¹ Lemɔha wɛ ye nyɔ mi wi ɖi ozɔn watɔ Klisi tɔn,kpodo ome xeni hɛn oxo jɔxo hwihwla Mawu tɔn go. ² Le e nɛ lɛye kpokpo mɛ,ye ni wa mɔ ozɔn watɔ Mawu tɔn lɛye le ogbeji we ninɔmɛ. ³ Vo,nyɔ tɔn mi tɛŋu da ohwɛ na-un a lo ohwɛ ɖɔtɔ obuye tɛŋu da ohwɛ na-un,e nɛ ma le ɖi onu ti na-un gɛ nyo tesu can ma ka le da ohwɛ na nyɔ ɖe xɔn gɛ. ⁴ Un mɔ nɔ lin le linlin ce lɛye mɛ na do da ohwɛ na nyɔɖe gɛ,vɔ e ka ma gɔ nyi ɖɔ un nyi xomɛvɔnɔ gɛ,Aklunɔ wɛ nyi ohwɛ datɔ. ⁵ E nɛ wutu,mi nɔ kpɔn da ohwɛ keŋu hwɛkpo Aklunɔ ni nɔ kpɔn do wa gɛ.Ɖo Aklunɔ lɔ wɛ na ɖe onu hwihwla xeni le zinvlu mɛ lɛye jɛ weziza nu, a bo ɖe onu hwihwla xeni le ayixa mɛ lɛye jɛ agbaŋugba.Hwenɛnu wɛ Mawu wɛ Mawu na do ajɔ omɛ lokpo-lokpo ɖi ɖena e jɛ xa ɖo ha. ⁶ Anɛevi e mi,miye wɛzɔn na un do wlan oxo nɛ lɔ nyɔ kpodo Apolosu kpo.E nɛ,mi na yi okplan a do gbɔn akpajlɛ miye tɔn mɛ na mi a nɔ kpɔn zɛ ojlɛ onu winwlan lɔ tɔn go gɛ.Omɛti bo ma gɔ ja yi ogo le mimɛ gɛ. ⁷ Ɖo,mɛwɛ na zɔn a do nyi omɛ xena nukun le e ji?A ni wɛ a ɖo na e ma nyi ɖɔ na wɛ ye na we gɛ?Xe e nyi na wɛ ye na we le,a ni wutu wɛzɔn a do le yi ogo xɔn ɖi na mɛ ye na we gɛ ha? ⁸ Dɔgo nɛ o gɔ mi,mi bo jɛ dɔkun,bo o le ɖu axɔlu xɔn,miye mɛ vo.Na e do nyi ɖɔ axɔlu lɔ wɛ mi do ɖu oxojɔxo wɛ,be miye can na ɖwi xa mi. ⁹ Ɖo,le nyɔ we onu mimɔ mɛ,mi mɛ omɛ dɔntɔ lɛye,e le ɖi Mawu sɔ mi sɔ ɖo tɛnmɛ kpotwi ha.Mi le ɖi omɛ xena ye do oku we ohwɛ na ha,ye bo ja hu ye le togunnmɛ ha.Mi bo tlɔ zun onu kpinkpɔn na ogbɛ lɔ,na owɛndotɔ Mawutɔn lɛ kpodo gbɛtɔ lɛ kpo. ¹⁰ Mi nyi oklenɔ do Klisi lɔgo, vɔ miye bo nyi onunywɛ tɔye le Klisi lɔ mɛ.Mi nyi hɔnhlɔnn maɖotɔye,amɔ miye bo ɖo hɔnhlɔn.Ye nɔ ɖo sisi na miye,a bo kɔn acɔn do miye go! ¹¹ Kaka do wa je odin czn,mi le hovɛ,kɔmɛ bo le ci mi,bo le govɛ,ye nɔ xo mi,mi bo le flu xɔn. ¹² Mi nɔ wa ozɔn kpo alɔ mitɔn kpo kaka agbɔ nɔ kpe.Na omɛ ye le zun mi,mi nɔ xo fifa we oɖɛ na ye,na ye le ɖe ofun na mi,mi nɔ do oji le e nu. ¹³ Ye nɔ zun mi co,mi nɔ wa ɖagbwɛ na ye.Kaka do wa jɛ odin,mi le ɖi gboji ogbɛ lɔ tɔn ha,bo le ɖi onu ɖuɖu gbɛtɔ lɛye tɔn ha. ¹⁴ Un ma le wlan onu xena ni a do nyi ŋunya na mi gɛ.Amɔ na ma do ɖo afɔ-afɔ ji na mi ɖi ovi vɛna-vɛna ce ha,wɛ zɔn. ¹⁵ Ɖo na mi gɔ ɖo onukplan omɛtɔ akpo awo(10000) le Klisi lɔ mɛ can,mi ma ɖo otɔ susu gɛ,ɖo nyɔ wɛ jimi,do Klisi Jesu mɛ,dogbɔn wɛnɖagbe xena un jla na mi lɔ mɛ. ¹⁶ E wɛzɔn,un le byɔ mi ɖɔ:"Miye ni bo sɔ afɔ do afɔ do ce mɛ. ¹⁷ E nɛ lɔ wɛzɔn un do sɔ Timɔte,ovi vɛna-vɛna ce xeni le gbeji na Aklunɔ lɔ sɔ xɔ ɖoxlan mi.E na flin osɛn xe ji na un nɔ gbɔn lɛye le Klisi mɛ na mi,ɖi ɖena un le kplan omɛ ye gbɔn ofi ɖekpokpwe ha,le agun kpokpo mɛ ɖo ha. ¹⁸ Omɛ ɖe lɛye,le bwi ɖɔ un bo ma gɔ ja ye gɛ ha,ye bo le yi ogo xɔn. ¹⁹ Amɔ,na e jlo Aklunɔ lɔ na mide zanɖe,e nɛ e ma gɔ ja nyi ogo yigɔ nɛ lɛ we oxo mɛ na nɔ se gɛ,e nɛ na do nyɔ azan xe go na ye kpe. ²⁰ Ɖo,Mawu we axɔluɖuta lɔ e ma nyi oxo kpoŋu mɛ gɛ,amɔ hɔnhlɔn we oxo wɛ. ²¹ Bɔtɔn wɛ nyɔ na mi le e xe mɛ:Ma wa mide kpo oba?Alo ma wa kpodo wanyiyi kpodo alɔ mɛ fifa?