¹ Na un nɔ do ogbe xena gbɛtɔ lɛye nɔ do,bo nɔ gɔ do ogbe xena wɛnzangun Mawu tɔn lɛye nɔ do can,na un ma ka ɖo owanyiyi gɛ,be un le ɖi ohun alo ogan xeni le vɛ oto mɛ na omɛ ye ha. ² Na un gɔ ɖo ɖɔɖanyiɖɔtɔ we onunina, bo mɔ onu jɛ xeni le mi mɛ lɛye kpokpo, bo nyɔ onu lɛye sese wi, wɛ na un gɔ do ɖo onu ɖiɖi gbɔn bo nɔ hɔn oso ye can, na un ma ɖo owanyiyi gɛ, be un ma nyi onu ti gɛ. ³ Na un na gɔ ma dɔkun ce lɛye kpokpo, bo jo nyɔ tesu do wɛ ye gɔ do tɔzo can, na un ma ɖo owanyiyi gɛ, be ale ti ma le mɛ naŋu gɛ. ⁴ Wanyiyi nɔ do oji, bo nɔ nyɔ dɔmɛ, onu mɔ nɔ ci nukun ji nyi gɛ, e mɔ nɔ jla eɖe gɛ, e ka mɔ nɔ nyi ogo gɛ. ⁵ Wanyiyi mɔ nɔ blo ŋunya ti gɛ, e mɔ nɔ vi do eyɔ do kponɔ tɔn mɛ gɛ, e mɔ nɔ do aɖi gɛ, e ka mɔ nɔ hɛn mɛ do dɔmɛ gɛ. ⁶ E mɔ nɔ mɔ awa jijɛ do omɛ tafu go gɛ, oxo joxo wɛ nɔ nyi awa jijɛ ni-i. ⁷ E nɔ sɔ onu lɛye kpokpo sɔ xɔ kɛ omɛ, e nɔ kan do onu ɖekpokpwe ji, bo nɔ gɔ ɖo nukun diɖo le onu ɖekpokpwe mɛ, bo nɔ gɔ do oji onu lɛye sese mɛ. ⁸ Wanyiyi ma ɖo vivɔnu gɛ.Ɖɔɖanyi ɖiɖɔ na wa vɔ,ogbe vovwe dido na wa ɖote,onu nyinywɛ ye bo na wa vɔ. ⁹ Ɖo onunyinywɛ mitɔn ɖo odo,ɖɔɖanyi ɖiɖɔ can bo ɖo odo gba, ¹⁰ vɔ,ohwexenu na onu xeni sɔgbe lɔ na wa wa,onu xeni ma sɔ ogbe gɛ lɛye na bu. ¹¹ Hwexenu na un le ovu un nɔ ɖɔ oxo ɖi vikpɛvu ha,un nɔ bu ota mɛ ɖi vikpɛvu ha,un nɔ mɔ nukunnu jɛ onu mɛ ɖi vikpɛvu ha,vɔ xena un wa hwɛn,un jo onu vikpɛvu tɔn lɛye do. ¹² Odin onu mimɔ mitɔn le fiti-fiti,ɖi omɛ xeni le mɔ onu gbɔn nukpwɛ mɛ fiti-fiti mɛ ha,vɔ na e wa ya,mi na mɔ onu lɛye sese ceɖe-ceɖe.Le odin,onu xena un nywɛ, na e wa ya onu na un nywɛ ma le ɖo vivɔnu gɛ,ɖi ɖena Mawu nywɛ ɖo ha. ¹³ Onu atɔn xeni na nɔ anyi gbɔɔn kaka doyi-doyi lɛye ɖiye:Onuɖiɖi,nukunɖiɖo,owanyiyi,vɔ le onu lɛye sese kpo mɛ wanyiyi wɛ le ota ji.