¹ Alo nɔvyee mi hɔn nyɔ-ɛ tun, (ɖo mɛ ke nyɔ osɛn lɛye wɛ ko lɔ oxo na nɔ) na gbɛtɔ le ɛgbɛ jan wɛ osɛn lɔ we acɛ gɔ jan e mɔ le wɛɛ? ² Ɖemɔha ke wɛ nyɔnusi ke ɖe osu na oswɔ bo gbɛ le ɛgbɛ, osɛn bla nyɔnusi d'ewu. vɔ na osu lɔ ku, hun nyɔnusi lɔ tɔn le osɛn kena blɛ do oswɔ lɔ wu gɔ. ³ Na e nyi tun oswɔ lɔ le ɛgbɛ, nyɔnusi lɔ bo ve ɖe osu bu, ye na yɔ nyɔnusi xin lɔ byo afɔdogbetɔ. Vɔ na e nyi lɔ byo osu lɔ ku wɛ, hune bo vo le osɛn mɔnu, e xin na e mɔ do ve ɖe osu bu can, ye hɔn mɔ yɔ-ɛ nɔ tun afɔdogbetɔ. ⁴ Emɔke, nyɔnuvyee mi, miye can mi wasi ɖokpo kpo Klisu, bo ku le osɛn mɔnu. E xin wutu, mɛ bu tɔn wɛ mi nyi syɛ, mɛ kena fɔn sɔn oku lɔ tɔn wɛ mi nyi, mi mɔ do ɖe ale na Mawu. ⁵ Ɖo hwekenu na mi zan ɛgbɛ nɔ gbɔn miye teteye we ninɔmɛ ji nɔ, ojlo nyinyla nɔ gbɔn osɛn lɔ ji a bo do wa odan nɔ le gbaza miatɔnye we alɔklanye mɛ, bo nɔ na wɛ mi nɔ zan walɔ kena nɔ kplɔ ɛmɛ do yi oku. ⁶ Vɔ syɛ mí ku le onu ke nɔ hɛn mí do kannumyɔ gbɛ me san we akpaxwe, bo kpɔn kantuntun le osɛn lɔ we acɛ gɔ, e bo na wɛ mi na sɛn Mawu míatɔn kpodo walɔ yɔyɔ, le Gbigbɔ Kinkwɛn we acɛ gɔ, e ko na nyi do gbɔn walɔ xixo lɔkena le osɛn kena ye wlan lɔ we acɛ gɔ nɔ. ⁷ Naɖe mí na va lɔ syɛ? Osɛn lɔ onunyinyla wɛ e nyi? Kpɔn gbeɖe. Osɛn lɔ wɛ dɔn ko do nyɔ onunyinyla. Ɖo na osɛn lɔ hɔn do lɔ byo: Onu ni ko bya on u na we. Ɖo ko hɔn kpewu na va nyɔ ŋubya we oxo ɖe. ⁸ Vɔ onunyinyla gbɔn omɔ kena osɛn lɔ le ɖe ji bo sɔ ojlo nyinyla hamɛ-hamɛ bisese sɔ do bo we gbɛzan mɛ. Ɖo osɛn mɛvo onun yinyla nyi onu kuku. ⁹ San hwekenu na osɛn lɔ hɔn le, ko le ɛgbɛ, vɔ hwekenu na osɛn lɔ va va syɛ, onunyinyla gbɔn va ɛgbɛ, blɔ bo va ku. ¹⁰ Osɛn ke ɖo na kplɔ ɛmɛ do yi ɛgbɛ mɛ, blɔ tɛye tɔn oku wɛ e hɛn va na. ¹¹ Ɖo onunyinylan wiwa kpɔn omɔ do wu ye bo blɔ ɖu gbɔn osɛn lɛ ji gbɔɔn bo va hu-u. ¹² E nyi tun ɖemɔha jan wɛ e le hun osɛn lɛye bo nyi onu