¹ Mi omɛ nyɔnusi can,mi sɔ miɖe sɔ hwwe na miye su lɛye,e nɛ na omɛ ɖe lɛye mɛ bo ɖɔ miye lɛye bo ma le setonu na Mawuxo lɔ xɔn gɛ,walɔ jijɔhun yesi lɛye tɔn ni hwlɛn ye gan,e ma gɔ ɖɔ oxo ɖe ɖiɖɔ hwɛkpo gɛ, ² ɖo ye na nɔ kpɔn walɔ mitɔn jɔhun bo ɖo sisi ɖo. ³ Acɔ ɖiɖo mitɔn ni nɔ kpɔn nyi goto jijlaɖo tɔn xeye ni nyi oɖa biblaye,sikanuye,awu jijɔhun ye dido gɛ, ⁴ vɔ mi din acɔ ɖiɖo oji mɛtɔn xeye ni le hwihwla bo mɔ nɔ gble gɛ e wɛ nyi xomɛnywɛ kpodo fifa ayixa mɛtɔn,e nɛ lɔ wɛ vɛ kɔbɔ le nukunmɛ na Mawu. ⁵ Lemɔha wɛ nyɔnusi osan tɔn xeye nɔ ɖo sisi na Mawu,bo nɔ sɔ nukun ɖiɖo yetɔn sɔ ɖo Mawu ji lɛye nɔ ɖo acɛ ɖo nɛ,bo nɔ sɔ yeɖe sɔ hwe na yesu lɛye, ⁶ lemɔha wɛ Sala nɔ setonu ɖo na Ablaxamu a bo yɔ-ɛ ɖɔ Aklunɔ.Na mi le blo onu jijɔhun xɔn bo ma jo miɖe do na onuti do obu na mi gɛ,be mi bo tlɔ zun vikpɛ etɔn nyɔnusi lɛye. ⁷ Mi omɛ nyɔnusuye mi,mi zan okpɔ ninɔ we ogbɛ kpo onugɔnmɛ sise tɔn kpo xa miye si lɛye,a bo nyɔ-ɛ ɖɔ nyɔnusiye bo ma ɖo hɔnhlɔn ɖe gɛ.Mi do yɛyi na ye,ɖo miye kpo ye kpo wɛ yi fɛnu ogbɛ tɔn lɔ,e nɛ onuɖe ma gɔ le glɔn omɔ na mi xɔn le oɖɛxixo mitɔn mɛxɔn gɛ. ⁸ Mi do vɔ-ɛ,omɛ kpokpo ni ɖo ayixa lokpo nukunmɛ,linlin lokpo,mi yi owan na miɖe ɖi nɔvi-nɔvi ha,a bo nɔ nyɔ xomɛ do miɖe go,mi nɔ sɔ miɖe hwe na miɖe. ⁹ Mi nɔ kpɔn sɔ nyinyla do su nyinyla we axɔ gɛ,mi bo nɔ kpɔn sɔ ozun do su ozun we axɔ gɛ,onu xeni na nyɔ,e wɛ nyi ɖɔ,mi xo oɖɛ fifa tɔn na omɛye,ɖo e nɛ lɔ wɛ ye yɔ mi na, e nɛ mi na do yi dona. ¹⁰ Oxo Mawutɔn ɖɔ mɔsin,le oxojɔxo mɛ,na omɛ ɖe jlo na ɖu vivi ogbɛtɔn,bo din ɖɔ ogbɛ miye tɔn a bo nyɔ,ni jo oxo nyinyla ɖiɖɔ do,a bo jo awo ɖiɖo do, ¹¹ Ni gbɛkɔ sɔn onunyinyla biblo go a bo tɛ do onu jijɔhun biblo go,ni nɔ din fifa a bo do vivɛnu le e mɛ; ¹² ɖo nukun Mawutɔn nɔ le omɛ jijlɔ lɛye ji,oto etɔn bo nɔ le ogbesisɔ mɛ a do se oɖɛxixo yetɔn. ¹³ Mɛha wɛ ka na do ohwɛ na mi na bi ozo le onujijɔhun biblo mɛ? ¹⁴ Na e gɔ do nyi ɖɔ mi na ɖu aya do onu jijɔhun biblo,wutu can,be nyɔnanɔ wɛ mi nyi.Mi nɔ kpɔn tlɛ ɖi obu na ye gɛ,gbɛ oji mitɔn ni nɔ kpɔn gbado gɛ; ¹⁵ Vɔ,mi ɖo sisi na Klisi lɔ ɖi Aklunɔ ha le oji mitɔn mɛ,mi nɔ ogbesisɔ le hweɖekpokpwe nu a bo do ɖexlɛ ɖɔ ohwɛ mitɔn bo jɔ le omɛɖekpokpwe we nukɔn,hwexenu na ye kan oxo mi se do nukunɖiɖo xena mi mɔ lɔ go, ¹⁶ vɔ mi blo-e kpo xomɛ nywɛ kpo sisi ɖiɖo na omɛ kpo,a bo ɖo ayixa jijɔhun,e nɛ onu xe go na ye nɔ do ohwɛ na mi lɛye,a bo le zun mi xɔn,gbɔn gbɛzan yisetɔn mitɔn mɛ,ŋunya na do nyi yetɔn. ¹⁷ Le oxojɔxo mɛ,na e nyi ɖɔ ojlo Mawu tɔn wɛ,e jɔhun na ye a do ɖu aya le onu jijɔhun biblo we otamɛ hugan ye a ɖu aya do onu nyinyla biblo we otamɛ. ¹⁸ Ɖo Klisi lɔ tesu hwlalokpo gee,wɛ e vɔ do ohwɛhuhu gbɛtɔye tɔn wutu,e yɔ xeni ma hu ohwɛ ti gɛ vɔ bo ku do ohwɛhutɔye we otamɛ bo do dɔn mi do wa na Mawu,ye hu-i le agbaza mɛ,vɔ e xlɔ wa ogbɛ le bigbɔ mɛ, ¹⁹ gbigbɔ lɔ ji wɛ e gbɔn bo do wa yi owɛnɖagbe lɔ na gbigbɔ xeye ni le ogankpamɛ ye, ²⁰ yee wɛ nyi omɛ xeye ni gbɛ tonu sise na Mawu lɛye le osan le hwexenu na Nɔwe le ta aklo ɖaxo lɔ xɔn,Mawu nɔ ote kpɔn ye taŋu co ganco,omɛ ovuɖe jan wɛ wa ɖiyɛ aklo ɖaxo lɔ mɛ,ye omɛ cantɔn wɛ gan le otɔ gigɔo lɔ mɛ. ²¹ Otɔ nɛ lɔ nyi onu jlɛ do Mawu we osin lilɛ xeni hwlɛn mi gan le odin go,e ka ma nyi ɖɔ Mawu we osin lilɛ lɔ mɛ nɔ ɖe oɖu sɛ le gbaza go gɛ,vɔ ogbeta sisɔ na Mawu kpo ayixa jijɔhun wɛ,osin lilɛ lɔ bo le hwlɛn mi gan xɔn le odin gbɔn finfɔn sɔn oku Jesu Klisi tɔn mɛ, ²² e sɔn yi sɛxwe bo le aɖusimɛ na Mawu,e wɛ wɛnzangun Mawutɔn lɛye kpodo acɛkpikpa lɛye,kpo hɔnhlɔn lɛye kpokpo le agɔ na.