¹ Oxo nɛ lɛ mí na lɔ do ablaxamu mía dagbwɔ lɔ wu? Ŋunɛ lɛ e nyi do gbɔn i tete we hɔnhlɔn mɛ? ² Ɖo e nyi tun Ablaxamu mawu sɔ-ɛ do kpɔn ɛhwɛjijɔnɔ dogbɔn odan etɔnye mɛ, hun e ɖo nu ke wu e na yi go do, vɔ e hɔn nyi le Mawu we ŋukɔn nɔ. ³ Ɖo ŋunɛ lɛ wiwlan lɔ lɔ? «Dogbɔn xɔse mɛ, wɛ mawu sɔ Ablaxamu do kpɔn ɛhwɛjijɔ nɔ.» ⁴ Syɛ, mɛ ke wa dan nɔ, ye hɔn kpewu na lɔ tun axɔtu etɔn mɔ nyi ɛfɛnu, vɔ e jɛ na wɛ dɔn. ⁵ Vɔ na mɛ ke hɔn wa odan ɖe, vɔ ganke bo kan do mawu ke nɔ sɔ onunyinylwatɔ do kpɔn ɛmɛjijɔ gbɔn i we xɔse mɛ, Mawu na sɔ-ɛ do kpɔn ɛmɛ jijɔ. ⁶ Davidi can o lɔ do mɛ ke na Mawu sɔ do kpɔn ɛmɛjijɔ e ko nyi do gbɔn odan ke e wa mɛ hwɛn tun: ⁷ «Nyɔnanɔ wɛ nyi mɛ kena Mawu sɔ ɛhwɛhuhu yetɔnye sɔ kɛ ye, mɛ kena Mawu cɔnnu do onunyinyla yetɔnye. ⁸ Nyɔnanɔ wɛ nyi mɛ ke na Xwetɔ lɔ hɔn xlɛ onunyinyla ɖe do okɔ na.» ⁹ Mɛ ke gbo adaye kɛɖɛ jan wɛ na nyi nyɔnanɔ xin lɛye, alo mɛ ke hɔn gbo adaye can na kpɔn nyɔna xin lɔ wɛɛ? Ɖo mí nɔ lɔ tun:«Ablaxamu mɔkan do Mawu ji, mawu mɔɔ sɔ-ɛ do kpɔn ɛmɛ jijɔ dogbɔn xɔse etɔn wu.» ¹⁰ Naɖe lɛ ye kpɔn-ɛ tun e mɔ nyi ɛmɛ jijɔ ɖo? Hwekenu na Ablaxamu gbo ada wɛ alo hwekenu na e hɔn ka gbo ada? E hɔn nyi hwekenu na e gbo ada hwɛn, vɔ le ada ma gbo etɔn mɛ wɛ. ¹¹ E xin we godo Ablaxamu va gbo ada e mɔ do nyi josi ni-i. Josi xin lɔ wɛ ɖexlɛ tun Mawu mɔ sɔ-ɛ do kpɔn ɛmɛjijɔ do xɔse ke e ɖo wu le hwekenu e gbɛ le ada ma gbo. Emɔha wɛ Ablaxamu trɔ Otɔ na xɔsetɔ kena hɔn gbo adaye ɖo, na Mawu a mɔ do sɔ ye can a do kpɔn ɛmɛjijɔye. ¹² E xin lɔ bo ɖexlɛ tun Ablaxamu mɔ va nyi Otɔ na mɛ ke gbo adaye can, mɔ bo nɔ sɔ afɔ do afɔdo míatɔ Ablaxamutɔn mɛye. Xoṣe ke e o ɖo le hwekenu na e gbɛ le ada ma gbo xo wɛ ko lɔ nɔ. ¹³ Do e hɔn nyi do gbɔn osɛn lɔ mɛ hwɛn ye kan atanŋu na Ablaxamu kpodo jijimɛvi etɔnye tun he mɔ sɔ ɛgbɛ lɔ bisese sɔ na ye, vɔ e tɔn na Mawu sɔ-ɛ do kpɔn ɛmɛ jijwɛ do gbɔn xɔse kena e ɖo wu wɛ dɔn. ¹⁴ Ɖo