¹ Nɔvi yisenɔ,fɛnu xena Mawu na Masedwanu we agun ye,mi jlo ɖe-e sɔ xlɛ mi. ² Ye gbɔn vivɛsise mɛ do onu lilo wutu,co ye bo le jijwɛ mɛ taŋu,e nɛ lɔ na na ye hun ayixa bo na onu omɛ,ayanɔ kɛ ye ka nyi co. ³ Un hɛn,na ɖe kunnu,ye na onu xeye go na ye kpe lɛye,ye bo tlɛ na hugan onu xeye go na ye kpe lɛye ye tesu kɛ jlo ɖo lemɔha. ⁴ Ye do kɛnklɛn na mi ŋuklɛn-ŋuklɛn ɖɔ miye bo na ogbe miye lɛye,na miye a bo jɔ ofun do onu ni na xena mi le blo ɖoxlan yisenɔ lɛye xɔn. ⁵ Ye blo hugan onu xena mi lin,tintan tɔn ye tesuye sɔ yeɖe sɔ na Mawu lɔ,e nɛ godo ye sɔ yeɖe sɔ na mi dogbɔn Mawu we ojlo mɛ. ⁶ E wɛzɔn,mi byɔ Titu ŋuklɛn-ŋuklɛn ɖɔ dɔmɛnywɛ we ozɔn nɛ lɔ o tɔ eji xoxo,ni bo gbɛnkan do e nu do yi vivɔnu. ⁷ Onu kpokpo le mi si bo su taŋu,ye wɛ nyi:"Yise,oxo jijɔhunɖiɖɔ,onunyinywɛ,ozo bibi hamɛ-hamɛ kpo owannyiyi.Xena e le lemɔha mi na na dɔmɛnywɛ we ozɔn nɛ lɔ can ni su le mimɛ taŋu. ⁸ Un ma ɖɔ lemɔha bo do le ɖe ogbe do mi ji xɔn gɛ,vɔ un le ɖɔ omɛ gbokpweye we ozo bibi we oxo na mi xɔn,a bo do do owannyiyi mitɔn kpɔn ɖɔ e nyi oxojɔxo tɔn ja. ⁹ Ɖo mi nyɔ ɖena Aklunɔ mitɔn Jesu Klisi blo fɛnu na mi ɖo.E yɔ xeni o nyi dɔkunnɔ,e wa tlɔ zun ayanɔn do mi wutu,na miye a do gbɔn ayaɖuɖu etɔn lɔ mɛ,a bo do tlɔ zun dɔkunnɔ. ¹⁰ Oxo xena un mɔ do e go,wɛ un le ɖɔ na mi xɔn.E nyɔ na mi ɖo lemɔha ɖo miye wɛ nyi omɛ tintan xeye ni jɛ biblo ji ye,e ka ma nyi e nɛ kɔkɔlɔkɔ gɛ,vɔ sɔn oxwe xeni wa yi mɛ gbɔn wɛ mi o ɖo ojlo etɔn. ¹¹ Odin,mi vɔ-ɛ,e nɛ ɖi ɖe mi ɖo ojlo kpatakli etɔn ɖo ha mi na blo-e,dogbɔn onu xeye ni le mi si mɛ. ¹² Na ojlo xena do na onu lɔ tesu-tesu gbɛ le,onu xena omɛ lɔ ɖo go wɛ Mawu nɔ kpɔn do a do yi onu ni na etɔn,e mɔ nɔ kpɔn do onu xena omɛ lɔ ma ɖo go gɛ. ¹³ E ma nyi ɖɔ mi na vɔ onu xena mi ɖo sese a bo do kpedo omɛ gbokpwe ye wɛ gɛ,vɔ na omɛ xena mi le na onu xɔn kpo miye kpo a do le gbesisɔ. ¹⁴ Le odin onu xeni mi si bo su hugan na yi alɔgɔ na ye le onu xeni hudo ye mɛ.E nɛ,na onu ɖe wa hudo miye can,onu xena ye na ɖo hugan na gɔ alɔ na miye can we hudo,lemɔha wɛ ogbesisɔ na nɔ anyi ɖo. ¹⁵ Ɖi ɖena e le winwlan le Mawuxo lɔ mɛ ɖɔ mɔsin "Omɛ ni bɛ susu ma ɖo din gɛ,omɛ xeni bɛ ovuɖe e ma hwe do-e." ¹⁶ Okpɛ na Mawu xeni sɔ akpakpa lokpo nukun mɛ lɔ do oji mɛ na Titu do miye wutu. ¹⁷ E yi ogbe na onu xena mi byɔ-ɛ,kpodo akpakpa ɖaxo ɖe,bleŋu wɛ e sɔ ogbeta do wa mide. ¹⁸ Nɔvi xena agun kpokpo nɔ le kan afu xɔn do ɖena e nɔ la owɛnɖagbe lɔ ɖo,wɛ mi sɔ ɖoxlan bɔdo Titu lɔ go. ¹⁹ Gɔ hugan lemɔha,agun lɛye wɛ can nɔvi e nɛ lɔ ni a do kplan mi do le mɔji yiyi mitɔn,le alɔgɔ na Mawu we otogun we ozɔn xe lɔ mɛ.E na do yi go na Aklunɔ lɔ tesu,a bo do na na ojlo nywɛ mitɔn a jɛ eji. ²⁰ Mi le blo onu lɛye kpokpo xɔn,e nɛ onu jijɔ susu gbagbagba xe we ozɔn na ye sɔ do alɔ mɛ na mi,omɛɖe ma gɔ do le mɔ oxo ɖe a bo ɖɔ do migo gɛ; ²¹ onunywɛ biblo wɛ mia nukun na mie ka ma do nyi ɖɔ a do nyi omɛ nywɛ le Aklunɔ kɔkɔ lɔkɔ we nukun mɛ gɛ,vɔ a bo gɔ do nyɔ le gbɛtɔ lɛye we nukun gba ²² Mi gɔ sɔ miye nɔvi bu sɔ kpe ye,miye nɔvi e xe lɔ mi o do akpakpa etɔn kpɔn hwla nɛmu ɖe,e bo gɔ ɖe-e xlɛ do e ji xɔn odin taŋu,ɖo e ɖe oji do mi go ganji. ²³ Titu e yɔ xodotɔ ce kpo ozɔnwagbɛ ce wɛ e nyi mi de,omɛ xeni xo do e lɛye bo nyi omɛ xeye na agun lɛye sɔ ɖoxlan lɛye na Klisi we gigo. ²⁴ Mi ɖe xlɛ ye ɖɔ mi bo yi owan na ye oxojɔxo,e nɛ agun lɛye na do nywɛ ɖɔ kan ɖo

e ji xena mi bo ɖo na ye ohwɛ mitɔn bo jɔ.