¹ Nɔvi yisenɔ lɛye, xeni kan azan alo hwenu na onu lɛye na wa jɔ, e ma jɛxa ɖɔ mi na wa wlan nu dego na mi gɛ. ² Ɖo mye tesu mi nyɔ-ɛ ganji ɖɔ Aklunɔ lɔ we azan bo na wa wa le davo mɛ ɖi ɖena ajotɔ nɔ wa ɖo ha. ³ Hwexenu na gbɛtɔ lɛye na le ɖɔ xɔn ɖɔ fifa bo le, ayi bo jɛ do na omɛ ye hwenɛ nu wɛ onu ni nɔ vɔ kun na mɛ na jɛ ye ji davo mɛ ɖi ɖena ovi jiji we vivɛsise nɔ jɛ xoxonɔ ji ɖo ha, wɛ ye ma kpego na si le e nu gɛ. ⁴ Vɔ nɔvi yisenɔ lɛye, mye mi ma le zinvlu mɛ na azan nɛ lɔ na do wa cɔ mi le davo mɛ ɖi ɖena ajotɔ nɔ wa ɖo ha gɛ. ⁵ Mi mɛ kpokpo weziza we vikpɛ lɛye wɛ mi nyi, bo nyi okle vikpɛ lɛye. Mi ma nyi ozan tɔn kaka do nyi zinvlu tɔn gɛ. ⁶ E wɛ zɔn, mi nɔ kpɔn da mlɔn ɖi omɛ gbokpwe ɖyɛ lɛye ha gɛ, vɔ mi a nɔ nukle a bo nɔ wa nu do ojlɛ ji. ⁷ Omɛ xeni nɔ dɔ amlɔn lɛye, ozan mɛ wɛ ye nɔ dɔ amlɔn le, wɛ omɛ xeni nɔ nu ahan mu lɛye nɔ nu le zan mɛ. ⁸ Vɔ mi mɛ xeni nyi okle tɔn lɛye, mi a nɔ wa o nu do jlɛ ji, wɛ yise kpodo wanyinyi na nyi ganwu wɛ mi na nɔ sɔ xɔ do, hwlɛngan we nukunɖiɖo bo na nyi gangba wɛ mi na sɔ xɔ cɔn. ⁹ Ɖo Mawu ma da mi na xomɛsin etɔn a do jɛ mi ji gɛ, vɔ e da mi na mi a do mɔ hwlɛngan gbɔn Aklunɔ mitɔn Jesu lɔ ji, ¹⁰ Eyɔ xeni ku do ta na mi, e nɛ, na mi le gbɛ o, mi ku o, mi na do wa nɔ gbɛ xɛ. ¹¹ E wɛ zɔn mi do kpakpa kpodo hɔnhlɔn namɛ na miɖe lɛye le yise mɛ ɖi ɖena mi o le blo ɖo xɔn ha. ¹² Nɔvi yisenɔ lɛye, mi le byɔ mi xɔn ɖɔ mye ni bo ɖo sisi na omɛ ni le mi mɛ bo le jɛ tagba lɛye xɔn, bo le gɔkɔ na mi le Aklunɔ mɛ, bo le kplan onu mu lɛye. ¹³ Mi ɖo sisi ɖaxo na ye, a bo nyi wan na ye do ozɔn utu. Mi nɔ fifa mɛ xa miɖe lɛye. ¹⁴ Nɔvi yisenɔ lɛye, mi le byɔ mi xɔn ɖɔ mye ni bo gbɛ onu na aɖiɖɔnɔ lɛye, a bo do hɔnhlɔn namɛ na omɛ xena awu ku lɛye, mi gɔ alɔ na omɛ xeni gbɔjɔ lɛye, mi bo na nɔ ze ayi do do na omɛ sese. ¹⁵ Mi cɔ miɖe na mɛti ni nɔ kpɔn nɔ ze nyinylan do su nyinylan xɔ gɛ, amɔ mi din ɖagbwɛ na miɖe tɛgbɛ kpo omɛ lɛye sese kpo. ¹⁶ Mi nɔ awa jijɛ mɛ tɛgbɛ. ¹⁷ Mi nɔ xoɖɛ le gan ɖekpekpe mɛ. ¹⁸ Le onu ɖekpekpe mɛ mi nɔ do kpɛ na Mawu do onu xena e jlo na mi le Jesu Klisi lɔ mɛ utu. ¹⁹ Mi nɔ kpɔn nɔ ci gbigbɔ mimɛ we ozo lɔ gɛ. ²⁰ Mi nɔ kpɔn nɔ do vɔnu na ɖɔɖanyi lɛye gɛ. ²¹ Vɔ mi nɔ gbeje onu lɛye sese kpɔn a bo nɔ hɛn onu ni jɔhun lɛye go. ²² Mi gbɔn akpa na onu nyinylan ɖekpekpe. ²³ Mawu xeni nɔ na fifa mɛ, eyɔ tesu ni na na mi na nyi omɛ ɖe do vo etɔn butebu, ni hɛn gbigbɔ mitɔn, okla mitɔn, gbaza mitɔn, na ofɛn ti ni nɔ kpɔn do wa le mi go hwexenu na Aklunɔ Jesu mitɔn na wa lɛ kɔ wa. ²⁴ Gbeji nɔtɔ wɛ nyi omɛ ni yɔ mi lɔ, eyɔ ke wɛ na gɔ blo-e. ²⁵ Nɔvi yisenɔ lɛye, mi nɔ xo ɖɛ do ta na mye can gba. ²⁶ Mi do gbe na nɔvi yisenɔ lɛye sese bo kisi na miɖe lɛye ɖi nɔvi le yise mɛ ɖo ha. ²⁷ Le Aklunɔ lɔ we nyikɔ mɛ, un le byɔ mi xɔn ɖɔ mye ni bo xlɛ hwema xe lɔ na nɔvinɔ ni le yise mɛ lɛye sese. ²⁸ Aklunɔ mitɔn Jesu Klisi we fɛnu ni nɔ kpɔ xa mi.