¹ Minyi nukɔn le owannyiyi lɔ mɛ a bo gɔ kpo apkakpa onu nina gbigbɔ mɛ tɔn lɛye kpo, na mya do yi ɖɔɖayiɖɔtɔ. ² Đo omɛ xeni ɖe ɖɔ oxo do ogbe ŋukɔ-ŋukɔ mɛ, ma gɔ le ɖɔ oxo xa gbɛtɔ ye gɛ,vɔ Mawu wɛ e le ɖɔ oxo na, Omɛti mɔ nɔ mɔ odo na gɛ ɖo e le ɖɔ oxo do gbigbɔ mɛ. ³ Vɔ, omɛ xeni ɖɔ ɖɔɖayi, le ɖɔ oxo na gbɛtɔ ye a bo do jɔ omɔ na ye, a bo do gɔ jɔ okɔ na ye. ⁴ Omɛ xeni le ɖo ogbe ŋukɔ-ŋukɔ le oxo xena e yɔ tesu le ɖɔ, vɔ ɖɔɖayiɖɔtɔ, agun lɔ wɛ ele ɖɔn do onu ɖiɖi mɛ. ⁵ Un jlo ganji ɖɔ mi mɛ lɛye kpokpo a do ogbe ŋukɔ-ŋukɔ, a bo nɔ yi oxo le Mawu si a bo do nɔ jloŋu xugan. Omɛ xeni le ɖɔ ɖɔɖayi xɔn klo xu omɛ xeni le do ogbe ŋukɔ-ŋukɔ ( adavo na omɛ ɖ le flɛn bo na do tin emɛ wɛ agun lɔ kpokpo na do yi nukɔn). ⁶ Vɔ anɛyevi lɛye mi, ma kan oxo xe se mi: na un wa mi de,bo ɖɔ oxo na mi do ogbe ŋukɔ-ŋukɔ mɛ, onu ganji bɔtɔn wɛ un ka blo na mi? un ma kpegogɛ,adavo na e nyi onu ɖe wɛ Mawu ɖe xlɛ-un wɛ un na mi; alo onu ɖe wɛ un nywɛ bo ɖɔ na mi; alo owɛn ɖe wɛ un yi le Mawu si bo do mi, alo onu ɖe wɛ un kplan mi. ⁷ Mi wa na mi a kpɔn onu do onuxonu lɛye go, mi a sɔ okpɛn, alo ohun, na ogbe xena ye le do xɔn ma gbɔn ovo na ɖe gɛ; naɖe wɛ ye na hɛn ɖo do nyɔ onu xena okpɛn lɔ le ɖɔ xɔn, alo onu xena ohun lɔ le ɖɔ xɔn? ⁸ E nyi na omɛ xeni le kun ahwankpɛn lɔ, ma kun ganji gɛ, mɛ wɛ ka na sɔ ahwan nu? ⁹ Lemake, enyi na mi ma ɖɔ oxo do ogbe xemɛ na mi se gɛ, naɖe ye na blo a do se onu xena mi le ɖɔ xɔn lɔ mɛ? Be oxo vɔvɔ wɛ e na nyi? ¹⁰ Ogbe xe le ogbɛ lɔ mɛ su, vɔ ogbe lɛye ɖo tin emɛ etɔn lokpo-lokpo. ¹¹ E ka le lemɔha co, na un ma se ogbe lɔ gɛ,be omɛ xeni le do xɔn lɔ na trɔ zun jonɔ na omɛ xeni le dowe xɔn lɔ; eyɔ can ka na trɔ zun akɔ ma segbe na nyɔ can ¹² Xena e nyi ɖɔ nunina gbigbɔ ɖeɖovo tɔn lɔ wɛ le vivɛ ɖe na mi, be mi bo din xena dɔn agun mitɔn do yi nukɔn, na ye a su le mi si. ¹³ Na omɛ xeni le xoɖɛ do ogbe nukɔ-ŋukɔ mɛ, ni