¹ Anɛ evi lɛye,un ma hɛn onu nyinywɛ oxo Mawu tɔn xeni hugan linlɛn mitɔn do wa mi de gɛ,vɔ un hɛn oxo lɔ wa ɖi omɛ xe le anɔnu le Klisi me ha. ² Anɔsin wɛ un na mi,un ma na mi onuɖuɖu sinsyɛn xu gɛ,ɖo le ohwe e nɛ nu,mi ma kpego na ɖu onu sinsyɛn xu gɛ, kaka do wa jɛ odin can mi ma kpego na ɖu gɛ, ³ Ɖo,gbaza mɛ wɛ mi gbɛ le.Xena e nyi ɖɔ awuhwihwan kpodo ojlɛ lɛye kpo gɔ gbɛ le dodomɛ na mi,gbaza mɛ ma nɛ mi le,bo le zan gbɛtɔ lɛye we walɔ xɔn? ⁴ E nyi na mɛɖe ɖɔ:"Nyɔ, Pɔlu tɔn wɛ un nyi"!Wɛ omɛ bu gɔ ɖɔ nyɔ Apolosu tɔn wɛ un nyi!"gbɛtɔ mɛ miye mi nyi? ⁵ Ani wɛ Apolosu lɔ nyi?Pɔlu lɔ can ani wɛ e nyi?Ozɔn wavi,xeji na Mawu gbɔn bo do yɔ mi gbɔn yise ji jɛn wɛ miye mi nyi,a bo gɔ wa ozon lɔ ɖi ɖena Mawu zɔn mi ɖo ha. ⁶ Nyɔ un do atin lɔ,Apolosu bo hu osin ni,vɔ Mawu wɛ na wɛ atin lɔ do hwɛn, ⁷ e nɛ wutu omɛ ni do atin lɔ kpodo omɛ ni hu osin na kpo ma wa onu ti kaka do yi onu ɖe gɛ,vɔ Mawu xeni na na atin lɔ na hwɛn wɛ le vivɛɖe. ⁸ Odin,omɛ xeni do atin lɔ kpo omɛ ni hu osin na kpo onu lokpo wɛ ye mɛ awe lɛye nyi, wɛ ye mɛ awe lɛye na yi ajɔ yetɔn lokpo-lokpo ɖi ɖena e jɛ xa ɖo ha. ⁹ Ɖo,ozɔn wavi Mawutɔn wɛ mi nyi,miye wɛ nyi Mawu we ogle lɔ bo gɔ nyi Mawu we oxo lɔ. ¹⁰ Dogbɔn Mawu we fɛnu xeni na-un mɛ,un do oxɔ lɔ odo ɖi ɖena oxɔ gbato adodwe nɔ blo ɖo ha,wɛ omɛ bu wa gba do e ji.Vɔ,omɛ lokpo-lokpo we ayixa ni nɔ ote ɖi ɖena e le gba do eji xɔn ɖo. ¹¹ Ɖo omɛ ti ma kpego na gɔ vɔ wa blo doŋudo nu adodwe bu zɛ gbɔn xena ye gba lɔ gba lɔ go gɛ,enɛ lɔ wɛ nyi Jesu Klisi lɔ. ¹² Odin na omɛ ɖekpokpwe,go vɔ wa gba sika can do doŋudo nu lɔ ji ogan wewe wɛɛ,okpɛn kɔbɔ vivɛ tɔn wɛɛ,atin wɛ e do gba,dema wɛɛ,osɛ wɛ omɛ lɔ do gba, ¹³ ozɔn xena omɛ lokpo-lokpo wa e na sɔ awu sɔ xɔ xlɛ le azan lɔ gbe,ɖo ozo wɛ na wa gbeje ozɔn xena omɛ lokpo-lokpo blo,wɛ xeni nyi nyinyla kpodo adodwe lɛye kpo ye na mɔ nukunnu jɛ e go sese. ¹⁴ Na omɛ ɖe we ozɔn wɛ ozɔn wɛ nɔte le adodwe lɔ ji,ye na na ajɔ etɔn wi. ¹⁵ Vɔ,e nyi ozɔn omɛ ɖe tɔn fyɔ,e ma le yi ajo etɔn xɔn gɛ,omɛ lɔ tesu na mɔ hwlɛngan,vɔ e na le ɖi omɛ xeni hlɔn tɔn le ozo mɛ ha. ¹⁶ Mi ma ka nywɛ ɖɔ Mawu we oxwe gbe wɛ mi nyi,wɛ gbigbɔ ɖedovo Mawu tɔn bo le mimɛ? ¹⁷ Na omɛ ɖe gba Mawu we oxwe,Mawu can na gba ome lɔ;ɖo Mawu we oxwe lo,onu mimɛ wɛ e nyi,miye wɛ ka nyi oxwe lo. ¹⁸ Omɛ ɖe ni nɔ kpɔn blɛ e ɖe ɖu gɛ,e ka nyi omɛ ɖe le mimɛ bo nɔ mɔ le e ɖe mɛ do miye bo ɖo onu nyinywɛ ogbɛ xe mɛ tɔn,be ni bo tlɔzun oklenɔ,na ni a wa kpego do ɖo onu nyinywɛ adodwe xeni nyi Mawu tɔn lɔ. ¹⁹ Ɖo onu nyinyw€ ogbɛ xe mɛ tɔn nɔ nyi oklenɔ wiwa le Mawu we nukɔn.Ɖo e nyi winwlan ɖɔ:"Mawu nɔ hlu ayixa na onu nyinywɛ tɔ ogbɛ mɛ fi e tɔn lɛye le ase bibla yetɔn lɛye mɛ. ²⁰ Do oxo enɛ ji:Aklunɔ nyɔ linlin onu nyinywɛ tɔ ogbɛ mɛ fi e tɔn lɛye tɔn wi,bo nɔ sɔ do mɔ onu vɔvɔ." ²¹ Na omɛti ni nɔ kpɔn gɔ sɔ gigo etɔn sɔ do gbɛtɔ ti ji gɛ,ɖo onu lɛye kpokpo mitɔn wɛ e nyi, ²² e tɛn un nyi Pɔlu,Apolosu,Sefasi,le anyizan lɔ ji ogbɛ lɔ,onu xeni le odin lɛye kpodo xeni gɔ ja lɛye kpo mitɔn wɛ kpokpo nyi; ²³ ɖo miye mi nyi Klisi tɔn wɛ Klisi lɔ nyi Mawu tɔn.