¹ O na flin na ye tun ye mɔ ɖo sisi na osɛndanwatɔye kpo otogaye a bo se tonu na ye, a bo do le gbesisɔ na odannywɛye wiwa. ² Mɔ flin na ye tun ye ni mɔ ka kɔn acɔn do ɛmɛɖe wu, a bo ka mɔ wa ojlɛ kpo ɛmɛti, a ɖo dɔmɛ fàa do ɛmɛ bi wu, a bo nɔ nyɔ dɔmɛ do ɛmɛye wu. ³ (Vɔ hwekenu na Mawu we dɔmɛ nyinyɔ kpo owanyinyi etɔn va nyi sisɔ xlɛ gbɛtɔye,) ɖòo míye can mí vɛ toli san, bo bu omɔ Mawutɔn san, bo zun odansɔvi na onu nyinylaye, bo le ɛgbɛ le gbaza we onuwiwaye mɛ,le ŋubya mɛ, ɛmɛye nɔ gbɛwan na mí, míye can mɔ nɔ gbɛ owan na míaɖeye. ⁴ Vɔ hwekenu na Mawu hwlɛngantɔ míatɔn we dɔmɛ nywɛ kpo owannyinyi etɔn va nyi sisɔ xlɛ gbɛtɔye, e bo hwlɛn mí gan, e ko nyi do gbɔn odan nywɛ wiwa míatɔnye mɛ hwɛn, vɔ gbɔn dɔŋuɖunu kpɔn na ɛmɛ wɛ. ⁵ E bo mɔ hwlɛn mígan gbɔn Mawusin lilɛ jiji yɔyɔ tɔn kpo ŋumɛ ɖiɖɔ na ɛmɛ gbigbɔ mimɛ tɔn mɛ. ⁶ Mawu sɔ gbigbɔ mimɛ sɔ kɔn do míaji susutɔ gbɔn Yesu Klisu hwlɛngantɔ míatɔn ji. ⁷ E wasi emɔ lɔ, bo do lɛ mi zun ehwɛjijɔ nɔ gbɔn ɛfɛnu etɔn mɛ, na mía do nyi cinnɔɖutɔ gbɔn kan do eji na ɛgbɛ mavɔ mavɔ lɔ. ⁸ Oxo xiinlɔ sɔgbe ganji, ko bo jlo na ɖo ɛkpɛn wu oxo xin lɛye ji taŋu, na ɛmɛke yi Mawu xo se ye a do wa odan nywɛ ke yi le ŋukɔn na ye. Onuxinye nyɔhwɛn bo nyi onuzinzan na ɛmɛ bisese. ⁹ Vɔɔ gbɛ onu keye: jɛtun vɔvɔye, akɔtaye xixlɛye, hwɛvo didoye, onudindɔn, osɛn ye, onuvɔvɔye wɛ, ye hɔn ɖo ale ti o. ¹⁰ ɛmɛ ke nɔ hɛn mima we oxo va kɔnweye, tɛyi le ye wu, ¹¹ ɛmɛ emɔhatɔnye, o na nywɛ tun ye mɔ bu omɔ, bo mɔ nyi onunyinylawatɔ. Bo do ɛhwɛ na yeɖe nɔ. ¹² Hwekenu na ko na sɔ Aritemasi alo Ticiki sɔ ɖo dan we, yawu jɛ gbagba va kɔn ye le Nikopolisi, ɖo blɛ lɔ blɛ wɛ ko va nɔ nɔ le vivɔ we ganmɛ. ¹³ Kpeŋu do Zenasi osɛndanwatɔ kpodo Apolosu we otomɛ yiyi wu na ŋuti ni bo ka nyi hudo yetɔn o. ¹⁴ Míanɔvyɔ xɔsetɔye can ɖo na kplan ke ye nɔ wa odan ɖo nywɛɖe, a do kpewu a va kpe do ɛmɛ ke le ohyan mɛ ganjiye wu exin, ye ko mɔ do zan ɛgbɛ ke hɔn ɖe ale ti tɔn na ye nɔ o. ¹⁵ Ɛmɛ ke le kɔnye ye bii ye do ogbe dodan we. Do ogbe na ɛmɛ ke yi owan na mí le xɔse mɛye bisese na mi. Na ɛfɛnu Mawutɔn ni nɔ kpo mɛbisese.