¹ Mi le gbaza mɛ le anyizan ji.E ci ɖi oxɔ ha,bo na gba gbelokpo.Vɔ mi nywɛ ɖɔ mi bo ɖo oxwe ɖe le jinukunsin wɛ e mɔ nɔ gba gɛ.Mawu wɛ gba oxwe lɔ. ² Odin,mi le jlo kpo hɔnhlɔn mi tɔn kpo bo na do nɔ oxwe mitɔn lɔ gbe le oji. ³ Na mi nɔ oxwe oji tɔn lɔ mɛ,Mawu ma jaan mɔ mi le govɛ gɛ. ⁴ Hwenu xe mi nɔ le oxwe mitɔn xe le anyizan ji lɔ gbe,e nɔ ciɖi agban kpinkpɛn ɖe ha,wɛ mi nɔ sa vo.Oxojɔxo wɛ,mi ma jlo na jo gbaza mitɔn do gɛ. ⁵ Mawu wɛ sɔnu na mi do ogbɛ nɛ lɔ go.Gbigbɔ ɖedovo wɛ nyi onywɛ tintan tɔn xe e na mi lɔ. ⁶ Oji ɖe mi,vɔ mi nywɛ ɖɔ mi bo dɛn le Mawu go le gbaza mitɔn mɛ. ⁷ Vɔ,mi ɖinu wɛ mi ma ka ma wo mɔ nuti ge. ⁸ Ɛɛ,mi ɖe ji,wɛ mi jlo na tɔn le gbaza xe mɛ bo na do yi nɔ Aklunɔ de. ⁹ Vɔ onu tintan xe mi jlo wɛ nyi,mi na nyɔ le nukɔn na Mawu le hwenu xe mi le gbaza mɛ,alo mi jo gbaza lɔ do. ¹⁰ Mi mɛ kpokpo ɖo na ze miɖe xlɛ le Jesu we hwɛɖɔxo nukɔn.Wɛ ye na da hwɛ na mɛ lokpo-lokpo do nu xe e wa le anyizan lɔ ji go. ¹¹ Mi nyɔ gɔnmɛ na buɖisi na Mawu kpo jiɖiɖe kpo.E wɛzɔn mi le din na dɔn omɛye wa omɔ lɔ ji.Mawu nyɔ mi ganji,wɛ un nyɔ mye can nyɔ mi ganji. ¹² Mi ma din na gɔ jɛ nukɔn gɛ,vɔ mi jlo ɖɔ mi na jawa ɖo mye wutu.Mi hɛn mi na gbɛ nu na omɛye ɖo nu xeye nɔ kpo nukun kpo wɛ oji mɔ nɔ mɔ gɛ go. ¹³ E nyi mi jɛ ha,Mawu wɛzɔn,na mi iɖɔ xo ganji mye,tɔn wɛ e nyi. ¹⁴ Wannyiyi Jesu tɔn nɔ gɔ ayixa mitɔn mɛ hwenu xe nɔ lin ɖɔ:"Mɛ lokpo kun do otamɛ na omɛ lɛye kpokpo,Klisi wɛ.Omɛ kpokpo le oku etɔn mɛ. ¹⁵ E ku do otamɛ na omɛ lɛye kpokpo.E wɛzɔn mɛ le gbɛ lɛ,ye le ogbɛ na Jesu xe ku do ota yetɔn mɛ,bo gɔ fɔn sɔn oku. ¹⁶ E wɛzɔn mi ma gɔ nyɔ omɛ ti ɖo alɔkpa gbɛtɔ tɔn ji gɛ.E nyi mi nyɔ Klisi lɔ ɖo alɔkpa e nɛ ji san lemɔha,mɛ mi gɔ nywɛ do odin gɛ. ¹⁷ E wɛzɔn na mɛɖe ɖo Klisi,e tlɔ zun omɛ yɔyɔ.Onu xoxo lɔ vɔ,wɛ onu yɔyɔ lɔ yi tɛnmɛ. ¹⁸ Mawu de wɛ onu e nɛ lɛ kpokpo sɔn,e ca mi gbɔn Klisi mɛ,bo ɖɔ mye ni bo la kancica e nɛ lɔ. ¹⁹ Ɛɛ,Mawu wɛ ca xa ogbɛ lɔ gbɔn Klisi mɛ.E ma gɔ kpɔn gbɛtɔye we ohwe gɛ,wɛ e ɖɔ mye ni bo la kancica llɔ we oxo lɔ. ²⁰ Klisi dali wɛ mi nɔ ɖɔ xo lɔ,le oxojɔxo mɛ,Mawu tesu wɛ nɔ ɖɔ xo gbɔn mye mɛ.Le Jesu nyikɔ mɛ,mi yi gbe na kancica Mawu tɔn lɔ.Mi le byɔ mi e nɛ lɔ kpo hɔnhlɔn kpo. ²¹ Klisi ma ɖo ohwɛ osangɛ,vɔ Mawu ze ohwɛ mi tɔn lɛ ɖo alɔmɛ ni.Mawu klan mi zun we gbɔn Jesu dali.