¹ Anɛevi lɛye mi, le gbigbɔ mɛ we onu nina ye we akpa xwe, un ma jlo ɖɔ mi na le ma nywɛ mɛ. ² Mi nywɛ ɖɔ hwexenu na mi do yi kosi,yɛhwe ɖe wɛ onu lɔ nɔ dɔn mi do yi magli-magli.Yɛhwe ka mɔ nɔ ɖɔ oxo gɛ. ³ Ewɛzɔn,un ɖɔ na mi ɖɔ,omɛ xena Mawu we gbigbɔ ɖɔ oxo gbɔn e jixɔn ti mɔ nɔ ɖɔ ɖɔ:"Jesu,ahelu na we gɛ."Lemɔha ke,omɛ ɖe ma kpego na ɖɔ ɖɔ:"Jesu wɛ nyi Aklunɔ!Na e ma nyi ɖɔ gbigbɔ ɖeɖovo tɔn wɛ ɖɔ gbɔn e ji gɛ. ⁴ Onunina hamɛ-hamɛye wɛ le,vɔ gbigbɔ lokpo lɔ jan wɛ nɔ na, ⁵ Mawu we ozɔn vovweye wɛ le,Aklunɔ lokpo lɔ jan wɛ ye nɔ blo ye na; ⁶ walɔ ŋumɛ-ŋumɛ wɛ le na ye nɔ do wa ozɔn lɔ,vɔ,Mawu lokpo gee jan wɛ nɔ blo le ye mɛ lɛye kpokpo mɛ. ^{7 8} 7 Gbigbɔ lɔ nɔ ɖe hɔnhlɔn etɔn sɔ xɔ xlɛ le omɛ lokpo-lokpo we gbɛzan mɛ,e bo na do nyi ale na yemɛ lɛ kpokpo. ⁸ Gbigbɔ lɔ nɔ na na omɛ ɖe lɛye nɔ ɖɔ oxo kpodo onu nyinywɛ kpo,e yɔ lokpo lɔ ke nɔ na omɛ ɖe lɛye nukunnu mɔ jɛ onu go. ⁹ Gbigbɔ lokpo lɔ ke nɔ gɔ na onu ɖiɖi omɛ ɖe lɛye,e yɔ lɔ lokpo ke nɔ gɔ na onunina azɔnhɛngbɔ tɔn omɛ ɖe lɛye; ¹⁰ gbigbɔ lokpo lɔ ke nɔ gɔ na hɔnhlɔn omɛ ɖe lɛye wɛ ye nɔ do blo onujiwu,bo nɔ gɔ na omɛ ɖe lɛye wɛ ye nɔ do ɖɔ ɖɔɖayi,gbigbɔ lɔ nɔ gɔ na omɛ ɖe lɛye hɔnhlɔn na ye na do nyɔ ovo gbingbɔn xeni le gbigbɔ vovweye mɛ,e yɔ lokpo lɔ ke nɔ na na ye nɔ do ogbe vovwe ye,e bo gɔ nɔ na na omɛ ɖe lɛye nɔ tin ogbe vovwe ye mɛ. ¹¹ Gbigbɔ lokpo gee enɛ lɔ jan wɛ nɔ wa ozɔn enɛ lɛye kpokpo,ɖena e jlo-e ɖo wɛ e nɔ na omɛ lɛye kpokpo ɖo. ¹² Gbɛtɔ we gbaza nyi onu lokpo coganco,bo ɖo awujɔnu susu,awujɔnu enɛ lɛye bo su,coganco ye bo blo gbaza lokpo ge,lemɔha ke Klisi lɔ can le ɖo nɛ. ¹³ Jwifunu,omɛ xeni ma nyi Jwifunu gɛ o,omɛ xixɔ o,omɛ xeni le eɖe si o,gbigbɔ lokpo lɔ wɛ ye sɔ do lɛ osin na mi,wɛ mi do tlɔzun gbaza lokpo,gbigbɔ lokpo lɔ jan wɛ mi nu. ¹⁴ Ɖo,awujɔnu lokpo ge mɛ blo gbaza lɔ gɛ,vɔ awujɔnu susu wɛ le. ¹⁵ Na afɔ ɖɔ ɖɔ xena miye bo ma nyi alɔ gɛ,be miye bo ma nyi gbaza lɔ tɔn gɛ,e nɛ lɔ wɛ na zɔn e na do gɔn gbaza lɔ we akpa ɖe ma nyi? ¹⁶ Na