¹ Ɖo Mawu sɔ mí do kpɔn ɛmɛ jijwɛye le xɔse mɛ fifa bo ɖyɛ miye kpo Mawu kpo mɛ gbɔn míatɔ Yesu Klisu ji. ² Yesu lɔ ji wɛ ye gbɔn bo do kpɔn ɛfɛnu Mawutɔn le xɔse mɛ. Ɛfenu xin lɔ mɛ wɛ mí le ote le gbanŋu-gbanŋu wɛ omɔkpinkpɔn kena mi ɖo a do ɖo mima le Mawu we gigo mɛ, nɔ n yi mimla na mí. ³ Hugan e xin, mí mɔ nɔ sɔ viv ɛsise míatɔn can do mla mi nywɛ lɔ byo vivɛsise can mɔ nɔ hɛn vivinu dido do va. ⁴ Viviɛnu dido ɖu le ji le didokpɔn mɛ wɛ, ɖuɖeji le didokpɔn nyi vivɛnu dido. ⁵ Omɔkpinkpɔn ko nɔ flu ɛmɛ, ɖo Mawu kɔn wanyiyi etɔn do oji míatɔnye mɛ gbɔn Gbigbɔ Kinkwɛn ke e na mí lɔ ji. ⁶ Ɖo, hwekenu na hɔnhlɔn ɖe hɔn mɔ le mía wu, Klisu ku do ota na sisi ma ɖo na mawutɔye le oganxixo kena mawu ɖo mɛ. ⁷ E na vɛwu taŋu na mɛ ɖe a do yigbe a bo do ku do ɛmɛ jijwɛ we tamɛ, ota wɛ na nyɔ mɛɖe na do yigbe a bo ku do onnywɛwatɔ ɖe we tamɛ. ⁸ Vɔ Mawu ɖe ke na e yi wan na mí ɖo sɔ xlɛ, ɖo hwekenu na mí mɔ gbɛ nyi onunyinylawatɔye Klisu va ku do ota na mí. ⁹ Ke mɔ hugan wu e xin wɛ nyi tun mi trɔ zun ɛmɛjiwɛ dogbɔn ɛhun etɔn mɛ; zɔn nɛmu-nɛmu ɖe wɛ mi na le mawu we aɖidido mɛ. ¹⁰ Na e nyi tun hwekenu na mi nyi Mawu we kɛntɔye, mí va trɔ jɛ kpɔkpo-e gbɔn ovyɔ we oku ji, hun syɛ kena mí trɔ jɛ okpɔkpo-e vɔ, zɔn nɛmu-nɛmu ɖe wɛ mí na kpɔn hwlɛnga gbɔn ovyɔ lɔ we ɛgbɛ ji. ¹¹ E hɔn nyi exin ɖoɖyo vɔ, hugan exin , mí nɔ sɔ ɛhwɛlɔgbo ke mí kpɔn le Mawu mɛ dogbɔn míaxwetɔ Yesu Klisu ji do mla. ¹² Ɛme ɖokpo ji wɛ onunyinyla gbɔn do ɖyɛ ɛgbɛ lɔ mɛ, onunyinyla lɔ bo nɔ hɛn oku do va, i jan wɛ oku do ɖyɛ mɛ bisese mɛ, ɖo mɛ bisese wa onu nyinyla. ¹³ Ɖo gbɔxwe na osɛn do va va, onunyinyla o va ɛgbɛ lɔ mɛ, vɔ, kena e nyi lɔ byo osɛn ɖe hon le le hwexinnu, Mawu hɔn nɔ lɛn ɛhwɛ ɖe do okɔ na ɛmɛɖe. ¹⁴ Ganke, sɔn Adamu we hwenu gbɔɔn do va jɛ Mɔyizi we hwenu, oku ɖu xɔlu gbɔn bo hu mɛ ke hɔn wa onunyinyla ɖi Adamu ha ye can. Adamu lɔ wɛ nyi mɛ kena na va va lɔ we ɖiɖexlɛ. ¹⁵ Vɔ, ye hɔn kpewu na sɔ ɛhwɛ kena Adamu hu sɔ jlɛ do onu nina vɔnu Mawutɔn lɔ wu. Ɖo na e nyi tun, ɛmɛ ɖokpo gee we onunyinyla wu wɛ mɛ susu do ku zɔn nɛmu-nɛmɛ ɖe wɛ, ɛfɛnu Mawutɔn ke e na gbɔn mɛ ɖokpo gee ke nyi Yesu Klisu lɔ ji, e bo gbakpe ɛmɛ susu ji. ¹⁶ Onu kena onu nina Mawutɔn nɔ wa, gbɔn vo na nu kena, mɛ ɖokpo gee we onunyinyla wɛ hɛn do va, vɔ onu nina mawutɔn vɔvɔ ke na e na le onunyinyla susu xin lɛye we godo, ɖe mí tun le ɛhwɛ mɛ. ¹⁷ Ɖo na e nyi lɔ byo, do gbɔn ɛhwɛ huhu mɛ ɖokpo gee tɔn ji, wɛ oku ɖu xɔlu le i ɖoɖyo xin lɔ ji, enɛ lɛ na va nyi ɛmɛ kena Mawu na ɛfɛnu susu kpodo ɛgbɛ jijwɛ we onu nina kena ɖu xɔlu dogbɔn mɛ ɖokpo gee ji i wɛ nyi Yesu klisu. ¹⁸ Syɛ ke e nyi l byo do gbɔn mɛ ɖokpo gee we onunyinyla wu, ɛhwɛdona-ɛmɛ jɛ kɔ na gbɛtɔ, e xin lɔ ke wɛ dɔn na dogbɔn me ɖokpo gee we onujijwɛ wiwa wu, ɛgbɛ jijwɛ kpinkpɔn ke nɔ na ɛgbɛ wu ɛmɛ, nyi mɛ bisese tɔn. ¹⁹ Ɖo kena e nyi lɔ byo dogbɔn mɛ ɖokpo gee we tonu mase wu wɛ mɛ susu trɔ zun onu nyinylawatɔ, emɔha ke wɛ dogbɔn mɛ ɖokpo gee we tonu sisi ji, ɛmɛ susu na mɔ trɔ zun ɛmɛ jijwɛ; ²⁰ Osɛn va na osɛn ji didale le a do su d'eji. Vɔ fi ke na onunyinyla su d'eji le, ɛfɛnu mawutɔn mɔ nɔ su d'eji susu. ²¹ E xin kena onunyinyla ɖu xɔlu bo hɛn oku do va ɖo, emɔ ke wɛ gbɔn onu jijwɛ wiwa ji, ɛfɛnu ɖu xɔlu bo na ɛgbɛ mavɔmavɔ wu ɛmɛ gbɔn mía we Xwetɔ Yesu klisu ji.