1 Xojɔxo wɛ ko nɔ lɔ le Klisu mɛ. Ko hɔn nɔ kan ojo, ayixa tɛye bo nɔ ɖe kunnu na do gbɔn GBigbɔ Kinkwɛn lɔ ji, 2 tun oji tɛye mɔ le onulilo kpo vivɛsise ɖaxo ɖe mɛ. 3 Ɖo e jlo nɔ lɔ byo ye a mɔ do onu wu ko mɔ do klan le Klisu lɔ wu do owan ke ko yi na nɔvyee wu, na ye mɛ ke nyi akɔta tɛyee. 4 Ye mɛ Izrayɛli we vikpɛye, ye wɛ Mawu do ɖo i we vikpɛye, bo do gigo na ye, bo wasi okancica kpo ye bo na ye osɛn lɔ, bo mɔ kplan ye kena ye na sɛ-ɛn ɖo, e bo kan atanŋu na ye. 5 Dagbo-dagbo míatɔnye we vikpɛye wɛ ye nyi, ye lɛye mɛ wɛ Klisu lɔ jɔ sɔn le ɖi gbɛtɔ ha. Klisu lɔ Mawu wɛ e nyi bo xota na onu bisese, mí kanfu-i gbɔɔn do yi mavɔmavɔ, Ami! 6 Vɔ e hɔn nyi tun lɔ byo oxo Mawutɔn lɔ dokpo ma cɛ hwɛn. ɖo mɛ bisese kena nyi izrayɛli we kunkanye, hwɛn nyi Izrayɛli we vi jijiye. 7 E ko nyi lɔ byo Ablaxamu we kunkanye bisese hwɛn nyi i tete we vi jijiye. Ɖo Mawu lɔ byo:«Jijimɛvi Izakitɔnye wɛ na nyi vikpɛ tɔweye.» 8 I we gɔnmɛ wɛ nyi lɔ byo, ovi ke ye ji le gbaza mɛ ye hwɛn nyi Mawu we vikpɛye, vɔ, ovi kena Mawu kan atanŋu na ye na do ji ye, wɛ nyi i we kunkanye. 9 Atanŋu kinkan we oxo wɛ nyi oxo ke: «Oxwe ɖyɔ ke o gbɔnnɔ le hwekenu ha pɛpɛpɛ, ko na va Sala mɔ ji ovi ŋusunglo ɖokpo.» 10 E hɔn vɔ do blɛ, hlebeka can, miadagbwɔ Izaki ɖokpo ge jan wɛ nyi ŋusunglo ke e ji ovi na. 11 Ye hɔn ka ji vikpɛ lɛye gbɔɔn na ye do wa onunyinyla ɖe alo onu nywɛ ɖe, na na ɛmɛ cincan we tito kena Mawu lɔ wasi ɖi kena e jlo-e ɖo ha, 12 Mawu lɔ ni-i lɔ byo: «Mɛhyɔn lɔ na sɛn okpɛ lɔ.» 13 Ɖi kena e le winwlan ɖo le Mawuxo lɔ mɛ ha tun:«Ko yi wan na Jakɔbu, bo gbɛ wan na Ezawi.» 14 Naɖe mi na va lɔ hin? Mawu mɔ nyi ɛhwɛ agɔ do tɔ wɛɛ? Gbeɖe kpɔn. 15 Ɖo Mawu lɔ na Mɔyizi tun: «Ko na kpɔn dɔŋuɖunu na mɛ ke jlo, a bo nyɔ dɔmɛ ɖodan mɛ ke mɔ jlo.» 16 E xin wutu, e hɔ nyi mɛ ke o ba nɔ alo mɛ ke le wedun nu, we hɔnhlɔn dido hwɛn, vɔ Mawu ke nɔ kpɔn dɔŋuɖunu na ɛmɛ lɔ, kɛɖɛ wu wɛ ee nɔ sɔn. 17 Ɖo le winwlan kinkwɛn lɔ me, Mawu lɔ na Faloawɔn tun lɔ byo:«Ko sɔ we do ɖo xɔlu a do ɖe hɔnhlɔn tɛye sɔ xlɛ gbɔn jiwe e xin nyikɔ tɛye mɔ do gbakpe gbɔn nyidan lɔ ji bisese.» 18 Kena Mawu nɔ kpɔn dɔŋuɖunu na mɛ ke e jlo ɖo xɛn xin. 19 O na va lɔ na tun: «Ŋunɛ dɔn na o do gbɛ do ɛhwɛ wu gbɛtɔye nɔ? Mɛ na nɔte le ojlo etɔn we ŋukɔn?» 