¹ Anɛevi ye mi, un ma jlo ɖɔ mi a nɔ manyɛ mɛ ɖɔ: dagbo mitɔn lɛye kpokpo wɛ zɔn zɔnlin le sunwɔ mɛ, ye mɛ lɛye kpokpo bo gbɔn oxu mɛ wayi. ² E le ɖi Mawu we osin wɛ ye lɛ na ye ha le sunwɔ lɔ mɛ kpodo oxu lɔmɛ kpo ha na ye a do yi lokpo xa Myizi. ³ Gbigbɔ mɛ we onu ɖuɖu lokpo nukunmɛ lɛ wɛ ye mɛ lɛye kpokpo ɖu, ⁴ Bo nu gbigbɔ mɛ we osin lokpo lɛye, ɖo gbigbɔ mɛ we okpɛn ɖaxo xeni le kplan ye xɔn lɔ, we osin wɛ ye nu, okpɛn ɖaxo nɛ lɔ wɛ wa nyi Jesu Klisi. ⁵ Coganco, omɛ susu le ye mɛ, wɛ ogbɛ yetɔn ma jɛ xa Mawu gɛ, ewɛzɔn ye do ku le gbetlotlomɛ. ⁶ Onu nɛ lɛye jɔ, bo na do yi kpɔnde go na mye, enɛ, mi ma gɔ do le ɖo ojlo nyinyla ɖiɖe na ye lɛye jlo ɖo ha gɛ. ⁷ Mi nɔ kpɔn trɔ zun yɛhwe sɛn tɔye ɖi ɖena omɛ ɖe lɛye blo ɖo le ye mɛ ha gɛ. Ɖi ɖena ye wlan ɖo le Mawu we oxo mɛ ɖɔ:" Togun lɔ flan anyi, bo ɖu, bo nu, e nɛ godo ye ci te bo wa yi da ayi hun". ⁸ Mi nɔ kpɔn jo miɖe do na ogbɛ ɖuɖu zinzan gɛ di dena omɛ ɖe lɛye blo ɖo le ye mɛ ha, e nɛ lɔ bo zɔn wɛ gbɛtɔ akpo oko atɔn (23.000) ku le gbelokpo. ⁹ Mi nɔ kpɔn tɛn Aklunɔ kpɔn gɛ ɖi ɖena omɛ ɖe lɛye blo le ye mɛ ha gɛ, odan lɛye bo ɖu ye, ye bo ku. ¹⁰ Mi nɔ kpɔn gɔ hlu do nu mɛ gɛ, ɖi ɖena omɛ ɖe lɛye blo ɖo ha gɛ, wɛ owɛndotɔ Mawu tɔn xeni nɔ va mɛ su do, bo va ye su. ¹¹ Onu nɛ lɛye jɔ do ye ji, na ni a do yi kpɔndego, ye bo wlan ye ɖo ayi, bo na do kplan onu mi, ɖo mi le vivɔnu ye we ogan mɛ. ¹² Bwɛzɔn, omɛ xeni le bu-i ɖɔ mye bo le ote,ni cɔ eɖe, na ni nɔ kpɔn do wa jɛ anyi gɛ. ¹³ Tintɛnkpɔn xemɛ na mi le gbɔn ye xɔn,e ma xugan gbɛtɔ gɛ, gbejinɔtɔ wɛ nyi Mawu, e ma ja ɖe omɔ na tintɛnkpɔn xugan hɔnhlɔn mi tɔn lɛye na wa mi ji gɛ. Le tintɛnkpɔn mɛ e na na mi ayixa xena mi na do tɔn le emɛ, kpodo hɔnhlɔn xena mi na do doji le e nu kpo mi ¹⁴ Bwɛzɔn, omɛ vɛna-vɛna ce, mi si na yɛhwe sinsɛn. ¹⁵ Un le ɖɔ oxo na mi xɔn ɖi ɖena ye ɖɔ oxo ɖo na onu nywɛ tɔ ha ɖo, mye tesu ye, mi bo gbeje oxo lɔ kpɔn. ¹⁶ Dona we gannu xe ji na mi nɔ do okpɛ ɖo, okan cica mɛ mɛ mi nɔ do ɖyɛ xa Klisi lɔ? kpɔnnɔ xena mi nɔ ma lɔ, okan cica mɛ mi nɔ do byɛ xa Klisi lɔ we gbaza? ¹⁷ Xena enyi ɖɔ kpɔnnɔ lokpo gee wɛ le, mi mɛ lɛye kpokpo bo su co ganco,bo wa trɔ zun gbaza lokpo gee, ɖo mi mɛ lɛye kpokpo nɔ ma kponnɔ lokpo gee nɛ lɔ ɖu. ¹⁸ Mi kpɔn Izlayɛli we vikpɛye, omɛ xeni nɔ ɖu olan