¹ Mi le se xɔn ɖɔ ye bo ɖɔ miye bo le zan ogbɛ ɖuɖu xɔn,ogbɛ ɖuɖu nɛ lɔ bo nyla gbɔn,kosi lɛye can mɔ nɔ wa onu do lemɔha can gɛ.Ye bo nɔ ɖɔ omɛ ɖe bo le miye mɛ bo nɔ din otɔ syɛ. ² Onu nyi do lemɔha mi bo gɔ le yi ogo xɔn avi bɛ e ɖo na nyi na mi o,mi bo na do ɖo omɛ xeni le blo onu lemɔha tɔn lɛye te,tɔn le mimɛ. ³ Nyɔ ma le mide le gbaza mɛ gɛ,amɔ un bo le okpɔ xa mi le gbigbɔ mɛ.Omɛ xeni do onu lemɔha tɔn te un o da ohwɛ na omɛ lɔ xoxo,ɖi mi de wɛ un le ha. ⁴ Le ohwe xenu na mi na kpli le Aklunɔ mitɔn Jesu Klisi mitɔn we nyikɔ mɛ,na le mimɛ le gbigbɔ mɛ,e wɛ dogbɔn Aklunɔ mitɔn Jesu we hɔnhlɔn mɛ, ⁵ mi na sɔ omɛ nɛ lɔ sɔ xɔ jo na lɛgba ni a do gble onu nyinyla wiwa xeni le gbɛzan mɛ ni lɔ.E nɛ alindɔn etɔn na do mɔ hwlɛngan le Mawu we azan lɔ gbe. ⁶ E ma jɛxa ɖɔ miye ni bo yi ogo gɛ,alo mi ma nywɛ ɖɔ kpɔnnɔ tinkɛn ovu wɛ nɔ fɔn yɛvowɔ xena ye nya lɔ sese wɛɛ? ⁷ Mi sɔ kpɔnnɔ tinkɛn xoxo lɔ sɔ flɛn,na mi a tlɔ zun yɛvowɔ nyinya yɔyɔ xe mɛ na tinkɛn ma le gɛ. ⁸ Le oxojɔxo mɛ yɛvowɔ nyinya yɔyɔ nɛ lɔ wɛ mi o nyi,ɖo Klisi xeni nyi wiwayibwe oxwe we lɛngbɔvi mitɔn lɔ,ye o sɔ-ɛ do san avɔ. E wɛzɔn,mi a ɖu wiwayi we oxwe lɔ,mi ma le ɖwi xɔn kpodo kpɔnnɔ tinkɛn xoxo xeni nyi onu nyinyla wiwa kpodo danu kpo gɛ,vɔ mi a ɖwi kpodo kpɔnnɔ xeni ma ɖo tinkɛn gɛ,xeni nyi onumimɛ wiwa kpodo oxojɔxo tito. ⁹ Le wema xena un wlan ɖoxlan mi mɛ,un le ɖɔ na mi ɖɔ miye ni nɔ kpɔn do oha kpodo ogbɛ ɖuɖu zantɔye kpo gɛ. ¹⁰ Un ma ka gɔ le gbo omɔ na mi ɖɔ omɛ kpaa xeni le ogbɛ xe mɛ wɛ ye bo nyi ogbɛ ɖuɖu zantɔye,omɛ xena onu mɔ nɔ su onu n aye gɛ,jaguda ye,alo yɛhwe sɛntɔye,we oxo mɛ un le ɖɔ xɔn gɛ.E ka nyi ɖɔ mi na si na omɛ nɛ lɛye sese,be ogbɛ lɔ mɛ jan wɛ mi na lɛ le. ¹¹ Odin,oxo xena un wlan ɖoxlan mi lɔ wɛ nyi ɖɔ miye ni nɔ kpɔn bo do oha xa omɛ xeni ylɔ yeɖe lɛye ɖɔ miye bo nyi nɔvi yise mɛtɔn,coganco bo ka nyi ogbɛ ɖuɖu zantɔ,alo omɛ xena onu mɔ nɔ su le nukun etɔn mɛ gɛ,alo e na le sɛn yɛhwe xɔn,a bo gɔ le ɖɔ omɛ xo xɔn,a bo gɔ nyi ahan nu munɔ,a bo gɔ nyi ajotɔ.Onu ɖuɖu vɔvɔ can,mi ma kpo kpego na ɖu onu tesu xa omɛ lemɔha xa lɛye gɛ. ¹² Kosi nɔ lɛye wɛ ohwɛ dida ma kan gɛ,vɔ yisenɔ lɛye wɛ mi na da ohwɛ na. ¹³ Kosi nɔ lɛye Mawu tesu wɛ na da ohwɛ na ye.Mi nya omɛ nyinyla lɔ tɔn le mimɛ.