¹ Odin un jlo na kɛ onu do oxo xena mi wlan ɖoxlan-un lɔ go,onu ganji wɛ e nyi ɖɔ nyɔnusi ni nɔ kpɔn bo sɛkpɔ sunnuglo wɛ. ² Coganco,a do gbɔn akpa na ogbɛ ɖuɖu zinzan,sunnuglo lokpo-lokpo ni ɖo nyɔnu etɔn,nyɔnudi lokpo-lokpo can gba ni ɖo asu etɔn. ³ Na sunnuglo ni na onu xe we hudo asyɛ ɖo wi,nyɔnu can gba ni blo ɖo lemɔha gba na asuwɔ. ⁴ Nyɔnusi ma ɖo acɛ ti do gbaza etɔn tesu ji gɛ,vɔ asuwɔ wɛ ɖo acɛ do e ji,lemɔha ke,asu ma ɖo acɛ ti do gbaza etɔn tesu ji gɛ,vɔ asyɛ wɛ ɖo acɛ do e ji. ⁵ Mi nɔ kpɔn gbɛ oxɔ na miɖe gɛ,hwɛkpo na e na do nyi lemɔha be mi mɛ awe lɛye ɖo ogbekpɔ a do nɔ lemɔha na hwenu ɖe a do ɖe mi ɖe do ovo na oɖɛ xixo;e nɛ godo, mi na gɔ okpɔ ɖo na e ma nyi lemɔha gɛ mi ma kpego na ɖu le mi ɖe ji gɛ,lɛgba bo na gbɔn flɛn a do tɛn mikpɔn. ⁶ Un ɖɔ oxo e nɛ,bo do ɖe omɔ na mi do onu nɛ lɛye go,e ma nyi osɛn wɛ un le do xɔn gɛ. ⁷ Un jlo ɖɔ omɛ lɛye sese a le ɖi nyɔ tesu Pɔlu ha.Coganco,onunina vovwe wɛ mi nyi sɔn Mawu de;e sɔ e xe na omɛ ɖe,bo sɔ o bu na omɛ ne xlan. ⁸ Oxo xena un le ɖɔ na ome xeni ma ɖe asu ye alo omɛ xeni ma ɖe nyɔnu lɛye gɛ,kpodo kposi lɛye kpo ɖiye:Onu ganji wɛ e nyi ɖɔ mi na gɔn nyɔnu ma ɖe,alo asu ma ɖe,ɖi nyɔ ha. ⁹ Vɔ,na mi ma kpego na ɖu le miɖe ji gɛ,mi ɖe nyɔnu a bo ɖe asu;ɖo e ma nyi ɖɔ mi na ɖe asu alo nyɔnu hugan ɖɔ nyɔnusi alo sunnuglo na le jlo mi xɔn zozo-zozo. ¹⁰ Gbeta xena un sɔ na asu kpodo asi wɛ nyi ɖɔ:Nyɔnu ni nɔ gbɛ asuwɔ gɛ,e ka ma n yi nyɔ tesu wɛ ɖɔ gɛ amɔ Jesu wɛ ɖɔ. ¹¹ (Na e gbɛ asuwɔ jan wɛ ni nɔ kpɔn gɔ ɖe asu ti gɛ alo e na gɔ wa jɛ okpɔ xa asuwɔ lɔ),asu can gba ni nɔ kpɔn gbɛ asyɛ gɛ. ¹² Omɛ gbokpwe lɛye oxo xena un le na mi xɔn ɖiye:E ma Jesu mɛ le ɖɔ xɔn gɛ vɔ nyɔ tesu wɛ,un le ɖɔ xɔn ɖɔ na nɔvi le yise mɛ lɛye ɖɔ na sunnuglo ɖe ɖe nyɔnusi mayisenɔ,nyɔnu lɔ bo yi ogbe wɛ ye na nɔ okpɔ be asu lɔ ni bo nɔ kpɔn gbɛ; ¹³ lemɔha ke na nyɔnusi yisenɔ ɖe wɛ yi ɖe asu mayisenɔ,asu lɔ bo yi ogbe wɛ ye na do nɔ okpɔ be ni bo nɔ kpɔn gbɛ asu lɔ gɛ. ¹⁴ Ɖo asu mayisenɔ lɔ tlɔ zun omɛ xena Mawu ɖe do ovo,dogbɔn asyɛ yisenɔ lɔ ji,lemɔha ke nyɔnusi mayisenɔ lɔ tlɔ zun omɛ xena Mawu ɖe do ovo dogbɔn asuwɔ yisenɔ lɔ ji.E ma yi lemɔha gɛ vikpɛ mitɔn lɛye ma ja nyi omɛ xeni mɛ gɛ,vɔ omɛ mimɛ wɛ mi ka nyi. ¹⁵ Na kosi lɔ jlo na gbɛ nyɔnu alo e jlo na gbɛ asu ni gbɛ fa-a,hwenɛnu nɔvi yisenɔ sunnuglo lɔ o,nyɔnusi lɔ o,na jɛ e ɖe si,ɖo na mi do nɔ ogbɛ le fifa mɛ wɛzɔn Mawu do yɔ mi. ¹⁶ Omɛ ɖe mɔ nɔ nyɔ onu wi gɛ,nyɔnusi yisenɔ a to na wa hwlɛn asu we gan ma?Alo asu yisenɔ a to na wa hwlɛn asi we gan ma? ¹⁷ Gbɔn vo na enɛ,omɛ lokpo-lokpo ni nɔ alɔ xe ji na Aklunɔ lɔ ze ɖo,e bo sɔ gbe xa ɖena e le san hwɛkpo Mawu do wa yɔ-ɛ,osɛn xena un sɔ do a yi le agun ɖekpokpwe mɛ e nɛ. ¹⁸ Na omɛ ɖe ogbo ada hwɛkpo Mawu wa yɔ-ɛ ni nɔ ada gbigbo etɔn ji;na omɛ ɖe ka ma gbo ada hwɛkpo Mawu yɔ-ɛ gɛ ni nɔ kpɔn wa yi gbo gɛ. ¹⁹ Ada gbigbo ma nyi onu ti gɛ,ada ma gbo can gba ma nyi onu ti gba gɛ,vɔ onu xeni le otaji wɛ nyi ɖɔ a na zɔn zɔnlin gbɔn osɛn Mawu tɔn ji. ²⁰ E wɛ zɔn ome lokpo-lokpo ni nɔ ɖena e le osan hwɛkpo Mawu do wa yɔ-ɛ. ²¹ Omɛ xixɔ wɛ a nyi hwekpo Mawu yɔ we,nɔ kpɔn lo onu gɛ,vɔ na a kpego na jɛ ɖewe si bo jɛ yɔ ɖe nu. ²² Ɖo omɛ xixɔ xena Aklunɔ lɔ yɔ e tlɔ zun omɛ xeni jɛ e ɖe si le Aklunɔ mɛ,lemɔha ke omɛ xeni le e ɖe si,hwɛkpo Klisi yɔ-ɛ e tlɔ zun omɛ xixɔ etɔn. ²³ Kɔbɔ vivɛ wɛ Mawu do xɔ mi,mi nɔ wa tlɔ zun kannumɔ na gbɛtɔ lɛye gɛ. ²⁴ Anɛ e vi lɛye, le Mawu we nukɔn omɛ lokpo-lokpo ni nɔ ɖena e le osan hwɛkpo e do wa yi oylɔ lɔ. ²⁵ Oxo xeni kan omɛ xeni ma ɖe asu alo omɛ ni ma ɖe nyɔnu gɛ tɔn ɖiye,un ma yi gbeta ti sɔn Aklunɔ ji gɛ vɔ,nyɔ omɛ xena Aklunɔ lɔ sɔ xɔ do blo omɛ xeni jɛxa wɛ ye na ɖe oji do e go dogbɔn dɔmɛ nywɛ etɔn mɛ,oxo xena un mɔ do e go e nɛ. ²⁶ Un le bu tamɛ ɖɔ dogbɔn awuvɛ xeni ogbɛ lɔ mɛ ye go,onu xeni na nyɔ we nyi ɖɔ:Gbetɔ ni nɔ ɖena e le. ²⁷ Nyɔnu wɛ a ɖo,nɔ kpɔn dɛn na a gbɛ gɛ,na a ma ɖo nyɔnu gɛ nɔ kpɔn ɖe ɖe gɛ. ²⁸ Vɔ,na agɔ do ɖe nyɔnu can,a ma wa onu nyinyla gɛ,na nyɔnuvi le alɔji ɖe can ɖe asu,e ma wa onu nyinyla gɛ,vɔ omɛ xeye ni ɖe nyɔnu alo asu e ma wa onu nyinyla gɛ.Vɔ,omɛ xeye ni ɖe nyɔnu alo asu lɛye,ye na gbɔn gbɛmɛ fi e we tagba lɛye mɛ,nyɔ ka ma jlo tagba nɛ lɛye na mi gɛ. ²⁹ Anɛ e vi lɛye oxo xena un le ɖɔ bo do ɖɔ lemɔha lɔ ɖiye;oganxixo vuɖe jan wɛ kpo,bɛ sɔn odin mi mɛ xeni ɖo nyɔnu lɛye mi zan ogbe ɖi omɛ xeni ma ɖo nyɔnu gɛ ha, ³⁰ omɛ xeni le vi avi xɔn ye ni blo ɖi omɛ xeni ma le vi avi xɔn gɛ ha,omɛ xeni le xɔ onu lɛye,ni le ɖi omɛ xeni ma ɖo onu ti gɛ ha, ³¹ omɛ xeni le zan gbɛmɛ fi e we onu ye xɔn ni le ɖi omɛ xeni ma zan gɛ ha,ɖo ninɔmɛ ogbɛ xe mɛ lɔ tɔn le yi vivɔnu xɔn. ³² Vɔ, ojlo ce wɛ nyi ɖɔ onu lilo ti nɔ kpɔn nɔ ayixa mɛ na mi gɛ,sunnuglo xeni ma ɖe nyɔnu gɛ,Aklunɔ lɔ we ozɔn nɔ le ayixa mɛ ni-i e bo nɔ le din na nyɔ kpinkpɔn na Aklunɔ; ³³ vɔ omɛ xeni ɖe nyɔnu ogbɛ mɛ fi e we onu lɛye wɛ nɔ le ayixa mɛ ni-i,e bo na le din na nyɔ kpinkpɔn na asyɛ. ³⁴ Ayixa etɔn mɛ bo na ma do awe,lemɔha ke,nyɔnusi alo nyɔnuvi xeni ma ɖe asu gɛ,Aklunɔ lɔ we ozɔn wiwa wɛ nɔ le ayixa mɛ ni-i,e bo nɔ le din na mi e a bo nɔ wiwe le gbaza kpodo gbigbɔ mɛ;vɔ nyɔnusi xeni ɖe asu,e yɔ ogbɛ mɛ fi e we onu lɛye wɛ nɔ ci ayixa etɔn mɛ,e bo na le din na nyɔ kpinkpɔn na asuwɔ. ³⁵ Mitɔn nywɛ wɛ un le din xɔn,bo do le ɖɔ oxo do lemɔha xɔn,e ka ma nyi na do zin gbigbɔ ji na mi xɔn mɛ gɛ,vɔ na mi a do blo onu xeni sɔgbe,a do tɛ do Aklunɔ lɔ we ozɔn wiwa go,ayixa mitɔn bo na do nɔ ofi lokpo,e nɛ lɔ wɛzɔn. ³⁶ Na ɖekajɛ ɖe wa sɔ nyɔnuvi ɖe agɔ,bo nywɛ ɖɔ nyɔnuvi lɔ bo jlo mi e hugan,ɖɔ mi e bo do na ɖe mi e ɖe lɛye jan wɛ,na e ma nyi lemɔha gɛ,be e mi e bo na wa ɖe afɔ nyinyla do yi nyɔnusi lɔ de,be ye ni bo ɖe ye ɖe lɛye ɖi ɖena e jlo ɖo ha;e nɛ ma nyi e wa onu nyinyla gɛ. ³⁷ Vɔ na ɖekajɛ ɖe,sɔ gbeta vivɛɖe le o ji etɔn mɛ,ɖɔ mi e bo ma ja ɖe nyɔnu xena mi e bo sɛkpɔ lɔ gɛ,e ka ma nyi ye zin do e ji mɛ gɛ,na gbeta sisɔ nɛ lɔ sɔn oji etɔn mɛ oxojɔxo,e yɔ tesu we ojlo wɛ e ka nyi,be gbeta ganji wɛ e sɔ. ³⁸ Sunnuglo xeni ɖe nyɔnu etɔn blo onu ganji,vɔ sunnuglo xeni ma ɖe nyɔnu gɛ,e blo onu ganji gba. ³⁹ Nyɔnusi xeni ɖe asu,we osɛn bla-ɛ do asuwɔ lɔ go,na asu lɔ gbɛ le ogbɛ;na asu lɔ ku,e hɛn e na ɖe omɛ xeni jlo-e,vɔ e ɖo na ɖe le yise mɛ. ⁴⁰ Coganco,na nyɔnusi lɔ gɔn asu ma ɖe,e na hɛn awajijɛ wa ni-i hugan, ɖena nyɔ Pɔlu un mɔ ɖo e nɛ,un ka ɖiɖɔ nyɔ can gba ɖo Mawu we gbigbɔ lɔ gba.