¹ Na tagba ɖe wa wa mi mɛ,ani wɛzɔn mi na nyi ylɔ ohwɛ na mayisenɔ lɛye kɔn,yisenɔ lɛye kɔn mɛ mi na ylɔ ohwɛ lɔ do? ² Alo,mi ma ka nywɛ ɖɔ yisenɔ lɛye wɛ na da ohwɛ na ogbɛ lɔ wɛɛ?Na e nyi ɖɔ miye wɛ na da ohwɛ na ogbɛ lɔ,oxo ma ɖi oxo nɛ ha lɛye,na glo ɖiɖɔ na mi wɛɛ? ³ Mi ma nywɛ ɖɔ miye wɛ na da ohwɛ na Mawu we owɛndotɔye wɛɛ?Nɛmu-nɛmu wɛ na wa nyi ogbɛ me fi e tɔn we onu lɛye tɔn? ⁴ Na ogbɛ mɛ fi e we onu ɖe wa hɛn tagba wa mi mɛ,ani wɛ na wa jɔ kaka mi na sɔ do yi omɛ xeye na agun lɔ ma sɔ do yɔ onu ti ye kɔn? ⁵ Un le onu xena ŋunya mitɔn wɛ.Odin be onunywɛtɔ lokpo tesu ma le mi mɛ bo ma kpego na gbo ohwɛ le nɔvi yisenɔ leye gɛ wɛ? ⁶ Vɔ,ɖi ɖena onu lɛye le jɔ xɔn ɖo,un mɔ ɖɔ yisenɔ ɖe yɔ ohwɛ nɔvyɛ yisenɔ ma yisenɔ de! ⁷ Ohwɛ xena mi o le do miɖe lɛye xɔ o le vɔvɔ o ɖe xlɛ ɖɔ miye bo o jɛ anyi sesese le yise mɛ.Ani wɛ zɔn mi mɔ nɔ yi ogbe na ye a tafu mi gɛ?Ani wɛ zɔn mi mɔ nɔ yi ogbe na ye yi onu mitɔn gɛ? ⁸ Vɔ,miye lɔ tesu lɛye wɛ le tafu omɛ lɛye xɔn,a bo yi onu le omɛ lɛye si gannu-gannu.Miye nɔvi yisenɔ lɛye wɛ mi nɔ jlɛ odɛn nɛ lɛye xa. ⁹ Alo,mi ma ka nywɛ ɖɔ omɛ xeye ni nɔ wa onu nyinyla lɛye,ye ma le ɖiyɛ axɔluɖuɖuta Mawu tɔn mɛ xɔn gɛ wɛɛ?Mi nɔ kpɔn blɛ miɖe gɛ:Ogbɛ ɖuɖu zantɔ lɛye,yɛhwe sɔntɔ lɛye,afɔ do ogbetɔ lɛye,nyɔnu xeye ni nɔ ɖo oxo xa awegɔ yetɔn nyɔnusi lɛye,sunnuglo xeye ni nɔ ɖo oxo xa awegɔ yetɔn sunnuglo leye, ¹⁰ ajotɔ lɛye,omɛ xena onu mɔ nɩ su le onukun mɛ na ye gɛ ye,ahannu munɔ leye,omɛ zuntɔ lɛye,omɛ bu we onu yi tɔ lɛye,ti ma le ɖiyɛ axɔluɖuɖuta Mawutɔn lɔ mɛ xɔn gɛ. ¹¹ Le mimɛ,omɛ alɔkpa xe ha na omɛ ɖe ye nyi osan wa yi,vɔ Mawu bo lɛ osin na mi,bo ɖe mi do ovo,bo sɔ mi do blo omɛ jijwɛ,le Aklunɔ Jesu Klisi we nyikɔ mɛ,kpodo Mawu mitɔn we gbigbɔmɛ. ¹² Omɔ le hunhun na-un,na ma do blo onu ɖekpokpwe;oxojɔxo wɛ coganco sese kpo mɛ na ɖo ale na-un gɛ.Ye ɖe omɔ na-un na ma do blo onu ɖekpokpwe,coganco nyɔ un jo ɖiye do kaka onu ɖe ma wa xlɛ ota na-un gɛ. ¹³ Onuɖuɖu le na adɔ,wɛ adɔ can bo le na onuɖuɖu.Oxojɔxo wɛ e nyi coganco,Mawu bo na wa crɔn ye mɛ awe lɛye sese,vɔ gbaza ma le na ogbɛ ɖuɖu zinzan gɛ,Aklunɔ lɔ wɛ e le na ,Aklunɔ lɔ can bo le na gbaza. ¹⁴ Mawu fɔn Aklunɔ mitɔn sɔn oku,lemɔha ke wɛ e na fɔn mi ɖo kpodo hɔnhlɔn etɔn kpo. ¹⁵ Mi ma ka nyi ɖɔ gbaza mitɔn leye wɛ nyi alɔklan xeni kpli blo Klisi we gbaza we alɔklan nɛ lɔ do blo onu nyinyla alo a do lɛ aga?Akpa e nɛ lɔ na gbɔn! ¹⁶ Alo mi ma ka nywɛ ɖɔ na sunnuglo do oxo xa nyɔnusi kpaconɔ,sunnuglo lɔ kpodo nyɔnusi kpaconɔ lɔ kpo tlɔzun gbaza lokpo gee wɛɛ?Ɖo ye wlan ɖɔ:"Ye mɛ awe lɛye sese na tlɔzun gbaza lokpo gee. ¹⁷ Vɔ,omɛ xeni blo lokpo xa Aklunɔ lɔ kpo,omɛ lɔ kpodo Aklunɔ lɔɩ na tlɔzun onu lokpo gee le gbigbɔ mɛ. ¹⁸ Mi si na ogbɛ ɖuɖu zinzan.Onu nyinyla bu,ɖekpokpwe xena ogbɛtɔ na blo xeni ca kpodo gbaza,vɔ omɛ xeni jo e ɖe na ogbɛ ɖuɖu zinzan e blo onu nyinyla do gbaza etɔn tesu go. ¹⁹ Alo mi ma ka nywɛ ɖɔ gbaza mitɔn wɛ yi oxwe n agbigbɔ mimɛ xena Mawu na mi,wɛ e bo le mimɛ wɛɛ?Mi ma nywɛ ɖɔ mi e bo ma nyi mi e lɛton gɛ wɛ? ²⁰ Ɖo kɔbɔ vivɛ wɛ Mawu do xɔ mi,e wɛzɔn,mi sɔ gbaza mitɔn a do kpa gigo na Mawu.