¹ Hadwe vɛna-vɛna ye,mye tɔn wɛ nyi akpagbe lɔ.Mya klɔ onu ɖuɖu lɛ le ayixa mitɔn mɛ.Mya nɔ mimɛ ji a bo gbo adɔ. ² Mi blo tɛnmɛ na mi ɖo ayixa mitɔn mɛ.Mi ma jɛ agɔ ɖo mɛti gɛ,mi ma gbɔn omɔ na mɛti gɛ,mi ka ma tafu mɛti gɛ. ³ Un ma ɖɔ lemɔha bo na do da ohwɛ na mi gɛ.Mi le ayixa mitɔn mɛ,wɛ mi le kpɔ le ogbɛ alo oku hwenu. ⁴ Un ɖe ji do mi go,un ja wa ɖo mi go. ⁵ Xe mi wa Masedwanu,mi ma gbɔjwɛ gɛ.Vɔ,mi gbɔn vivɛsise mɛ wɛ ye tɔn ahwan mi, ⁶ Vɔ Mawu xeni nɔ fa akɔn na omɛ xeye na ayixa gbado na ye fa akɔn na mi le Titu we wiwa mɛ. ⁷ Titi we wiwa mɛ zɔn gla gla le lanmɛ na mi gɛ,vɔ gla gla mitɔn can le e mɛ gba,e ɖɔ mye bo le din bo na mɔ un.E ɖɔ xa na-un ɖo le mi nɔ jɛ tagba ɖo ta ce mɛ ɖo wɛ awajijɛ ce gɔ dagba. ⁸ Na wema xena un le wlan ɖoxlan mi xɔn gɔ hɛn onu lilo wa na mi can e ma vɛna-un gɛ.Ɛɛ,un mɔ ɖɔ miye bo nɔ onu lilo mɛ na oganxixo ovuɖe e gɔ do vɛ na-un can, odin ŋu le mɔ jijwɛ xɔn, e ka ma nyi onu lilo xe mɛ na mi nɔ lɔ mɛ zɔn gɛ, vɔ ɖiɖyɔ xeni hɛn lɔ wa na mi lɔ wɛ zɔn. ⁹ Ɖo ɖena Mawu jlo ɖo lɔ wɛ mi nɔ onu lilo lɔ mɛ ɖo, e ma gɔ nyi míye wɛ blo onu ɖe wɛ e vɛ na mi gɛ. Ɖo onu lilo mɛ ni nɔ ɖi ɖe na Mawu jlo ɖo ha, nɔ hɛn lɛnvɔjɔ xeni nɔ kplan omɛ do yi hwlɛngan mɛ do wa, wɛ e mɔ nɔ gɔ vɛ na o mɛ gɛ. ¹⁰ Onu lilo xena ogbɛ mɛ fi xe nɔ hɛn do wa, nɔ kplan o mɛ do yi oku; ¹¹ Mi kpɔn,akpakpa xena onu lilo mɛ ni nɔ mɛ xena Mawu jlo nɔ hɛn do wa na mi.Onu lilo xemɛ na mi nɔ nɛ mi hwlɛn ota mitɔn e bo na na e vɛ na mi,bo do obu na mi,mi ɖo ojlo nywɛ a bo do kpɔn-un,zozo a do wa onu bo le,mi bo ɖo ojlo a do dɔn oto na omɛ.Miɖe sɔ xlɛ le omɛ kpokpo we nukun mɛ ɖɔ miye lɛye bo mɛ le oxo e nɛ lɔ mɛ. ¹² E wɛzɔn,onu xena un wlan ɖoxlan mi e ma nyi omɛ xeni hu ohwɛ alo omɛ xena ye hu ohwɛ do mɛ zɔn gɛ.Vɔ,na akpakpa xena mi ɖo na mi a do yi ɖiɖexlɛ le cɛncɛn mitɔn le Mawu we nukɔn wɛzɔn. ¹³ E nɛ lɔ wɛzɔn na mi do mɔ akɔn fifa.Gɔ do gbɔn ovo na akɔnfifa nɛ lɔ,mi gɔ mɔ jijwɛ taŋu do jijwɛ xemɛ na Titu le go,ɖo mi mɛ kpokpo na na ayixa etɔn jɛ odo. ¹⁴ Ɖo un nɔ mi do ɖo anya le nukun mɛ etɔn.Mi nɔ kpɔn do ŋunya-un gɛ.Vɔ,ɖi ɖena mi nɔ ɖɔ oxojɔxo na mi le tɛgbɛ ɖo ha, anya xena mi nɔ sɔ mi do ɖo le Titu de,e mɔ-ɛ do e ji. ¹⁵ Na e ɖo nukun ɖena mi se otonu ɖo,bo flin ɖena obu jɛ mi ji,mi bo sisɔ bo do yi-i,onu mitɔn nɔ gɔ wle ayixa ni-i taŋu. ¹⁶ E yi jijwɛ na-un taŋu ɖo un hɛn na ɖe oji do mi go le onulɛ kpokpo mɛ.