¹ Anɛ ɛ vi lɛ, un jlo na flin na mi ɖɔ , owɛn ɖagbwɛ xena un le jla na mi, xɔn, mi bo yi i, bo tɛ do ego lɔ, ² Eyɔ lɔ ji wɛ mi na gbɔn a do mɔ hwlɛngan na mi hɛn ego ɖi ɖe na un le jla na mi ɖo ha, na e ma nyi lemɔha gɛ be yise mitɔn nyi onu vɔvɔ. ³ Un o kplan mi onu lɛ sese kpo jɛnukɔn, ɖi ɖe na ye kplan un ɖo ha, ɖɔ Klisi bo ku ɖo ohwɛ huhu mitɔn ye we otame ɖi ɖɛna Mawu we oxo lɔ ɖɔ do ha. ⁴ Ye ɖi i, ebo fɔn sɔn oku le azan atɔn gɔ gbe, ɖi ɖena Mawu we oxo lɔ o ɖɔ ɖo ayi ɖo ha. ⁵ E ɖe eɖe sɔ xlɛ sefasi, ⁶ Bo gɔ wa ɖe eɖe xlɛ nɔvi yisenɔ sandi atɔɔn (500) onu le eji donu nɛmuɖe, susu le ye me bo gbɛ le ogbɛ vɔ omɛ ɖe lɛe o ku. ⁷ E nɛ godo, e ɖe eɖe sɔ xlɛ Jaki kpodo omɛ sɔ ɖo hlan lɛ kpokpo. ⁸ Le vivɔnu, ewa ɖe eɖe sɔ xlɛ nyɔ can. Nyɔ xeni le ɖi ovi xena osun ma kpe na hwɛkpo ye ji ha gɛ. ⁹ Ɖo, nyɔ wɛ nyɔ omɛ godotɔ le omɛdindɔn lɛye mɛ, un ka ma jɛ ha ye na do ylɔ-un ɖɔ omɛdindɔn gɛ, ɖo un do tagba na Mawu we agun. ¹⁰ Dogbɔn Mawu we fɛnu mɛ, un nyi omɛ xena un nyi, fɛnu xena e ka naŋu lɔ le wazɔn tɛgbɛ. Nyɔ wɛ trɛ gɔ wazɔn xugan omɛdidɔn gbokpwe ɖyɛ lɛye kpokpo, e ka ma nyi nyɔ mɛ wa ozɔn lɔ gɛ, vɔ, Mawu we fɛnu xeni le okpɔ xaŋu wɛ zɔn. ¹¹ Ewɛzɔn, e gɔ do nyi nyɔ o, owɛn ɖagbwɛ xena mi le jla xɔn lɔ, e yɔ wɛ, onu xeji na mi ka kando lɔ nɛ. ¹² Mi le jla ɖɔ Klisi bo fɔn sɔn oku, xena e nyi lemɔha, ani wutu wɛ mɛ ɖe lɛye le mimɛ, bo nɔ ɖɔ ɖɔ fifɔn sɔn oku bo ma le gɛ. ¹³ Na fifɔn sɔn oku ma le gɛ, be Klisi can ma fɔn sɔn oku gɛ bo nɛ. ¹⁴ Na e nyi ɖɔ Klisi ma fɔn sɔn oku gɛ, be oxo xena mi le jla xɔn lɔ nyi onu vɔvɔ, yise mitɔn lɔ can bo nyi vɔvɔ. ¹⁵ Gɔ bɔ do e go, na e nyi dɔ omɛ kuku ye mo nɔ fɔn oxojɔxo gɛ, be Mawu we ɖɔɖayiɖɔtɔ awo nɔ bo nɛ mi nyi o, ɖo mi le ɖɔ ɖɔ e bo fɔn Klisi sɔn oku, vɔ, e ka ma fɔn-ɛ gɛ. ¹⁶ Ɖo, na omɛ kukuye mɔ nɔ fɔn gɛ, be Klisi lɔ can ma fɔn sɔn oku gɛ. ¹⁷ Na Klisi lɔ ma fɔn sɔn oku gɛ, be yise mitɔn trɔ zɔn onu toto, mi bo gbɛ le