¹ Ɖo Klisi ji oya le agbaza mɛ wutu, mi do wusyɛn lanmɛ na miɖe lɛye, bo ɖo ninɔmɛ ɖokpo lɛye do ayixa mitɔn mɛ, ɖo omɛ xe do oji le agbaza mɛ, ohwɛ huhu ma gɔ yi etɔn gɛ. ² E nɛ, ogbɛ xeni kpɔ na ye na zan la agbaza mɛ, e ma gɔ le ogbɛ le ojlo lɛye mɛ gɛ, e na zan ogbɛ etɔn gbɔn Mawu we ojlo mɛ. ³ Ɖo, le osan, mi zan oganxixo susu bo do blo onu xeye ni ma sɔ gbe gɛ, mi bo jo miɖe do na ogbɛ ɖuɖu zinzan, ojlo nyinylaye, ahannunu hu gan, yɔhwe sinsɛn, onu xyawu wɛ nyi e nɛ leye. ⁴ Odin, e wa le kpaca ye xɔn ɖɔ mi ma gɔ le zan ogbɛ ɖuɖu zɛ ojlɛ go xɔn gɛ, i wɛ ye nɔ do le kɔn acɔn do mi go xɔn. ⁵ Amɔ, ye na wa ɖo ogbe etɔn le nukɔn na omɛ xeni le ogbesisɔmɛ a do ɖo ohwɛ na omɛ xeni le ogbɛye kpodo omɛ xeni o ku lɛye. ⁶ E nɛ lɔ wɛ na zɔn wɛ owɛn ɖagbe lɔ na gɔ yi jijla na omɛ kukuye can, e nɛ xena ye gbɔn ohwɛɖiɖɔ Mawutɔn mɛ do onu xeye na ye blo le agbaza mɛ go vɔ, ye na wa nɔ ogbɛ dogbɔn gbigbɔ mɛ ɖi ɖena Mawu lɔ jlo ɖo ha. ⁷ Onu lɛye sese we vivɔnu o wa, e wɛ zɔn, mi ɖe onuywɛtɔ we afɔ, a bo nɔ aceji, mi bo na do kpego do xo oɖɛ. ⁸ Onu xeni le vivɛɖe hugan onu lɛye sese wɛ nyi, mi ɖo owan nyinyi ɖaxo na miɖe lɛye, owan nyinyi nɔ cɔn onu do onu nyinyla susu ji. ⁹ Mi nɔ yi jonɔ miɖe lɛye tɔn, mi nɔ kpɔn hlun onu do onu mɛ do blo gɛ. ¹⁰ Onu nina omɛ lokpo-lokpo xena mi yi sɔn Mawu de, mi zan a bo do kpe nukun do omɛ gbokpwe e go, e nɛ mi na yi onuji kpɔntɔ dagbwɛ na Mawu we onu nina hamɛ-hameye. ¹¹ Na omɛ ɖe le ɖɔ oxo xɔn, ni nyi oxo xena Mawu zɔn-ɛ ɖɔ ni bo ɖɔ, e nyi omɛ ɖe le wa Mawu we ozɔn xɔn, ni wa ozɔn lɔ kpo hɔnhlɔn xena Mawu ni-i lɔ kpo, ye bo na nɔ do do gigo na Mawu le onu lɛye sese mɛ dogbɔn Jesu Klisi ji, etɔn wɛ nyi gigo kpodo acɛ kpikpa kaka do yi mavɔ-mavɔ. Ami. ¹² Nɔvi vɛna-vɛnaye didokpɔn xe mɛ na mi le gbɔn xɔn, bo nyi ozo ɖaxo xeni le bi mi xɔn, ni nɔ kpo kpaca do mi mi a sɔ do mɔ onumajɔ kpɔn gbeɖe gɛ. ¹³ Na e na nyɔ, mi kpɔn jijwɛ ɖɔ mi ɖo mima le Klisi we ayaɖuɖu mɛ, e nɛ miye can bo na wa mɔ jijwɛ ɖaxo le hwexennu na e na wa ɖe gigo etɔn sɔ xlɛ omɛ lɛye sese kpo. ¹⁴ Na e nyi ɖɔ ye zun mi do Klisitɔn xena mi nyi wutu, be mi bo nyi nyɔnanɔye, ɖo gigo we gbigbɔ lɔ, Mawu we gbigbɔ lɔ le mi ji. ¹⁵ E le lemɔha co, aya ɖuɖu mitɔn ni nɔ kpɔn sɔn omɛ huhu alo ajo jijɛ, alo onu nyinyla wiwa alo onu dido omɛ bu we oxo mɛ gɛ. ¹⁶ Vɔ na e nyi ɖɔ omɛ ɖe le ɖu aya xɔn ɖo iysenɔ xena e nyi wutu, ni nɔ kpɔn ku ŋunya ni-i gɛ, ni do okpɛ na Mawu do nyikɔ e nɛ xeni le e go lɔ wutu. ¹⁷ Ɖo, ogan lɔ le xo xɔn na ohwɛ dida lɔ a do bɛ, omɛ xeye ni le Mawu we oxwegbeye ji wɛ e na bɛ sɔn, vɔ na e nyi ɖɔ miye ji wɛ e na bɛ sɔn, nɖe wɛ omɛ xeye ni gbɛ otonu sise na Mawu we owɛnɖagbe lɔ tɔn na wa nyi ɖo le vivɔnu? ¹⁸ Na e nyi ɖɔ e ma fa ke hwɛ kpo omɛ jijwɛ do mɔ hwlɛngan lɔ, naɖe wɛ e na wa nyi ɖo na sisi ma ɖo na Mawu tɔ ye kpodo onu nyinyla wa tɔye kpo? ¹⁹ E wɛ zɔn omɛ xeye ni le ɖu aya xɔn do Mawu we ojlo na ye le blo xɔn wu, ye ni ɖo nukɔn yiyi le onywɛ wiwa yetɔn mɛ, a bo sɔ yeɖe sɔ do asi na ogbɛdatɔ xeni nyi ogbeji nɔ tɔ lɔ.