oto ɖɔ ɖɔ xena miye bo ma nyi nukun gɛ,be miye bo ma nyi gbaza lɔ tɔn gɛ,e nɛ lɔ wɛ zɔn e na do gɔn akpa ɖe gbaza lɔ tɔn ma nyi? ¹⁷ Na gbaza lɔ kpokpo do yi nukun na ɖe e na blo do se onu?Na gbaza lɔ kpokpo ka do yi oto le na ɖe e na blo ɖo a do sɔ owan na onu? ¹⁸ Vɔ,Mawu ɖo awujɔnu lokpo-lokpo do gbaza lɔ go ɖi ɖena e jlo ɖo ha. ¹⁹ Na gbaza lɔ sese do nyi onu lokpo wɛ,be gbaza na gɔ le do o? ²⁰ E wɛzɔn,awujɔnu susu wɛ le,vɔ gbaza lokpo gee wɛ le. ²¹ Nukun ma kpego na ɖɔ na alɔ ɖɔ miye bo ma ɖo hudo etɔn gɛ,ota ka ma kpego na ɖɔ na afɔ ɖɔ miye bo ma ɖo hudo etɔn gɛ o. ²² Vɔ hugan lemɔha ke,gbaza we awujɔnu xena ye nɔ mɔ ɖɔ hɔnhlɔn bo ma le ye go gɛ,wɛ le vivɛɖe; ²³ awujɔnu xena mi nɔ mɔ lɔ susu le bo ma jɛxa ye gɛ,e wɛ mi nɔ gɔ wle obo na ganji,xe we nyikɔ na ye mɔ nɔ yɔ vaŋu gɛ lɛye,ye ji wɛ ayixa nɔ le taŋu, ²⁴ mi bo nɔ jɔ xeni nyɔ kpinkpɔn lɛye do lemɔha.Vɔ, Mawu ɖo gbaza lɔ ɖo ɖe,na a nɔ do ɖo sisi ganji na awujɔnu xe na sisi hwe do ye. ²⁵ e nɛ mima ma gɔ ja le gbaza lɔ mɛ ba gɛ,vɔ gbaza lɔ we awujɔnu lɛye na nɔ do wle obo na yeɖe lɛye. ²⁶ Na awujɔnu ɖe le se vivɛ xɔn,awujɔnu gbokpwe lɛye kpokpo wɛ nɔ se vivɛ xɛ,na ye do gigo awujɔnu ɖe go,awujɔnu gbokpwe lɛye sese nɔ mɔ jijwe xɛ-ɛ. ²⁷ Klisi we gbaza wɛ miye mi nyi,omɛ lokpo-lokpo bo nyi awujɔnu le gbaza lɔ go. ²⁸ Mawu bo can omɛ ɖo anyi le agun lɔ mɛ,tintan tɔn wɛ nyi omɛdɔntɔ lɛye,awegɔ bo nyi ɖɔɖanyiɖɔtɔ lɛye,atɔngɔ bo nyi onu kplan omɛtɔ lɛye,e nɛ godo wɛ ye na mɔ nujiwu blotɔ lɛye,azɔngbɔna omɛtɔ lɛye,alɔ gɔna omɛtɔ lɛye,nukɔnnɔ tɔ lɛye,ogbe vovwe do tɔ lɛye. ²⁹ Omɛ lɛye sese wɛ nyi omɛdɔntɔ lɛye?Omɛ lɛye kpokpo wɛ nyi ɖɔɖanyiɖɔtɔ?Omɛ lɛye sese jan wɛ nyi osɛn kplan omɛtɔ?Omɛ lɛye sese jan wɛ ka ɖo onunina nujiwu biblo tɔn? ³⁰ Omɛ lɛye sese wɛ ɖo onunina azɔn hɛngbɔ tɔn?Omɛ lɛye sese jan wɛ nɔ do ogbe vovwe ye?Omɛ lɛye sese jan wɛ ka nɔ tin ogbe vovwe ye mɛ? ³¹ Xena e nyi ɖo lemɔha,mi din onunina xeni le vivɛɖe lɛye.Wɛ,na xlɛ mi omɔ xeni jɔhun hugan omɔ lɛye sese.