¹ E we zon xeni tre kaka e bo glo, mi gbɔ wa sɔ gbeta ɖɔ mye kɛlɛ a bo ci Atɛnu. ² Mi bó sɔ́ mye nɔvi timɔte xeni le wa ozɔn kpodo Mawu kpona klisi we wɛn ɖagbwɛ lɔ jijla sɔ xɔ ɖo do xlan mi, wɛ enù dó ná ná mí na ɖi kyɔn, a bo gɔ dó ɖó kpakpa na mɛ na mi le yise mɛ. ³ E nɛ, ofunkpikpe xe mɛ na mi gbɔn lɛye ma gɔ dó le hun hun mɛ ti gɛ. Ɖo mye tesu mi nyɔ-ɛ ɖɔ e nɛ lɔ bɛ myé bo le na. ⁴ Hwexenu na mi le miɖe, mi o ɖɔ ɖa nyi na san ɖɔ ofunkpikpe bó ɖó na wá, E wɛ wa jɔ mi bo nyɔ-ɛ. ⁵ E wɛ zɔn xena un ma kpego na tre gɛ, un sɔ timɔte ɖo hlan ná ni dó wa kpɔn ɖena mi le ɖo le yise lɔ mɛ. Un le ɖibu san ɖo tanyɔ omɛtɛnkpɔtɔ lɔ kɛ wa tɛn mi kpɔn jaa, na tagba ná mi jɛ lɔ dó nyi vɔvɔ jáa ! ⁶ odin wɛ timɔte lɔ lɛkɔ wa miɖe, bo hɛn owɛn ɖagbwɛ ɖo ja dó yise mitɔn kpódó wanyinyi mitɔn utu. E ɖɔ ɖɔ mye bó nɔ nɔ le ɖó nukun mi xɔn tɛgbɛ kpódó wanyinyi kpo, bo gɔ le jló na lɛkɔ wa kpɔn mi ɖi ɖena mye can mi nɔ jlo ɖo há. ⁷ Anɛyevi yisenɔ lɛye, le vivɛsise mitɔn kpódó ofunkpikpe mitɔn lɛye kpókpó mɛ, mi mɔ akɔnfifa dó yise mitɔn we óxó na mi se lɛye mɛ. ⁸ Xena mi le te gliŋu le Aklunɔ lɔ mɛ, hɔnhlɔn gɔ hɔnhlɔn ji ná mi. ⁹ Oji le jɔ mi xɔn dó le Mawu mitɔn we nuku mɛ kaka mi ma nyɔ ɖena mi na dó okpɛ etɔn dó na Mawu gɛ. ¹⁰ Okle kpódó ozan, mi nɔ le ɖɛ xɔn ganmɛ-ganmɛ na Mawu, e nɛ mi na dó kpego dó kpɔn nukumɛ mitɔn a bo dó sɔ o nu ni hwedo mi le yise mɛ sɔ xɔ kpe-e na mi. ¹¹ Mawu mitɔn kpódó aklunɔ Jesu mitɔn lɔ ni kpɔ xa mi kaka mi a wá miɖe. ¹² Wanyinyi xena mi ɖo na miɖe kpodo hena mi ɖo omɛ lɛye sese, Aklunɔ lɔ ni bló na ni a jɛ e ji gbɔn a zɛ ego ɖi ɖena mye can mi nyi wan na mi ɖo ha. ¹³ E nɛ, Aklunɔ na bló wɛ oji mitɔn na lido, wɛ mi na do zan ogbɛ mimɛ, wɛ ofɛn ɖe ma do wa le nɔ mi go le Mawu mitɔn lɔ we nukɔn le hwenu na Aklunɔ Jesu mitɔn lɔ na wá kpódó omɛ ɖe do vo etɔn lɛye sese kpo.