¹ Blɔ Pɔlu, ɛmɛdindɔn odansɔvi Mawutɔn, le Klisu Yesu mɛ wɛ wlan wema ke a do kplɔ ɛmɛ ke Mawu can ye gbɔn xɔse mɛ na ye a do nyɔ oxojɔxo lɔ a do zan ɛgbɛ ke na na ɖo sisi na Mawu wu. ² Oxo xin lɛye ke xin nɔ onyi do omɔkpinkpɔn na ɛgbɛ mavɔ ke we oxo na Mawu, ke hɔn nɔ kán ojo, kán atanŋu etɔn sɔn xoxoxo gbɔxwe na ɛgbɛ lɔ va jɔ. ³ Le ganxinlɔ mɛ, Xwetɔ Mawu wa oxo xin lɔ we odan gbɔn tito ke ji na ko na gbɔn a do lɔ oxo ke na Mawu sɔ naa lɔ tɔn. ⁴ Ovi tɛye Titu, le xɔse ɖokpo míatɔn mɛ. Fifa kpo ɛfɛnu ni kɔn do jiwe gbɔn míawe Xwetɔ Klisu Yesu hwlɛngantɔ míatɔn we nyikɔ mɛ. ⁵ Do exin lɔ wu, ko jo we do Klɛti, na do wasi titoye do odan gbokpwe ke drɔn ye wu a bo mɔ ɖo agunmɛhyɔnye ɖokpo ɖokpo do toxo ɖokpo ɖokpo ye mɛ ɖi kena ko lɔ na we ɖo ha. ⁶ Oxo nyinyla ɖe hɔn ɖo na ɖi do agunmɛhyɔn lɛye wu o. Agunmɛhyɔn ɖokpo ɖokpo ɖo na ɖe nyɔnu ɖokpo gee, vikpɛ yetɔnye ɖo na nyi xɔsetɔ, ye ko na nɔ ɖe afɔ nyinyla ɖe alo ye mɔ do tonumase we ɛhwɛ ɖe na ye o. ⁷ E le vivɛ ɖe tun onujikpɔntɔ ke nyi agunkplɔtɔ Mawu tɔn ha, ye hɔn ɖo na kpɔn oxo nyinyla ɖe a lɔ do ewu o. Ye hɔn ɖo na ɖe kunnu nyinyla ti sɔn ewu, e hɔn ɖo na nɔ kán ogbe na ɛmɛ, e ko na nyi aɖidotɔ, ɛvunxotɔ, ahannutɔ, ɛmɛhoɖutɔ, kankunɔ o. ⁸ Vɔɔ e ɖo na nyi jonɔyitɔ ganji, a bo yi owan na onunywɛ, a bo nɔ ɖu le eɖe ji, a bo nɔ bu tamɛ gbɔxwe a wa onu ye, a bo nyi ɛmɛ jijwɛ, ɛmɛ mimɛ. ⁹ E ɖo na bla eɖe do oxojɔxo kpo onukpinkplan ke ye sɔ nii ye wu a do kpewu a do akpakpa lanmɛ na ɛmɛ gbokpwe ye kpo okplan ganjiye a bo mɔ dɔn ɛmɛ ke tɔtate na oxo lɔ nɔ ye do omɔ nywɛ ji. ¹⁰ Le oxojɔxo mɛ, le xɔsetɔye mɛ (Jwifuye) bo nyi aglajɛtɔye, oxovlolɔtɔye, kpo ɛmɛblɛɖutɔye. ¹¹ O ɖo na ɖoyete. Ye nɔ hɛn hwɛndoye gba Ye nɔ sɔ onukpinkplan buye a va kplan ɛmɛ ye nɔ, a bo do xo ɛmɛye ɖu nɔ. ¹² Oxolɔɖenyitɔ ɖokpo le ye mɛ bo lɔ tun byo: "ojo wɛ Klɛtitɔye nɔ kan tɛgbɛ, kanlin danuwatɔye, ɖiɖɔnɔ wɛ ye nyi, ye hɔn mɔ nyɔ onuɖe zɛ onuɖuɖu wu." Oxojɔxo wɛ nyi oxo kena oxolɔɖ'onyitɔ lɔ lɔ do ye wu, ¹³ i wɛ dɔn ona gbɛ onu na ye taŋutɔn na ye a do ɖo xɔse kpikpe ɖi ke ejɛ ɖo ha. ¹⁴ Na mi hɔn mɔ do ɖo onu le otan Jwifuye tɔn ye alo osɛn ɛmɛ ke nɔ tɔ tate na oxojɔxolɔye mɛ nɔ. ¹⁵ Onu bi le mimɛ na ɛmɛ ke le mimɛye, vɔ ɛmɛ ke doɖyu ye, ye ko mɔ yi Yesu se ye, onuti hɔn mɔ le ye wu ɖo onu nyinyɔ yetɔnye kpo ayixa yetɔnye kpo bi ododyu. ¹⁶ Ye nɔ le ɖi ɛmɛ ke nyɔ Mawu ha, vɔ odanwiwa yetɔnye bo ɖexlɛ nɔ tun ye mɔ hɔn nyɔ Mawu lɔ. ɛmɛ xinye hɔn kpewu mɔ na wa odan nywɛ ti, ɖóo ye o nyi ogufɔntɔye. ɛgbɛ yetɔnye bo xyɛwu. Ye ko mɔ kpewu na wa odan onywɛ ti.