¹ Syɛ kojoɖiɖo ti hɔn mɔ le na mɛ ke le Klisu Yesu mɛ ye. ² Ɖo gbigbɔ ke nɔ na ɛgbɛ wu ɛmɛ le Yesu Klisu lɔ mɛ, o tun kaan na le onunyinyla we osɛn kpodo oku si. ³ Onu kena osɛn lɔ hɔn kpewu na wa, do hɔnhlɔn ma ɖo etɔn le gbaza mɛ wu, mawu wasi onu xin lɔ. E sɔ itete we vi sɔ ɖodan dogbɔn gbaza ke ɖi ɛhwɛhuhu we gbaza ha lɔ mɛ, e mɔ do nyi ɛhwɛhuhu we vɔsannu, e da ɛhwɛ na gbza ke mɛ na ɛhwɛ hɔn le lɔ. ⁴ E wa emɔ, e xin, mimɛ kena hɔ mɔ nɔ zan ɛgbɛ miatɔnye ɖi kena gbaza miatɔnye we ninɔmɛ ba ɖo ha ye, ɛgbɛ jijwɛ kena osɛn lɔ byɔ nɔ, mɔ do cɛ do mia ji. ⁵ Mɛ ke nɔ zan ɛgbɛ yetɔnye ɖi kena gbaza yetɔnye jlo ɖo ha ye, gbaza mɛ we nu ye wɛ nɔ byaŋu na ye, vɔ mɛ ke nɔ zan gbigbɔmɛ we ɛgbɛye, nu ke nyi gbigbɔmɛtɔnye wɛ nɔ byaŋu na ye. ⁶ Ɖo mɛ ke nɔ ɖo gbaza we jlo ye na ku, vɔ mɛ ke nɔ ɖo gbigbɔ lɔ jlo ye na kpɔn ɛgbɛ kpo fifa. ⁷ Kɛntɔ wɛ mɛ ke nɔ ɖo ojlo gbazatɔnye n yi na Mawu, ye ko nɔ sɔ yeɖe sɔ hwe na Mawu we osɛn lɔ, ye ko do kpewu can. ⁸ Mɛ ke na zan ye we ɛgbɛye nɔ ɖi kena gbaza yetɔn ye jlo ɖo ha ye, ye hɔn kpewu na jɛŋu na Mawu. ⁹ E le emɔha co, mi hɔn zan ɛgbɛ miatɔn ɖi kena gbaza miatɔnye jlo ɖo ha, vɔ, gbigbɔ lɔ bo ɖo wɛ mi nɔ zan ɛgbɛ miatɔnɖo, ɖo Gbigbɔ mawutɔn le miamɛ. Na gbigbɔ klisutɔn hɔn le mɛɖe mɛ hunmɛ xin lɔ hɔn nyi Klisutɔn. ¹⁰ Gbaza miatɔnye, do onunyinyla wiwa wu, ye o ku, vɔ na Klisu le miamɛ, hun Gbigbɔ lɔ nyi ɛgbɛ bo le miamɛ dogbɔn ɛhwɛ jijɔnɔ ke Mawu sɔ mi do kpɔn wu. ¹¹ Na e nyi tun mɛ ke na fɔn yesu sɔn oku lɔ we gbigbɔ le miamɛ, hun mɛ ke mɛ ke fɔn Yesu sɔn oku lɔna na ɛgbɛ gbaza miatɔn kuku lɛye can, dogbɔn Gbigbɔ etɔn kena le miamɛ lɔ ji. ¹² Na e le emɔ hun nɔvyee mi, a xɔ le okɔ na mi. E ko nyi tun mi ɖu axɔ ɖe do gbaza miatɔn lɔ hwɛn, vɔ a mɔ do zan ɛgbɛ ɖi kena mia we gbaza lɔ ba ɖo ha, hwɛn. ¹³ Na mi na zan ɛgbɛ miatɔnye we jlo ye mɛ, mi na ku, vɔ na e nyi lɔ byo mi na na gbaza miatɔnye we walɔye ku dogbɔ Gbigbɔ Mawutɔn lɔ ji, mi na nɔ ɛgbɛ; ¹⁴ Ɖo mɛ bisese kena Gbigbɔ mawutɔn nɔ kplɔ ye, ye nyi Mawu we vikpɛye. ¹⁵ E hɔn nyi gbigbɔ ke nɔ sɔ ɛmɛ do ɖo kannumyɔye e mɔ gɔ kpodo vivɔ kpo hwɛn mi nyi, vɔ Gbigbɔ ke nɔ sɔ ɛmɛ do wasi ɛmɛ do trɔ Mawu we vikpɛ ye wɛ mi yi, E lɔ lɔ wɛ nɔ dɔn na mi nɔ do axwa yɔ Mawu nɔ byo: «Aba,Didaye!» ¹⁶ Gbigbɔ Mawutɔn lɔ tete nɔ ɖekunnu na gbigbɔ miatɔnye tun miye mɔ nyi Mawu we vikpɛye. ¹⁷ Na mi nyi ovi na mawu, mi mɔ nyi Mawu we cinnɔ sɔtɔye, ɛmɛ ke Klisu na ma cinnɔ kpo ye, na mi ɖu aya kpwe nɔ le xojɔxo mɛ, mi na mɔ va yi gigo kpwe. ¹⁸ Ɖo ko kpɔn lɔ byo, aya kena mi mɔ ɖu nɔ le hwekyenu syɛye, ye mɔ hɔh kpewu na sɔ jlɛ do gigo kena Mawu na va ɖe sɔxlɛ mi wu. ¹⁹ Ɖo ɛgbɛ lɔ le hwlɛndo ji bo ba nɔ eya-eya a do kpɔn hwekenu na Mawu na va ɖe vikpɛ etɔnye sɔ xlɛ. ²⁰ Ɖo ɛgbɛ lɔ flɛ jɛ onumaɖinu we acɛ gɔ, e ko nyi tun ɛgbɛ lɔ tete hwɛn ba, vɔ dogbɔn Mawu kean sɔ-ɛ sɔ do acɛ xin lɔ gɔ we jlo mɛ wɛ. ²¹ Ɖo ɛgbɛ lɔ can na va kpɔn okantuntun le onugugu we kannumyɔ gbenu, amɔ do ɖo mima le vivɔ kpodo gigo Mawu we vikpɛye tɔn mɛ. ²² Ɖo mi nywɛ lɔ byo gbɔɔn do va jɛ syɛ, ɛgbɛ lɔ bisese mɔ wɛn le vivɛsise mɛ nɔ, le ɖi ajidonu wɛ e le ha, gbɔɔn va do syɛ. ²³ E ko nyi ɛgbɛ lɔ ɖoɖyo hwɛn, vɔ miye tete can, kena Gbigbɔ Mawutɔn lɔ we onunina tantɛny, mi wɛn nɔ le gɔngɔnmɛ miatɔn ye dan bo do nɔ te kpɔn Mawu nɔ Mawu mɔ do sɔ mi do wasi i we vikpɛye, a mɔ tun kan na gbaza miatɔn. ²⁴ Ɖo ye o hwlɛn mi gan gbɔn kandeji xin lɔ mɛ. Vɔ nu kena mi le omɔkpinkpɔn mɛ na lɔ, hɔn jɛ mia si hɔn ɖyo, mɛ lɛ na mɔ le omɔkpinkpɔn mɛ na onu kena o le ŋuta ni-i vaan ke e kpɔn nɔ. ²⁵ Vɔ, na e nyi lɔ byo, mí nɔ te kpɔn onu kena mí hɔn ka kpɔn ɖyo nɔ, mi nɔ nɔte kpwɛn kpodo hunkuku kpo. ²⁶ Ɖemɔhake, Gbigbɔ Mawutɔn lɔ mɔ nɔ kpe do mía wu le temps de hɔnhlɔn maɖo míatɔnye mɛ. Ɖo mí hɔn nyɔ kena ye nɔ xo ɛɖɛ ɖo, vɔ Gbigbɔ lɔ tete nɔ xo ɛɖɛ do mía