na e nyi tun osɛn lɔ ji we ye na gbɔn a do nyi cinnɔ ɖutɔ, hun xɔse ɖiɖo zun on u vɔvɔ, atanŋu kena Mawu kan can bo zun onu vɔvɔ. ¹⁵ Ɖo osɛn lɔ nɔ do xɔomɛsin na ɛmɛ, vɔ fi ke na osɛn ti hɔn wa dan le nɔ, osɛn ji didale ti can hɔn le blɛ lɔ. ¹⁶ Gbɔn xɔse ɖiɖo mɛ wɛ ye nɔ lɛ zun cinnɔ ɖutɔ, e mɔ do nyi dogbɔn ɛfɛfu vɔvɔ ji kpoŋu. A bo do nɔnyi na Ablaxamu we jijmɛviye bisese. E ko va nyi nɔ tun mɛ ke na zɔn do osɛn lɔ ji nɔ ye ɖoɖyo tɔn mɔ hwɛn, vɔ e mɔ do nyi mɛ ke na ɖo xɔse ɖi kena Ablaxamu can ɖo xɔse ɖo ha yetɔn. Ɖo elɔ lɔ wɛ nyi otɔ na mi mɛ bisese le xɔse mɛ, ¹⁷ ɖi kena e o nyi wiwlan ɖo lɔ byo: «Ko sɔ we do wasi otɔ na togun susu.» Ablaxamu bo le ŋukɔn na mɛ ke ji na e kan do lɔ, Mawu ke nɔ na ɛgbɛ wu onu kukuye a bo yɔ onu ke hɔn le ye tun ye mɔ mɔɔ jɔ va. ¹⁸ Nuɖekpokpwe ke jɔ nɔ ye mɛ, Ablaxamu kan do Mawu lɔ ji taŋu bo le omɔkpinkpɔn mɛ na onu ke na va va ye. E xin lɔ wɛ dɔn e do va nyi otɔ na togun susu, dogbɔn nu ke ye o lɔ lɔ mɛ tun: «Ke jijimɛvi tɔweye nɔ nɔ ɖo xɛn xin.» ¹⁹ E hɔn nyi hɔnhlɔn maɖotɔ le xɔse mɛ. Ablaxamu bo nyɔ-ɛ le eɖe mɛ tun gbaza hetɛye mɔ hɔn mɔ kpewu mɔ na ji vikpɛye (ɖo e na ɖo nɔ ɖi oxwe kanweko emɔha nɔ le hwexinnu); E bo mɔ nyɔ-ɛ tun he siye Sala mɔ hɔn mɔ kpewu mɔ na hɛn yi gomi. ²⁰ Vɔ do atanŋu kena Mawu kan na Ablaxamu wu, e hɔn gɔn kinkan do Mawu lɔ ji. Vɔ, e kpɔn hɔnhlɔn le xɔse mɛ bo kpa gigo na Mawu. ²¹ E bo ɖo kandeji kpatakli tun atanŋu kena Mawu mɔ kan na he, e mɔ kpewu mɔ na ɖe-e jan mɛ. ²² E xin lɔ can wɛ dɔn na Mawu do sɔ-ɛ do kpɔn ɛmɛ jijɔ. ²³ Vɔ, ye hɔn wlan onu xin lɛye do ewu na ale lɔ a do nyi elɔ ɖoɖyo tɔn, hwɛn Mawu do sɔ-ɛ do kpɔn ɛmɛjijɔ. ²⁴ Vɔ ɖo mi mɛ kiye ke ye na sɔ do kpɔn ɛmɛjijwɛye, wu can wɛ dɔn, ɖo mí kan do Mawu ke fɔn mía we Xwetɔ Yesu Klisu lɔ, le ɛmɛ kukuye mɛ ji. ²⁵ Elɔ wɛ ye sɔ jo do onunyinyla míatɔnye we tamɛ, e bo bo va fɔn sɔn oku bo do sɔ mí do kpɔn ɛmɛ jijwɛye.