byɔ Mawu na ni a nɔ kpego do tin ogbe nɛ lɔ mɛ. ¹⁴ Ɖo na un le xoɖɛ do ogbe lemɔha tɔn lɛye mɛ, be gbigbɔ ce can le xoɖɛ lɔ gba, vɔ nuywɛ ce ma le wazɔn gɛ. ¹⁵ Odin na ɖe na blo do? Na un xoɖɛ kpo gbigbɔ ce kpo, bo na xo kpo nunywɛ ce kpo gba, a bo go ji han kpo gbigbɔ ce kpo, bo ka na gɔ ji kpo nunywɛ ce kpo gba. ¹⁶ Xojɔxo, na a le dokpɛ na Mawu wɛ do gbigbɔ mɛ kɔ-kɔlɔ-kɔ, naɖe wɛ omɛ xeni le flɛn bo ma mɔ nukunnu jɛ emɛ gɛ na kpego na ɖɔ"Ami" na okpɛ we oɖɛ xena e le do na Mawu lɔ ɖo xɔn? ¹⁷ Na okpɛ dona Mawu we oɖɛ xena e le xo xɔn lɔ tlɛ jɔhun gbɔn ɖekpekpe, mɛɖyɛ ma mɔ dona gɛ. ¹⁸ Un do okpɛ na Mawu, ɖo e blo we nɔ do ogbe ŋukɔ-ŋukɔ lɔ xu mi mɛ lɛye kpokpo. ¹⁹ Vɔ, na un le agun mɛ, un nɔ din na do xogbe atɔn,xena ye na mɔ nukunnu jɛ emɛ,bo na do kplan onu mɛde lɛye, xugan ɖɔ ma do xogbe akpo awo(10.000) do ogbe ŋukɔ-ŋukɔ mɛ. ²⁰ Anɛevi lɛye mi, mi nɔ kpɔn nyi vikpɛvu le susu mitɔn lɛye mɛ gɛ; vɔ mi nyi vikpɛvu le onu xeni kunkplan onunyinyla; vɔ, mi nyi mɛxo le susu mitɔn lɛye mɛ. ²¹ E le winwlan le osen lɔ dɔ:" Aklunɔ lɔ ɖɔ mɔsi": dogbɔn omɛ xe ye ni nɔ do ogbe bu ye ji wɛ un na ɖɔ oxo na oto gun xe, jonɔ ye ji wɛ na gbɔn bo na do ɖɔ oxo na ye. E na le lemɔha coganco, ye ma gɔ le ɖo oto Mawu wɛ oxo lɔ xɔn gɛ. ²² I wɛ zɔn, ogbe vovweye dodo ma nyi josi ɖe na isenɔ ye gɛ, vɔ, maisenɔ ye wɛ e nyi josi na,ogbe ɖiɖo do Mawu nu ma nyi josi ɖe na maisenɔ ye gɛ, vɔ, isenɔ lɛye wɛ e nyi josi na. ²³ Na agun lɔ sese wa kpli, wɛ omɛ lɛye sese wa le do ogbe vovweye xɔn, na omɛ kpaa ye alo maisenɔ ye wa dyɛ mi mɛ, be ye le ɖɔ ɖɔ mye bo bɛ oha wɛɛ? ²⁴ Vɔ na omɛ lɛye sese le do ogbe bo le dɔ ɖɔɖayi, na maisenɔ ɖe alo omɛ kpaa ɖe lɛye wa, omɛ lɛye sese we oxo na ɖe xlɛ-ɛ ɖɔ omɛ nɛn alo omɛ kpaa nɛn lɛye bo le onu nyinylan mɛ, wɛ omɛ lɛye sese we oxo na do ohwe ni-i. ²⁵ Onu hwihwla xeni le ayixa me na ye, na wa jɛ agbaŋugba, ewɛ e na cɔn