we tamɛ kpodo Gbigbɔ kena mí hɔn nyɔ ke mí na jlɛ ɖo. ²⁷ Mawu ke nɔ gbeje ojiye kpɔn e nyɔ susu ke nyi gbigbɔ lɔ tɔn, ɖoo Gbigbɔ lɔ nɔ xo ɛɖɛ na xɔsetɔye gbn ojlo Mawutɔn mɛ. ²⁸ Mí nyɔ-ɛ lɔ byo mɛ ke yi wan na Mawu ye, mɛ ke e yɔ do i we tito mɛ, nu ke nɔ jɔ do ye ji ye:«bisese oànywɛ wɛ e nɔ do wa ye.» ²⁹ Ɖo mɛ kena Mawu o yɔ xoxoxo ye, e mɔ sɔ ye sɔ ɖ'enyi na ye a do le ɖi ovyɔ lɔ ha, ovi lɔ mɔ do nyi ovi tantɛntɔn le nɔvi susu mɛ. ³⁰ Ɛmɛ ke Mawu sɔ ɖ'enyi xoxoxo lɛye, mɔ nyi ɛmɛ kena e yɔ ye. Mɛ kena Mawu yɔ xin lɛye Mawu na na ye trɔ zun ɛmɛ jijwɛ le i we ŋukɔn mɛ xin lɛye ke e sɔ trɔ ɛmɛ jijwɛ Mawu mɔ do na ye gigo . ³¹ Oxo nɛ mí na lɔ? Na Mawu le kpo mí, mɛ na cite do mía ji? ³² Mawu ke hɔn gbɛ itete we vi sisɔ na, bo ɖe alɔ le e wu bo sɔ-ɛ sɔ jo do mi mɛ bisese we tamɛ, naɖe lɛ e hɔn na na onu bisese wu míye kpodo ovyɔ kpo le ɛwuvo mɛ ɖo? ³³ Mɛ nɛ lɛ na do ɛhwɛ wu ɛmɛ cincan Mawutɔnye? Mawu wɛ nɔ sɔ ɛmɛ do kpɔn ɛmɛ jijwɛ. ³⁴ Mɛ nɛ ha le na kpewu na do ɛhwɛ na ye? Klisu Yesu wɛ nyi mɛ ke ku do ota míatɔń mɛ, hugan wu e xin, e mɔ fɔn bo le adu mɛ na Mawu bo xo ɛɖɛ do mía we tamɛ nɔ. ³⁵ Ŋunɛ lɛ na kpewu na ɖe mi do ovo na owanyiyi ke Mawu ɖo na mí lɔ? Onulilo wɛ, vivɛsise wɛ, ofun ɖe na ɛmɛ wɛ, xovɛ wɛ, onu ma le ɛmɛ si wɛ, fɔku wɛ, dɛnkpwe wɛ? ³⁶ Ɖi kena e le winwlan le Mawuxo lɔ mɛ ɖo ha, lɔ byo: «Do lɔ wu we wɛ ye nɔ hu mi nɔ le keklo lɔ bisese mɛ nɔ do, ye bo nɔ sɔ mí do kpɔn kanlin kena ye va kplɔ do yi huhu tɛnxo nɔ ye ha.» ³⁷ Le nu bisese mɛ, mí hugan wu ɖulejitɔ dogbɔn mɛ ke yi wan na mí l ji. ³⁸ Ɖo ko ɖo kandeji tun oku o, ɛgbɛ o, Mawu we ɛwɛndotɔye o, alo acɛkpikpa gbigbɔ mɛ tɔnye o, onu syɛtɔnye wɛ, onu kena gbɔnnɔye wɛ, hɔnhlɔnye wɛ, ³⁹ hɔnhlɔn kena le jihwe boliboliye wɛ, ke le odo le ŋudangɔ boliboliye wɛ, nuɖe kpokpwe ke nyi onu ɖiɖo hɔn kpewu na mi do ovo na wanyiyi kena mawu yi na mí gbɔn mía we Xwetɔ Yesu Klisu ji.