kinkwɛn ye, bo sɔgbe, bo mɔ jɔhun. ¹³ Syɛ onu jijhun lɔ wɛ va kplɔ blɔ do yi oku nɔ? Gbeɖe kpɔn! Vɔ onunyinyla lɔ wɛ hɛn e xin lɔ do va. E gbɔn nu ke na nyɔ lɔ ji bo do hu-u blɔ, e xin emɔ do ɖe onunyinyla ke e nyi lɔ a bo sɔ xlɛ, onunyinyla kpatakli ke e n yi lɔ mɔ do ze dogbɔn osɛn lɔ ji. ¹⁴ Le xojɔxo mɛ mi nyɔ-ɛ lɔ byo gbigbɔ mɛ we nu mɔ-ɛ mɔ nyi osɛn lɔ, vɔ blɔ, gbɛtɔ we ninɔmɛ wɛ ko le, ye bo sɔ sɔ sa ɖi kannumyɔ ha na onunyinyla wiwa. ¹⁵ Le xojɔxo mɛ ko hɔn nɔ se nu kena ko wa nɔ gɔnmɛ. Nu ke na ko ba ko hɔn nɔ kpewu nɔ wasi-i, vɔ nu kena ko gbɛ wan na wɛ ko nɔ wasi. ¹⁶ Vɔ e nyi lɔ byo nu kena ko hɔn jlo wɛ ko nɔ wasi, hun ko yi gbe na osɛn lɔ tun e mɔ hɔn nyi onu nywɛ. ¹⁷ Vɔ onunyinyla ke ko nɔ wasi nɔ yebo tete hwɛn wasi nɔ, vɔ onunyinyla kena le blɔ mɛ wɛ. ¹⁸ Ɖo ko nywɛ lɔ byo, le blɔ me, i wɛ gɔnmɛ wɛ nyi tun le ninɔmɛ tɛye mɛ, onywɛ wiwa hɔn le. Ko ɖo onu nywɛ wiwa we ojlo le lanmɛ, vɔ hɔnhlɔn kena ko na do wasi-i bo dyɔn. ¹⁹ Ɖo onywɛ ke ko nɔ jlo na wa, ko hɔn nɔ kpewu nɔ wasi-i, vɔ onunyinyla kena ko hɔn jlo jan wɛ ko nɔ wasi. ²⁰ Hun na e nyi tun onunyinyla kena ko hɔn jlo na wsi jan wɛ ko nɔ wasi, hun bɛ e hɔn mɔ nyi blɔtete hwɛn, vɔ ɛhwɛhuhu ke nyi onu nyinyla bo le ɛgbɛ le blɔ mɛ wɛ dɔn. ²¹ Ko kpɔnu jɛ osɛn lɔ wu le bo tete mɛ syɛ tun, na ko ba na wa onunywɛ, onunyinyla jan wɛ ko nɔ do va wa. ²² Le bo we susu mɛ, osɛn Mawutɔn lɔ wɛ nɔ do jijwɛ na. ²³ Vɔ ko kpɔn nɔ lɔ byo osɛn bu mɔ mɔ le, mɔ fun ahwan nɔ kpan ŋukɔn wu osɛn kena susu tɛye yigbe na le bo we ayixa mɛ lɔ, osɛn bu xin lɔ, bo sɔ-ɔ do ɖo kannumyɔ na onunyinyla wiwa we osɛn ke le gbaza tɛye we alɔklanye mɛ. ²⁴ Bo we ɛgbɛ ɖu dɔnu! Mɛnɛ lɛ na va hwlɛn-ɔgan le gbaza okutɔn ke lɔ si? ²⁵ Vɔ ɛkpɛ wɛ ko do na Mawu nɔ le Xwetɔ míatɔn Yesu Klisu mɛ nɔ. Bo xɛn susu tɛye le Mawu lɔ we acɛ gɔ, vɔ ninɔmɛ tɛye, bo le onunyinyla we osɛn we acɛ gɔ.