onu nyinyla mitɔn lɛye mɛ. ¹⁸ Na e le lemɔha,be nɔvi le Klisi mɛ xeni o ku lɛye,be ye dɔn. ¹⁹ Na e nyi ɖɔ ogbɛ xemɛ jan wɛ zɔn nukun ɖiɖo mitɔn do le Klisi,be ogbɛ mitɔn na ɖu adɔnu hugan omɛ gbokpwe lɛye tɔn. ²⁰ Vɔ,le oxojɔxo mɛ,Klisi lɔ wɛ nyi omɛ tintan xeni fɔn sɔn oku,e bo na oji ɖiɖe ɖɔ omɛ kuku ɖiyɛ lɛye can bo na wa fɔn. ²¹ Ɖo,ɖi ɖena oku gbɔn omɛ lokpo ge ji do wa ɖo,lemɔha ke wɛ omɛ finfɔn sɔn oku can gbɔn omɛ lokpo ge ji bo na do wa lɔ nɛ. ²² Ɖena omɛ lɛye sese gbɔn Adamu ji bo do ku ɖo,lemɔha ke wɛ omɛ lɛye sese can na gbɔn Klisi lɔ ji a bo do wa mɔ ogbɛ ɖo ha, ²³ vɔ omɛ lokpo-lokpo kpodo tɛnmɛ etɔn kpo.Jɛnukɔn Klisi lɔ xeni nyi omɛ tintan bo fɔn sɔn oku lɔ,omɛ xeni nyi etɔn lɛye na wa fɔn sɔn oku le okɔlilɛ etɔn hwenu. ²⁴ E nɛ godo, na Klisi lɔ na vɔ okun na oga ɖuɖu ɖekpekpe, acɛ kpikpa ɖekpekpe kpodo gbigbɔ mɛ we hɔnhlɔn nyinyla ɖekpekpe, bo sɔ axɔluɖuɖu lɔ sɔ xɔ do alɔ mɛ na Mawu otɔ lɔ vɔ, vivɔnu lɔ bo na wa. ²⁵ ƉO, Klisi lɔ ɖo na ɖu axɔlu lɔ gbɔɔn Mawu bo na bɛ kɛntɔ etɔn lɛye do afɔ etɔn gɔ. ²⁶ Kɛntɔ vivɔnu xena e va okun su do na wɛ nyi oku. ²⁷ Ɖo, oxo Mawu tɔn ɖɔ:" E sɔ onu lɛye kpokpo sɔ xɔ ɖo acɛ etɔn gɔ." Na ye ɖɔ" onu kpokpo" ye ɖo na nyɔ-ɛ ɖɔ Mawu xeni sɔ onu lɛye sɔ ɖo acɛ etɔn gɔ lɔ, bo ma le e mɛ gɛ. ²⁸ Hwexenu na ye na sɔ onu lɛye kpokpo sɔ xɔ ɖo acɛ Klisi lɔ tɔn gɔ, hwenɛnu wɛ ovi lɔ tesu na sɔ eɖe hwe na omɛ xeni sɔ onu kpokpo sɔ do acɛ etɔn gɔ lɔ, na Mawu a do nyi onu kpokpo na omɛ kpokpo. ²⁹ Ani wɛ jɔ na omɛ ɖelɛ ye nɔ do wa yi lɛ Mawu we osun do odomɛ na omɛ xeni o ku lɛ? Na e nyi ɖɔ omɛ kukuye ma ja wa fɔn gɛ, aniwɛzɔn ye nɔ do wa yi lɛ Mawu we osin do olomɛ na ye? ³⁰ Mye tesu ye can ɖe, ani wutu wɛ mi nɔ do le kpe fɔku le hwe ɖekpekpe nu? ³¹ Anɛ e vi lɛ, ayihɔngbe-ayihɔngbe, oku le akpa naŋu, xojɔxo ka wɛ, ɖi ɖena awajijɛ xena mi nyi naŋu le Jesu Klisi Aklunɔ mitɔn lɔ mɛ can nyi oxojɔxo ɖo ha. ³² Na e do nyi ɖɔ gbɛtɔ we linlɛn wɛ le godo na ovun xena un le xo kpan nukɔn aklasu lɛye le Efɛzu, ale bɔ tɔn wɛ na mɔ? na e nyi ɖɔ omɛ kukuye mɔ nɔ fɔn gɛ; be mya gbɔ blo onu xena oxo xe ɖɔ:" Mi a ɖu, a bo nu, ɖo osɔ mi na ku". ³³ Mi nɔ kpɔn blɛ miɖe lɛye ɖu gɛ:" Ogbɛ nyinyla dido nɔ hɛn walɔ ɖagbwɛ sɔ xɔ gu". ³⁴ Mi gɔ vɔ ɖyɛ miɖe lɛye mɛ ganji, mi nɔ kpɔn gɔ blo onu nyinyla gɛ. Ɖo, omɛ ɖe lɛye le mimɛ, ye ka ma nyɔ Mawu gɛ, ŋunya ni wa mi. ³⁵ Omɛ ɖe hɛn, e na kan se ɖɔ naɖe wɛ omɛ kuku lɛye na fɔn ɖo ja-a? Na ye fɔn sɔn oku lɔ ɖe, gbaza bɔ tɔn ha wɛ ye na ɖo?. ³⁶ Oklenɔ! na a sɔ Jinukun ɖe do odo mɛ, ku wɛ e nɔ ku, hwɛkpo na wu. ³⁷ Jinukun xena a sɔ do odo mɛ nɛ lɔ, ninɔmɛ xena atin etɔn na wa ɖo, mɛ e ɖo, jinukun kpoŋu wɛ e nyi, e hɛn na nyi gbado alo ayi ma. ³⁸ E nɛ godo, Mawu wɛ nɔ na ninɔmɛ xeni jlo-e jinukun lɔ, jinukun lokpo-lokpo kpodo ninɔmɛ xena e na wa ɖo kpo. ³⁹ Gbaza lɛye kpokpo ma nyi onu lokpo lɛye nukunmɛ gɛ, gbɛtɔ we gbaza gbɔnvo, ohwe tɔn can bo gbɔn ovo gba. ⁴⁰ Oji we onu lɛye we gbaza le, anyizan ji we onu lɛye we gbaza can bo gɔ le. Ɖena oji we onu lɛye we gbaza nɔ dozo ɖo, e gbɔn vo na ɖena anyizan ji tɔn lɛye nɔ gbɔn ovo ɖo. ⁴¹ Ohwe we kinklɛn gbɔn ovo, osun tɔn can gbɔn ovo, sunhwlɛvi lɛye tɔn can bo gbɔn vo. Le sunhwlɛvi lɛye can mɛ, kinklɛn yetɔn lɛye can gɔ gbɔn ovo lokpo-lokpo. ⁴² Lemɔha ke wɛ e na wa le,le ohwe xenu na omɛ kuku lɛye na wa fɔn sɔn oku.Onu gbigble wɛ gbaza nyi na ye do sɔ-ɛ sɔ xɔ do odo mɛ,vɔ onu xeni na le ganji wɛ e na wa nyi bo na do fɔn sɔn oku; ⁴³ onu gbɛhɛn wɛ gbaza nyi na ye do sɔ-ɛ sɔ xɔ do odo mɛ,vɔ e na wa nyɔ kpinkpɔn a bo do fɔn sɔn oku,maɖo ogan nɔ wɛ gbaza lɔ nyi na ye do sɔ do odo mɛ,vɔ hɔnhlɔn nɔ titeŋugbe wɛ e na wa nyi le hwexenu na e na fɔn sɔn oku. ⁴⁴ Gbɛmɛ fi e we gbaza wɛ e nyi na ye do sɔ do odo mɛ,vɔ gbigbɔ we gbaza wɛ e na ɖo a bo do fɔn sɔn oku.Na gbɛmɛ fi e we gbaza le,be gbigbɔ mɛ we gbaza can bo le gba. ⁴⁵ Ewɛzɔn e nyi