nukun mɛ anyi, a bo sɛn Mawu, a bo ɖɔ Mawu bo le mimɛ xojɔxo. ²⁶ Odin ɖe, anɛevi lɛye mi, ani mi do na blo? na mi wa kpli, na omɛ ɖe ɖo ohan ɖe bo na ji, alo onu kplan omɛɖe, alo onu mimɔ ɖe, ogbe ŋukɔ-ŋukɔ ɖe wɛ omɛ ɖe ja do, alo a na tinmɛ ogbe ŋukɔ-ŋukɔ lɛye tɔn wɛ, mi blo kpokpo na agun lɔ a do hwen le yise mɛ. ²⁷ Na e nyi ɖɔ ye na do ogbe ŋukɔ-ŋukɔ wɛ, omɛ awe alo na e su din omɛ atɔn ni do e bo na nyi ɖe jɛ ɖe godo, omɛ ɖe bo na na tinmɛ etɔn na ye. ²⁸ Na tinmɛ etɔn male gɛ, ye ni bo bɔ onu le agun lɔ mɛ, ogbe ŋukɔ-ŋukɔ dotɔ lɔ ni do na eɖe, a bo do na Mawu. ²⁹ Na e nyi ɖɔ Mawu ɖɔ oxo na omɛ ɖe ye bo ja ɖɔ oxo e nɛ lɔ, omɛ awe alo omɛ atɔn ni ɖɔ, omɛ gbokpwe ɖyɛ lɛye bo na glo kpɔn. ³⁰ Vɔ, na omɛ ɖe le flɛn, Mawu bo ɖe onu sɔ xlɛ-ɛ, be omɛ xeni o le ɖɔ oxo xɔn lɔ, ni bo bɔ nu. ³¹ Mimɛ lɛye kpokpo hɛn mi na ɖo ogbe do Mawu, vɔ e do na nyi ɖe xodo ɖe, e nɛ omɛ lɛye kpokpo na do yi okplan le mɛ a bo do mɔ ojidido. ³² Gbigbɔ xeni nɔ zan ɖɔɖayiɖɔtɔ Mawu tɔn lɛ, le ɖɔɖayi lɔ we acɛ gɔ. ³³ Ɖo, Mawu ma nyi onu hannya-hannya biblo we Mawu gɛ, vɔ fifa we Mawu wɛ e nyi. Ɖi ɖena e nɔ yi ɖo le yise nɔ ye we agun lɛye kpokpo mɛ ɖo ha, ³⁴ Nyɔnusi lɛye ni nɔ bɔ onu le agun lɛ mɛ, jlɔjɛ ma le na ye na ye na nɔ do ɖɔ oxo gɛ, ye ɖo na nɔ sɔ yeɖe sɔ hwe ɖi ɖena osɛn lɔ ɖɔ ɖo ha. ³⁵ Na ye le din na mɔ do na onu ɖe, ye ni nɔ kan yesu ye se xwɛgbo, ɖo e jɔhun ɖɔ nyɔnusi na ɖɔ oxo le agunmɛ gɛ. ³⁶ Mye de wɛ Mawun we oxo lɔ jɔ xɔn? Alo mye kɛlɛ de wɛ e wa?. ³⁷ Na omɛ ɖe kan do eji ɖɔ mye bo nyi Mawu we ɖɔɖayiɖɔtɔ alo mye bo le gbigbɔ mɛ, e ɖona nyɔ-ɛ ɖɔ onu xena un le wlan na mi xɔn xe, Aklunɔ lɔ we ogbe ɖiɖe bɛ e bo nyi. ³⁸ Na omɛ ɖe ma nyɔ enɛ lɔ wi gɛ, be Mawu can ma nyɔ-ɛ gbagɛ. ³⁹ E wɛ zɔn anɛevi lɛ, mi din na mya nyi ɖɔɖayiɖɔtɔ Mawutɔn, mi nɔ kpɔn ka gbɛ ogbe ŋukɔ-ŋukɔ dido na mɛɖe gɛ. ⁴⁰ Vɔ, mi blo onu kpokpo ɖo ɖena e jɛ ɖo kpodo tito kpo.