20 Ke gbɔnvo wɛ nyi tun, gbɛtɔ, mɛnɛ lɛ o nyi na do dɔn onu kpodo Mawu? onuɖiɖo ɖe na kpewu na va lɔ na mɛ ke ɖwe tun:«Ŋunɛ jɔ o do do-o emɔ?» 21 Ozɛn wasitɔ lɔ hɔn ɖo acɛ do sɔ sun lɔ a do wasi agban ke nyi adodwe kpo agban ke nyi vɔvɔ ye kpo wɛɛ? 22 Na Mawu jlo lɔ byo he mɔ na ɖe aɖidido hetɛye, a mɔ sɔ xlɛ a mɔɔ do na na ye a mɔ nyɔ hɔnhlɔn hetɛye, e bo do ji kpo hunkuku kpo ɖaxo ɖe kpo kpan ŋukɔn mɛ kena le ɖi aɖidido we zɛnye ha, ye bo le gbesisɔ mɛ a do crɔn ye ha? 23 Syɛ ŋunɛ mi na mɔ lɔ, e ba na ɖe dɔkun ke le gigo etɔn mɛ, sɔ xlɛ ɛmɛ kena le ɖi dɔŋuɖunun kpinkpɔn we ozɛnye ha, e bo jla ye ɖo ɖ'enyi xoxoxo na gigo etɔn. 24 Míye wɛ nyi mɛ ke na e yɔ lɛye, e ko nyi tun Jwifuye mɛ ɖoɖyo hwɛn vɔ le ɛmɛ ke hɔn nyi Jwifuye can mɛ. 25 Oxo xin lɔ ke wɛ e lɔ le Oze we wema mɛ lɔ byo: «Ɛmɛ kena hɔn nyi otogun tɛye san, ka va yɔ-ɛ byo otogun tɛye, togun kena ko hɔn yi owan na san, ko na va yɔ-ɛ tun togun vɛna-vɛna tɛye.» 26 I wɛ fi ke ye lɔ na ye le san tun lɔ byo:«Mi hɔn nyi togun tɛye le blɛ lɔ ke wɛ ye na yɔ ye le byo Mawu ɛgbɛ-ɛgbɛ we vikpɛye.» 27 Ezayi, vi avi kpo axwa kpo do Izrayɛli we togunlɔ we tamɛ byo:«Na Izrayɛli we vikpɛye mɔ do su ɖi ɛxutakɔ ha can, ɛmɛ vitotwe ɖe jan mɔ-ɛ mɔ na kpɔn hwlɛngan. 28 Ɖo oxo kena xwetɔ Mawu lɔ do mɛ kena le nyidan lɔ ji ye wu, bisese wɛ na cɛ blebleble.» 29 I wɛ ɖi kena Ezayi ɖokpo lɔ ke o lɔ-ɛ ɖo va yi san ha, ke lɔ byo: "Na Xwetɔ ahwankpayetɔn hɔn do jo okunkan ɖe do ɖ'enyi na mí wɛ, mí o na trɔ zun Sodɔmu, a bo mɔ va ci ɖi Gomɔ ha."» 30 Naɖe lɛ mi na va lɔ? tun mɛ ke mɔ hɔn nyi Jwifuye, kena hɔn nɔ ba na nyi ɛmɛ jijwɛ sanye, Mawu va sɔ ye do wasi ɛmɛ jijwɛye gbɔn xɔse mɛ. 31 Vɔ Izrayɛli we togun lɔ ke ba nɔ zɔn gbɔn osɛn lɔ ji a bo do nyi ɛmɛ jijwɛ, e hɔn va kpewu bo wasi do e ji. 32 Ŋunɛ dɔn? Ɖo ye hɔn ba na nyi ɛmɛ jijwɛ le ŋumɛ na Mawu do gbɔn xɔse mɛ, vɔ ye ba na nyi ɛmɛ jijwɛ do gbɔn odanwiwa mɛ, i wɛ ye ve klɛn afɔ do ɛkpɛn kena nɔ sɔ ɛmɛ sɔ xunyi wu. 33 Ɛkpɛn xin lɔ we oxo wɛ le winwlan le Mawuxo lɔ mɛ tun: «In xɛn mi kpɔn ko sɔ ɛkpɛn ɖe kena ye nɔ klɛn a bo jɛnyi wɛ ko sɔ ɖo Syɔn. Ɛkpɛn ɖaxo ke nɔ sɔ ɛmɛ sɔ xunyi wɛ e nyi, vɔ mɛ kena na kan do eji, hɔn na ɖu ŋunya kpɔn.»