winwlan ɖɔ:Adamu gbɛtɔ tintan lɔ nyi omɛ le ogbɛ.Vɔ Adamu kpotwi lɔ bo nyi gbigbɔ xeni nɔ na ogbɛ lɔ. ⁴⁶ Vɔ,gbigbɔ mɛtɔn lɔ mɛ wa tintan gɛ,amɔ gbɛmɛ fi e tɔn lɔ wɛ wa tintan,wɛ gbigbɔ mɛtɔn lɔ jɛ godo ni. ⁴⁷ Gbɛtɔ tintan xena ye sɔ okɔ do blo lɔ,nyi ayizan ji fi e tɔn,gbɛtɔ awegɔ lɔ bo sɔn sɛxwe to mɛ. ⁴⁸ Ɖena omɛ xena ye sɔ okɔ do blo lɔ le,lemɔha ke wɛ,omɛ xeni le ayizan ji lɛ lɔ can le gba.Omɛ xeni le sɛxwe to mɛ lɛye bo le ɖi omɛ xeni sɔn sɛxwe to mɛ lɔ ha. ⁴⁹ Ɖena mi ɖo ninɔmɛ ɖi omɛ xena ye sɔ okɔ do blo lɔ ha,lemɔha lɔ ke wɛ mi na wa ɖo omɛ xeni sɔn sɛxwe to mɛ lɔ we ninɔmɛ ɖo nɛ. ⁵⁰ Anɛ evi lɛye mi,oxo xena un le ɖɔ lɔ wɛ nyi ɖɔ,gbaza kpodo ohun kpo ma kpego na ɖo mima le Mawu we axɔluɖuta mɛ gɛ,onu xeni nɔ jɔhun ma kpego na nyi onu xe mɔ nɔ jɔhun gɛ. ⁵¹ Ma ɖɔ onu hwihwla ɖe na mi.Mimɛ lɛye sese ma le ku xɔn gɛ,vɔ ye na ɖyɔ mi mɛ sese we ninɔmɛ, ⁵² le zɔnlokpo,le nukun xwixwe lokpo mɛ, le hwexenu na okpɛn kpotwi lɔ na ɖi.Ɖo okpɛn lɔ na ɖi,omɛ kuku lɛye bo na fɔn,a bo tlɔ zun onu magu-magu,ye bo na ɖyɔ miye lɛye we ninɔmɛ. ⁵³ E le dandan mɛ ɖɔ gbaza xeni nɔ nyɔ e xe lɔ,a sɔ gbaza xeni mɔ nɔ nyɔ lɔ gɛ sɔ xɔ do,wɛ gbaza xeni nɔ ku lɔ,na sɔ gbaza xeni mɔ nɔ ku gɛ sɔ xɔ do. ⁵⁴ Hwexenu na gbaza xeni nɔ nyɔ e xe lɔ na sɔ gbaza xeni mɔ nɔ nyɔ lɔ sɔ xɔ do,e wɛ gbaza xeni nɔ ku lɔ na sɔ gbaza xeni mɔ nɔ ku lɔ sɔ xɔ do,hwenɛnu wɛ oxo xena ye wlan lɔ na cɛ.Ye wlan ɖɔ:Ye va okun su do na oku gbidi-gbidi,wɛ ojiɖuɖu lɔ bo nyi blebu. ⁵⁵ Oku,bɔ wɛ ojiɖuɖu tɔwe lɔ le?Oku,bɔ wɛ ogan tlɔnlɔnlɔn xena a nɔ do hu omɛ lɔ le? ⁵⁶ Oku we ogan tlɔnlɔnlɔn nɛ lɔ wɛ nyi onu nyinyla,onu nyinyla we acɛ bo nɔ sɔn osɛn lɔ mɛ. ⁵⁷ Vɔ okpɛ na Mawu xeni na mi jiɖuɖu dogbɔn Aklunɔ mitɔn Jesu Klisi ji. ⁵⁸ E wɛ zɔn,nɔvi vɛna-vɛna ce lɛye,mi nɔ ote gliŋu,a bo lido,mi na gɔ bizo do Aklunɔ lɔ we ozɔn go hugan lemɔha,mi bo na nyɔ-ɛ ɖɔ ozɔn xena mi le wa na Aklunɔ lɔ xɔn,ma le nyi vɔvɔ na mi xɔn gɛ.