¹ Anɛyevi lɛye, na do yi vivɔnu, mi kplan mi ɖena mi na zan ogbɛ mitɔn ɖo a bo do nyɔkpɔn na Mawu, wɛ mi ka o le blo de ji, vɔ odin mi le byɔ mi xɔn, bo le do zozo namɛ na mi xɔn le Aklunɔ Jesu we nyikɔ mɛ dɔ mye ni bo ɖo nukɔn yiyi le mɛ. ² Ɖo okplan ni sɔn Aklunɔ Jesu de, mi o kplan mi wɛ mi o nyɔ-ɛ. ³ Onu xena Mawu jlo wɛ nyi ɖɔ mi a zan ogbɛ mimɛ, a bo nɔ kpɔn zan ogbɛ ɖuɖu gɛ. ⁴ Lokpo-lokpo mitɔn ɖo na nyɔ ɖena e na ɖu le gbaza etɔn ji ɖo le mimɛ kpodo yɛyi kpo mɛ. ⁵ Ni nɔ kpɔn wa jo eɖe do na ojlo nyinylan lɛye gɛ ɖi ɖena kosi lɛye, omɛ ni ma yi Mawu gɛ lɛye nɔ blo ɖo ha. ⁶ Le oxo xe mɛ, omɛ ti ni nɔ kpɔn wa onu nyinyla ɖe do nɔvyɛ a lo a bo blɛ nɔvyɛ ɖu gɛ o, ɖo Aklunɔ lɔ ba hlɔn do onu nɛ lɛye sese nu, ɖi ɖena mi o ɖɔ-ɛ bo do kpɛn e ji ɖo na mi ha. ⁷ Ɖo Mawu ma ylɔ mi na mi na do zan ogbɛ ɖuɖu gɛ, amɔ e ylɔ mi na mi a do zan ogbɛ mimɛ. ⁸ E wɛ zɔn na omɛ ɖe gbɛ okplan nɛ lɛye, gbɛtɔ mɛ e gbɛ gɛ vɔ Mawu xeni nɔ na mi gbigbɔ mimɛ etɔn wɛ e gbɛ. ⁹ Xeni kan wanyinyi na omɛ nɔvyɛ le yise mɛ, e ma jɛxa ɖɔ ye na gɔ wa wlan nu dego na mi gɛ, ɖo mye tesu o kplan sɔn Mawu ɖe, ɖena mi na nyi wan na mye tesu ye ɖo. ¹⁰ Wɛ mi o le blo do yi nɔvi yisenɔ ni le Masedwani lɛye sese ɖe. Vɔ anɛyevi lɛye, mi gɔ le do kpakpa namɛ na mi ɖɔ mye ni bo blo de ji. ¹¹ Onu ni le hun ji na mi wɛ nyi ɖɔ fifa ni a nɔ mi mɛ, omɛ lokpo-lokpo bo na kpe nukun do onu etɔn ye go, a bo wa ozɔn kpodo alɔ etɔn kpo ɖi ɖena mi byɔ sɔn mi si ɖo ha. ¹² E nɛ, omɛ xeni ma nyi yisenɔ lɛye gɛ na do ɖo sisi na mi do wa lɔ mitɔn lɛye go, wɛ mi ma gɔ le nyi agban le kɔ na mɛ ɖe gɛ. ¹³ Nɔvi yisenɔ lɛye mi ma jlo ɖɔ mi na nɔ manyɔ-ɛ mɛ do omɛ xeni o ku lɛye go gɛ. E nɛ mi ma gɔ do le ci onu lilo mɛ ɖi omɛ gbokpwe ni ma ɖo mɔji kpikpɔn lɛye ha gɛ, ¹⁴ Xena mi kan de ji ɖɔ Jesu bo ku bo gɔ fɔn, lemɔhake wɛ mi gɔ kan de ji ɖɔ do gbɔn Jesu lɔ ji, Mawu na fɔn omɛ xeni o ku ye wɛ ye na do wa nɔ kpɔ xa Jesu lɔ. ¹⁵ Mikpɔn, ɖena Aklunɔ lɔ ɖɔ-ɛ ɖo, e ɖye mye can le ɖɔ-ɛ na mi; mi mɛ xeni na le gbɛ le hwenu na Aklunɔ na wa, mi ma le jɛ nukɔn na omɛ xeni o ku lɛye gɛ. ¹⁶ Ɖo hwexenu na ogbe ɖe na ɖi, Mawu we wɛnzangun lɛye we oga na da xwa, Mawu we ahwan kpɛn na ɖi, wɛ Aklunɔ lɔ tesu na jɛte sɔn sɛxwe, e nɛ wɛ omɛ xeni o ku le Klisi mɛ lɛye na fɔn jɛ nukɔn. ¹⁷ E nɛ godo, mi mɛ xeni na le gbɛ le hwenɛnu lɛye, ye na kɔ mye kpodo e kpo do sɔn yi sunwɔ mɛ, a bo do wa yi kpe Aklunɔ lɔ le jɛhɔnmɛ wɛ mi na le kpɔ xa Aklunɔ lɔ tɛgbɛ. ¹⁸ E wɛ zɔn, mi do hɔnhlɔn na mɛ na miɖe lɛye kpodo oxo xe lɛye kpo.