¹ Mi jo danuwiwa ɖekpokpwe do,a bo jo ahizi ɖekpokpwe do,yɛmɛnu biblo,awu hwihwan kpo omɛxo ɖiɖɔ ɖekpokpwe do, ² ɖi ɖena ovi xeye na ye ovi yɔyɔ nɔ din anɔsin gbigbɔ mɛtɔn mimɛ Mawuxo lɔ tɔn,e nɛ gbɔn e ji mi na hwɛn a bo mɔ hwlɛngan, ³ ɖo mi o ɖɔ ɖena Mawu lɔ nyɔ kpɔn ɖo. ⁴ Mi sɛkpɔ-ɛ,e yɔ wɛ nyi okpɛn gbɛɖe-gbɛɖe xena gbɛtɔye gbɛ,vɔ Mawu bo can-ɛ e bo nyi onu xeni vɛ kɔbɔ le nukunmɛ ni-i; ⁵ miye can ɖi okpɛn gbɛɖe-gbɛɖe ha,mi na na ye a sɔ mi do gba oxɔ gbigbɔ mɛtɔn,a bo avɔsantɔye we otogun mimɛ,e nɛ mi na do blo avɔsinsan gbigbɔ mɛtɔn xeni na nyɔ an Mawu gbɔn Jesu Klisi ji. ⁶ Ɖo oxo xena ye Mawuxo lɔ mɛ ɖiye:Okpɛn cincan xeni vɛ do kɔbɔ,wɛ un na sɔ ɖo xɔ Syɔn,e bo nyi azwe ji we okpɛn;omɛ xeni na ɖi onu ni-i,bo na kan do e ji,ma le ɖu ŋunya xɔn kpɔn gbeɖe. ⁷ Mi omɛ xeye kan do e ji lɛye,okpɛn nɛ lɔ okpɛn xeni vɛ do kɔbɔ taŋu na mi,vɔ,na omɛ xeye ni ma kan do e ji gɛ lɛye,e nyi okpɛn xena oxɔgbatɔ gbɛ ɖo anyi,wɛ wa tlɔ zun azwe ji we okpɛn, ⁸ Ye gɔ wlan le fibu,okpɛn xena ye nɔ klɛn a bo jɛ anyi wɛ e nyi,okpɛn ɖaxo xeni sɔ omɛ sɔ xu anyi wɛ e nyi;ye nɔ klɛn-ɛ ɖo ye gbɛ otonu sise na Mawu we oxo lɔ,e nɛ lɔ wɛ ye o le anyi na . ⁹ Vɔ,miye okunkan cincan wɛ mi nyi,avɔsantɔ xɔlutɔn,otogun mimɛ,bo nyi otogun ɖe ɖo ovo Mawutɔn,e nɛ na mi a do jla omɛ xeni yɔ sɛ le zinvlu mɛ do wa weziza adodwe etɔn mɛ,we ozɔn jijɔhun lɛye, ¹⁰ le osan,mi ma nyi otogun Mawutɔn gɛ,vɔ odin otogun etɔn wɛ mi nyi,Mawu ma kpɔn dɔŋuɖunu na mi le osan gɛ,vɔ odin e kpɔn dɔŋuɖunu na mi. ¹¹ Anɛyevi vɛna-vɛna ce lɛye mi,jonɔ kpodo ohwɛn zɛtɔye wɛ mi nyi le anyizan ji,un le byɔ sɔn mi si xɔn,mi nɔ kpɔn ɖi ke na ojlo agbaza tɔn xeye ni nɔ fun ahwan xa alindɔn lɛye ɖu le mi ji gɛ o. ¹² Mi zan walɔ jijɔhun le kosi lɛye cɛncɛn,e nɛ,na ye gɔ do le do ohwɛ na mi xɔn ɖɔ miye e bo le blo onu nyinyla xɔn can,ye na mɔ walɔ jijɔhun mitɔn a bo kpa gigo na Mawu le hwexenu na Mawu na wa din ye kpɔn. ¹³ Mi sɔ miɖe sɔ hwe na acɛkpikpa ɖekpokpwe gbɛtɔye tɔn,mi sɔ miɖe sɔ hwe na xɔlu,e yɔ lɔ wɛ kpacɛ do onu kpokpo ji, ¹⁴ mi sɔ miɖe sɔ hwe na otokplantɔye can,ɖo xɔlu lɔ wɛ zɔn ye ɖoxlan na ye a do dɔn oto na onunyinyla blotɔye a bo kanfu omɛ xeye ni nɔ blo onu jijɔhun ye. ¹⁵ Ojlo Mawutɔn wɛ nyi ɖɔ mi na nɔ blo onu jijɔhun,e nɛ,omɛ xeye ni ma nyɔ onuti wi gɛ kpo oklenɔ lɛye kpo ma gɔ do le mɔ oxo ɖe a bo ɖɔ xɔn gɛ, ¹⁶ mi vo le ogbɛ zinzan mitɔn mɛ,vɔ vivɔ mitɔn ni nɔ kpɔn wa nyi onu xena cɔn onunyinyla gɛ,vɔ mi blo onu ɖi Mawuvi ha. ¹⁷ Mi si omɛ kpokpo,mi yi owan na miye nɔvi le yise mɛ lɛye,mi ɖo obuɖisi na Mawu,mi si axɔlu. ¹⁸ Ozɔnwatɔye,mi sɔ miɖe sɔ hwe na oga mitɔn lɛye kpo sisi kpo,e ka ma nyi oga xeye jɔhun bo fa kɔkɔlɔkɔ mɛ gɛ,kɔ,mi sɔ miɖe sɔ hwe na oga xeye ni nylahun lɛye can. ¹⁹ Ɖo na ye tafu mi bo do do vivɛsise an mi,vɔ,mi bo do oji le tonusise na,Mawu mɛ,fɛnu wɛ e nyi. ²⁰ Ɖo na mi blo onunyinyla wɛ ye xo mi,wɛ mi do oji le e nu,ale bɔtɔn wɛ le e mɛ na mi?Vɔ,na mi ka blo onu jijɔhun wɛ ye do aya na mi wɛ mi do oji le e mɛ,fɛnu wɛ e nyi le nukunmɛ na Mawu. ²¹ E nɛ lɔ kɛ e yɔ mi na,ɖo Klisi lɔ tesu ɖu aya do ota mitɔn mɛ,e bo nyi kpɔndo e go ɖe xena e sɔ ɖo anyi na mi a do sɔ afɔ do afɔ do etɔn mɛ, ²² e yɔ xe ma blo onunyinyla ti gɛ,awoɖiɖo ɖe ka ma tɔn sɔn onumɛ ni-i kpɔn gɛ; ²³ xena ye zun-i,e ma zun omɛ gba gɛ,xena ye do aya ni-i,e ma sin adan na omɛɖe gɛ,vɔ,e jo do alɔmɛ na Mawu xeni nɔ da ohwɛ jijlɔ. ²⁴ E yɔ xeni bɛ onunyinyla mitɔn lɛye do e ɖe ji le agbaza mɛ bo do yi atinsoga ji,e nɛ mi ma gɔ le ogbɛ na onunyinyla biblo gɛ,vɔ mi le ogbɛ na onu jijɔhun biblo.Dogbɔn abikpa etɔn ye mɛ wɛ mi mɔ azɔngbigbɔ le. ²⁵ Ɖo le osan,mi le ɖi lɛngbɔ xeye ni le bu xɔn ha,vɔ odin mi lɛkɔ wa omɛkplantɔ kpo omɛcɔtɔ mitɔn de.