¹ Naɖe mi na va lɔ hin? Mía nɔ kpɔtɔ a nɔ onunyinyla lɔ mɛ na Mawu we ɛfɛnu lɔ a do jɛ e ji wɛɛ? ² Gbeɖe kpɔn! Mí mɛ ke kuye, naɖe mí na mɔ nɔ ɛgbɛ le onunyinyla mɛ ɖo? ³ Mi hɔn nywɛ tun mɛ ke ye lɛ Mawusin na le Yesu Klisu we nyikɔ mɛye, ye mɔ lɛ oku Yesutɔn lɔ we ɛsin can na ye wɛ? ⁴ Ye bo mɔ ɖi mí kpo Yesu kpo le Mawusin lilɛ gbɔn oku etɔn lɔ ji. E xin lɛye bi jɔ, na ɖi kena dogbɔn gigo Mawu Otɔ lɔ tɔn mɛ Yesu Klisu fɔn sɔn oku ɖo ha, míye can, mía do zɔn zɔnlin le ɛgbɛ yɔyɔ zinzan mɛ. ⁵ Ɖo na mí wasi ɖokpo kpo-e dogbɔn oku etɔn mɛ, mí na mɔ nɔ kpɔkpɔ kpo-e le fifɔn sɔn oku etɔn mɛ. ⁶ Mí nyɔ-ɛ tun ye o kan gbɛtɔ xixo ke mi nyi kpo ikpo do otinsokpoli ji, na onunyinyla we gbaza lɔ a do crɔn. Onu xin lɔ jɔ na mí ko mɔ do nyi ɛmɛ xixɔ na ɛhwɛhuhu nɔ. ⁷ Mɛ kena ku e kpɔn vivo le onu nyinyla si. ⁸ Na mí nyɔ tun mí mɔ o ku kpo KLisu lɔ, hun mí mɔ nywɛ tun mí mɔ na mɔ nɔ ɛgbɛ kpo-e. ⁹ Mí nyɔ-ɛ tun Klisu lɔ mɔ fɔn sɔn oku e ko mɔ mɔ ku nɔ gbeɖe. Oku ko mɔ ɖo acɛ do e ji. ¹⁰ Do, ɛhwɛhuhu lɔ wɛ dɔn na e do ku zɔnɖokpo gee na mɛ bisese; vɔ e bo le ɛgbɛ syɛ na Mawu. ¹¹ Ɖemɔke, miye can mi ɖo sɔ miaɖeye tun hiye can mɔ ku kpo ɛhwɛ hiyetɔn kpo, vɔ mɔ le ɛgbɛ syɛ na Mawu le Yesu Klisu lɔ mɛ. ¹² Hun mi bo ka yigbe na ɛhwɛ huhu a ɖu le gbaza kuku miatɔn lɔ ji na mi ko mɔ do va zɔn gbɔn gbaza miatɔn xin lɔ we ojloye ji nɔ. ¹³ Mi ka sɔ gbaza we alɔklanye a do wa odan na onu nyinylaye ɖi onu baɖa-baɖaye we ahwanfunnuye ha. Vɔ, le ɖi mɛ ke fɔn sɔn oku va ɛgbɛye ha, mi sɔ miawe gbaza we alɔklanye do wa dan na Mawu le ɖi onu jijwɛ wiwa we ahwanfunnuye ha. ¹⁴ Mi ko yigbe na onunyinyla a ɖo acɛ do mia ji, ɖo mi hɔn mɔ le osɛn lɔ we acɛ gɔ, vɔ ɛfɛnu Mawutɔn mɛ wɛ mi le. ¹⁵ Syɛ ɖe? Ɖo mí le ɛfɛnu gɔ wɛ dɔn na mi na do hu ɛhwɛ, ɖo mí hɔn mɔ le oɛn lɔ gɔ? Gbeɖe kpɔn. ¹⁶ Mi hɔn nyɔ-ɛ lɔ byo na mi sɔ mia ɖe sɔ do odan me na mɛɖe ɖi kannumyɔ ha amɔ se tonu ni-i, mi hɔn nyɔ-ɛ tun mi mɔ trɔ zun kannumyɔ na ɛmɛ xin lɔ wɛɛ? Xojɔxo wɛ, na mia wa dan na onnyinyla ke nɔ dɔn ɛmɛ do yi oku, alo mi na se tonu na ke na kplɔ mi do yi onu jijwɛ wiwa mɛ. ¹⁷ Vɔ, ɛkpɛ na Mawu! Ɖo kannumyɔye wɛ mi o nyi san na onunyinylawiwa, vɔ syɛ, oji miatɔnye blebu wɛ mi do zɔn kpɔndewu kena okplan ke mi yi, ɖe sɔ xlɛ mi nɔ. ¹⁸ Ke mi kpɔn kantuntun le onunyinyla wiwa si, mi va trɔ zun ɛgbɛ jijwɛ zinzan we kannumyɔye. ¹⁹ Ko lɔ xo nɔ ɖi gbɛtɔ ha ɖo gbaza miatɔn kena hɔn ɖo hɔnhlɔn ti wutu. Ɖemɔha ke, ke mi o sɔ alɔklan gbaza miatɔn tɔnye bo o sɔ jo na onunyinyla wiwa kɛɖɛ, hun le syɛ mi bo mɔ sɔ gbaza miatɔn xin lɔ we alɔklanye ke a sɔ do ɖo kannumyɔ a do wadan na onujijwɛ kena mi na do zan ɛgbɛ kinkwɛn. ²⁰ Hwekenu na mi nyi kannumyɔye na onunyinyla wiwa, onu jijwɛ wiwa we xo ɖe hɔn kan mi. ²¹ Hwexinnu ke na mi wasi onu xin lɛye nɔ, okunsinsɛn nɛ lɛ mi na san na e do va nyi ŋunya na mi nɔ syɛ? Ɖo oku mɛ wɛ walɔ xinye nɔ dɔn ɛmɛ do yi. ²² Vɔ syɛ, kena mi kpɔn kantuntun le onunyinyla wiwa si bo va trɔ kannumyɔ na Mawu, mi zan walɔ kena na kplɔ mi do yi ɛgbɛ kinwɛn zinzan mɛ, vivɔnu etɔn mi mɔ do kpɔn ɛgbɛ mavɔmavɔ. ²³ Ɖo axɔtu kena onunyinyla wiwa nɔ tu na ɛmɛ wɛ nyi oku, vɔ onu nina kena Mawu nɔ na ɛmɛ vɔnu-vɔnu wɛ nyi ɛgbɛ mavɔmavɔ le mía we xwetɔ Yesu Klisu mɛ.