¹ Vɔ lɔ Titu nu ke na sɔgbe kpo okplan adodoe lɔ o na lɔ ye. ² Lɔ na ŋusunglo nyɔnxonɔye tun ye mɔ nɔ wa onu do ojlɛji, abo nyi ɛmɛ ke na sisi jɛna ye, a bo nɔ bu tamɛ gbɔxwe awa onu, ye mɔ syɛnxu le xɔse, owannyinyi, kpo do vivɛnu dido mɛ. ³ ɖemɔha ke, lɔ na nyɔŋusi nyɔxonɔye tun ye mɔ nɔ wa onu ɖi kena e jɛ na ɛmɛ ke nɔ zan ɛgbɛ mimɛ ye nɔ wasi ɖo ha, ye ni ko nyi ɛmɛxolɔtɔye, ye ni mɔ ko jo yeɖe do na ahannunu. Ye ɖo na nɔ na okplan nywɛ ye; ⁴ exin, ye mɔ do kplan nyɔŋusi winwyan ke le osu xwe ye tun ye mɔ nyi owan na yeswɔye kpodo vikpɛ yetɔnye. ⁵ A bo nɔ bu tamɛ gbɔxwe a do wa onu, a bo nyi ɛmɛ mimɛ ye, a bo nɔ wa xwegbe we odanye nywɛnɖe, a bo ɖo walɔ nywɛ, a bo nyɔ dɔmɛ dodan yeɖeye,ye mɔ nɔ sɔ yeɖe sɔ hwe na yeswɔye, exin, ɛmɛti ko mɔ kɔn acɔn do Mawu we oxo lɔ wu nɔ. ⁶ Do akpakpa lanmɛ na hwanjɛviye can, na ye a nɔ bu tamɛ gbɔxwe a nɔ wa onu. ⁷ Le onu bisese mɛ, lɔtete oɖo na nyi kpɔndo ewu le odan nywɛye wiwa mɛ, onu kpinkplan tɔwe ye ni nyi adodoe, a bo sɔgbe. ⁸ Nɔ lɔ oxojɔxo mimɛ ke wu onudindɔn ti hɔn le ewu nɔ, exin, ŋunyan mɔ va wa kɛntɔ, e ko mɔ kpɔn oxo nyinyla ti a lɔ do míawu nɔ. ⁹ Kanumyɔnɔye ɖo na nɔ se tonu na oga yetɔnye le onu bisese mɛ. Ye ɖo na nyɔkpɔn na oga yetɔnye kpo onu dindɔn ti ko nɔ dodomɛ na ye nɔ. ¹⁰ Ye ko ɖo na nɔ fin onu do oga yetɔnye. Vɔ, ye ɖo na nɔ ɖe ogbeji ninɔ kpikpe sɔ xlɛ ye tɛgbɛ, exin, ye mɔ do ɖo sisi Mawu hwlɛngantɔ míatɔn we okplan lɛye wu. ¹¹ Ɖo Mawu we ɛfɛnu ke nyi jɔtyɔn hwlɛngantɔn lɔ osɔ eɖe sɔ xlɛ gbɛtɔye bisese. ¹² Ɛfɛnu Mawutɔn o kplan mi nɔ tun mi mɔ jo sisi maɖo na Mawu kpo ɛgbɛmɛ bwɛ we ojlo nyinylaye do. Exin, le egbɛ egbetɔn ke mɛ, mí mɔ do bu tamɛ gbɔxwe a wa onu, a bo nyi ɛmɛ ke sɔgbe,a bo nɔ ɖo sisi na Mawu le ɛgbɛ ninɔ míatɔn mɛ, ¹³ le hwekenu mi na tre kpɔn omɔkpikpɔn ke na na mi na nyi nyɔnanɔ lɔ nɔ, a bo mɔ tre kpɔn gigo kena Mawu ɖaxo míatɔn kpodo hwlɛngantɔ míatɔn Yesu Klisu na va ɖe xlɛ. ¹⁴ Yesu sɔ eɖe sɔ na do ota míatɔn mɛ, a bo do trɔ xɔ mi le ogufinfɔn ɖekpokpwe si a bo mɔ do sra ɛwu na mí na elɔ tete a bo do sɔ mi do wasi ke e can do ovo ke komɛ na nɔ cii do odan onywɛye wu. ¹⁵ Lɔ oxo xin lɛye a bo do do akpakpa lanmɛ na ye do onu ke lɛye wu. Gbɛ onu naye kpo acɛ kpikpa kpo. Ko na ɛmɛɖe a kɔn acɔn do wu we.