¹ Eɖiye oxo kpatakli xena un ja ɖɔ na agun mɛxo xeni le mimɛ lɛye ɖiye,nyɔ can agun mɛxo ke wɛ un nyi ɖi ye ha gba,bo mɔ Klisi we aya ɖuɖu,un bo ɖo mima le gigo,xena ye na wa ɖe sɔ xlɛ mɛ: ² Mi kpe nukun do lɛngbɔ xena Mawu sɔ do asi na mi lɛye go,mi sɔ ojlo ɖagbwɛ do kpe nukun ye go,ɖi ɖena Mawu jlo ɖo ha,ni kpɔn wa nyi onu xena ye xo do okɔ na mi gɛ,amɔ mi wa ozɔn mitɔn kpo bibi kpo,ni nɔ kpɔn wa nyi ɖɔ kɔbɔ wɛ mi xodo gɛ; ³ mi nɔ kpɔn nɔ din na kpa acɛ do omɛ xena ye sɔ do asi na mi ɖɔ miye ni bo kpe nukun do ye go,amɔ mi nyi akpajlɛ na lɛngbɔ lɛye. ⁴ Enɛ,hwexenu na lɛngbɔ kplantɔ we oga na ɖe eɖe sɔ xlɛ,mi na yi jɛgbakun susunɔ xe mɔ nɔ ca gbeɖe gɛ. ⁵ Lemɔha ke,mimɛ ɖekajɛ lɛye mi,mi ɖo na nɔ sɔ miɖe lɛye hwe le omɛ xeni nyi mɛxo na mi lɛye we agɔ,mimɛ lɛye kpokpo ɖo na sɔ miɖe sɔ hwe,bo na nɔo wa ozɔn na miɖe,ɖo Mawu nɔ gbɛ okɔ sɔn ogoyitɔ lɛye go,amɔ bo nɔ wa ɖagbwɛ na omɛ xe nɔ sɔ yeɖe sɔ hwe lɛye. ⁶ Mi bo sɔ miɖe sɔ hwe le alɔ hɔnhlɔn nɔ Mawu tɔn gɔ,na ni a kɔ mi do oji le hwenu ɖagbwɛ; ⁷ mi ɖiɖa onu xeni le nyi tamɛ bubu na mi lɛye we agban do eji,ɖo e yɔ tesu le kpe nukun do migo xɔn. ⁸ Ayixa mitɔn,ni nɔ ote a bo cɔ miɖe,ɖo kɛntɔ mitɔn lɛgba lɔ,le lilɛdo mi ɖi kini-kini xeni le adan ji ha,bo le din omɛ xena e na vu ɖu. ⁹ Mi li odo le onuɖiɖi mɛ,bo nɔ te gliŋu le lɛgba we nukɔn,a bo nywɛ ɖɔ wuvɛ le matɔn can bo le kpe miye nɔvi ɖyɛ lɛye can le ogbɛ lɔ mɛ. ¹⁰ E nɛ,na mi ɖu aya na hwenu kpɛɖe godo vɔ,Mawu jɔmyɔn xe nɔ ylɔ mi wɛ mi na do ɖo mima le susu etɔn mavɔ-mavɔ mɛ,kpo okpɔ xena mi le xa Klisi lɔ mɛ,e yɔ tesu na wa ozɔn le mi go,wɛ mi na nyɔ kaka doyi-doyi,e na blo wɛ mi na nɔte gliŋu,e na na hɔnhlɔn mi bo na sɔ mi do osɔ sinsyɛn lɛji. ¹¹ Hɔnhlɔn ni nyi etɔn kaka doyi!Ami! ¹² Silivɛn xena un nɔ mɔ bo nɔ do mɔ nɔvi gbejinɔtɔ lɔ,wɛ gɔ alɔ na-un wɛ un do wlan wema onu e xe lɔ ɖoxlan mi,bo do na akɔnkpinkpan mi bo na do na gandego mi ɖɔ jɔmyɔn Mawutɔn titeŋugbe lɔ nɛ.Mi bo nɔ ote gliŋu le emɛ. ¹³ Agun xe le Babilɔnu wɛ Mawu can,ɖiɖena e can mi ɖo ha,do ogbe ɖoxlan mi,ovi ce Maki can do ogbe ɖoxlan mi gba. ¹⁴ Mi ki wanyiyi we osi na miɖe bo do do ogbe na miɖe.Fifa ni nɔ okpɔ xa mi mɛ xe nyi Klisi tɔn lɛye kpokpo!