ zɔn,mi jɛ tagba lɛye kpokpo xena mi kpego,a do sɔ walɔ jijɔhun sɔ kpe na yise mitɔn,a bo sɔ onu jijɔhun sɔ kpe na walɔ jijɔhun, ⁶ mi bo na sɔ omɛ ɖe ji ɖuɖu le sɔ kpe na onu jijɔhun,a bo sɔ vivɛnu dido sɔ kpe na omɛ ɖe ji ɖuɖu,a bo gɔ sɔ sisi ɖiɖo na Mawu sɔ kpe na vivɛnu dido lɔ, ⁷ mi bo na sɔ nɔvi biblo sɔ kpe na sisi ɖiɖo na Mawu,a bo sɔ wanyiyi xɔ kpe na nɔvi biblo lɔ. ⁸ Ɖo na mi ɖo walɔ ne lɛye,e bo le gbɔɔn bo su,ye na na na mi na bizo le ozɔnwiwa mɛ,a bo li odo,le Aklunɔ mitɔn Jesu Klisi lɔ nyi nyɔ-ɛ mɛ. ⁹ Vɔ omɛ xeni ma ɖo walɔ nɛ lɛye gɛ,nukun gbanɔ wɛ e nyi,e ka mɔ le mɔ onu xɔn ganji gɛ,e wɔn ɖɔ ye bo sla awu na miye le onu nyinyla miye tɔn lɛgba tɔn ye mɛ. ¹⁰ E wɛ zɔn nɔvi yisenɔye,mi jɛ tagba a do ɖe xlɛ titeŋugbe ɖɔ Mawu bo yɔ mi,ɖo na mi le blo e nɛ lɔ xɔn,mi ma le jɛ nyinyla mɛ xɔn kpɔn gbeɖe gɛ. ¹¹ E nɛ,ye na hun ohɔn na mi faa,mi bo na byɛ axuluɖuta mavɔ-mavɔ Aklunɔ mitɔn kpodo hwlɛngantɔ mitɔn Jesu Klisi tɔn mɛ. ¹² Onu xeni zɔn na un nɔ do flin onu nɛ lɛye na mi tɛgbɛ lɔ nɛ,mi bo o nyɔ ye osan,bo o lido ganji le oxojɔxo xena mi yi lɔ mɛ. ¹³ Un ka mɔ ɖɔ bo sɔgbe ɖɔ ma flin onu xeye na mi,ayixa mitɔn bo na do nɔ ote, ¹⁴ ɖo un nyɔ-ɛ ganji,ɖi ɖena Aklunɔ mitɔn Jesu Klisi tesu o ɖɔ-ɛ ɖo ha,ɖɔ zaanɖe din,na ku. ¹⁵ Vɔ na jɛ tagba,e nɛ,na un ma gɔ wa le gɛ can,mi bo na nɔ do kpego flin onu nɛ lɛye le ohwe ɖekpokpwe nu. ¹⁶ Le oxojɔxo mɛ,e ma nyi hwenuxo xeye na ye kpa kpo ɖaŋu,mɛ mi sɔ,bo do ɖe Aklunɔ mitɔn Jesu Klisi we wiwa kpodo hɔnhlɔn sɔ xlɛ mi gɛ,vɔ mi mɔ ɖena e klo ɖo kpodo nukun mitɔn. ¹⁷ Ɖo Mawu otɔ lɔ,sɔ yɛyi kpodo gigo kpo sɔ xɔ ni-i,le hwexenu na ogbe lɔ ɖi ni-i sɔn gigo ɖaxo Mawutɔn mɛ,bo ɖɔ ɖɔ:Omɛ xe wɛ nyi ovi vɛna-vɛna ce,e yɔ we nɔ do awajijɛ na-un. ¹⁸ Ogbe nɛ lɔ,xeni ɖi sɔn sɛxwe,le hwexenu na mi le xa-ɛ le oso mimɛ lɔ ji,miye tesu ye mi se. ¹⁹ Gɔ bɔ do e go,mi kan do oxo xena ɖɔɖanyiɖɔtɔ lɛye ɖɔ lɔ ji ganji,miye can,e nyɔ ɖɔ ayixa mitɔn o nɔ ote do e go ɖi zogbɛn xeni le klɛn xɔn le zinvlu mɛ ha,gbɔɔn do yi hwexenu na anyi na hɔn,sunhwlɛvu zanfunnu tɔn lɔ bo na klɛn le oji mitɔn lɛye mɛ; ²⁰ tintantɔn,onu xena mi ɖo na nyɔ-ɛ ganji ɖiye,omɛ ɖe ma ɖo na sɔ zinzin e yo tesu tɔn do tin onu winwlan wiwe lɔ we oxo ɖɔɖanyi lɛye gɛ, ²¹ ɖo ɖɔɖanyi ɖe,mɔ nɔ tɔn sɔn gbɛtɔ we ojlo mɛ kpɔn gbeɖe gɛ,vɔ dogbɔn gbigbɔ mimɛ ji wɛ gbɛtɔ lɛye ɖɔ oxo xena Mawu ɖɔ na ye ɖɔ ye ni bo ɖɔ lɔ.