xena ye nɔ do san avɔye, yee kpodo Mawu xetɔn ni nyi avɔsinsan we agba lɔ kpo mɛ le okan cica lokpo mɛ wɛ? ¹⁹ Ani wutu wɛ un le ɖɔ oxo nɛ xɔn? A do ɖɔ olan xena ye do san avɔ na yɛhwe ye kpo yɛhwe lɛye kpo bo nyi onu ɖe wɛɛ? ²⁰ Gbeɖe kpɔn. Vɔ, xena e nyi ɖɔ gbigbɔ mawe wɛ ye san avɔ nɛ lɛye na ma nyi Mawu gɛ wɛ, un ma jlo na mi a byɛ okancica mɛ xa gbigbɔ mawe gɛ. ²¹ Mi ma kpego bo le nu onu Aklunɔ we gannu mɛ gɛ, a bo wɛ yi nu le gbigbɔ mawe tɔn mɛ xɔn, mi ka ma kpego bo na ɖu Aklunɔ lɔ we onu ɖuɖu, a bo gɔ ɖu gbigbɔ mawe tɔn gɛ. ²² Alo mi le din na Aklunɔ lɔ a bɛ awuhwinhwan wɛ? Mi ɖo hɔnhlɔn xugan Aklunɔ lɔ wɛ?. ²³ Omɛ ɖe lɛye nɔ ɖɔ mɔ sin:" omɔ le wɛ mi na do blo onu ɖekpekpe." Xojɔxo wɛ, coganco kpokpo mɛ na ɖo we gɛ. " Omɔ le, na mi na do blo onu ɖe kpekpe". Vɔ onu lɛye kpokpo mɛ nɔ na na wɛ ye nɔ yi nukun gɛ. ²⁴ Omɛ ti ni kpɔn din eyɔ tesu we ale gɛ, vɔ ni din omɛ gbokpwe ye tɔn. ²⁵ Onu ɖekpekpe xena ye nɔ sa le axi mɛ, A emɛ min na ɖu gɛ, ayixa mitɔn ni nɔ kpɔn do tagba na mi a nɔ kpɔn do do nu e mɛ gɛ. ²⁶ Ɖo, Mawu we oxo lɔ ɖɔ ɖɔ:" Anyizan kpodo onue xeni le eji lɛye kpokpo wɛ nyi Aklunɔ Mawu tɔn". ²⁷ Na kosi ɖe yɔ mi na mi na do ɖu onu, na mi na yi ogbe bo yi, mi ɖu onu ɖekpekpe xena ye na xwle mi ye, kpokkp, ayixa mitɔn ni nɔ kpɔn do tagba na mi na mi a kan oxo ɖe se do onu ɖuɖu lɛye go gɛ ²⁸ Vɔ, na mɛɖe ɖɔ na mi ɖɔ olan xena ye bo do san avɔ na yɛhwe bɛ, mi nɔ kpɔn ɖu gɛ, ɖo omɛ xena xokpa na mi lɔ wutu, enɛ ayixa mɛ na do vo na mi. ²⁹ Omɛ lɔ we ayixa we oxo wɛ un le ɖɔ le fi, e ma nyi ayixa mitɔn we oxo mɛ gɛ. " Onu xena omɛ bu na lɛn le ayixa etɔn mɛ, wɛ na zɔn wɛ nyɔ na gɔ ja do vo a do blo onu xeni jlo un gɛ. ³⁰ Na un le do okpɛ na Mawu do onu xena un le ɖu xɔn ji, a ni wutu wɛ ye na do ɖɔ oxo nyinyla do guye ɖo okpe xena un le do do onu ɖuɖu ji xɔn? ³¹ Onu wɛ mi le ɖu xɔn, alo onu wɛ mi le nu xɔn, alo onu ɖekpekpe xena mi gbɛ le blo xɔn, mi blo kpokpo a do do gigo na Mawu. ³² Mi nɔ kpɔn yi afɔ klɛnnu na Jwifu ye kaka bo do nyi na omɛ xeni ma nyi Jwifuye alo Mawu we agun lɔ gɛ. ³³ Un blo ɖi ɖena nyɔ can gba nɔ blo ɖo ha,un nɔ jɛ tagba a do nyɔ kpinkpɔn na omɛ lɛye kpokpo le onu lɛye kpokpo mɛ, un ka mɔ nɔ din nyɔ tesu we ale gɛ, vɔ, omɛ susu we ale wɛ un nɔ din, omɛ ye bo na do mɔ hwɛngan.