¹ Ke e le emɔ, ŋunɛ Jwifu dohugan wu mɛ ke hɔn nyi Jwifu? Alo ale nɛ le adagbigbo mɛ? ² I we ale glo le omɔ ɖekpokpwe nu. Jɛ ŋukɔn, Jwifuye wɛ Mawu so i we oxo sɔ do asi na. ³ Syɛ na mɛ ɖeye gbɛ byo hiye mɔ hɔn nɔ gbeji nɔ, Mawu n&a gbɛ gbeji ninɔ wɛɛ? ⁴ Kpɔn gbeɖe. Ye ɖo na nyɔ-ɛ lɔ byo, xɔjɔxolɔtɔ mɔ-ɛ mɔ nyi Mawu gbɛtɔ ɖekpokpwe mɔɔ nyi ojokantɔ ɖi kena ye wlan ɖo lɔ byo: «Oxolilɔ miatɔn mɛ wɛ ye na kpɔn lɔ byo mi mɔ nyi ɛhwɛjijɔnɔ exin mi yi ɛhwɛŋukɔn mi mɔ ɖu ji.» ⁵ Vɔ, na e nyi tun lɔ byo, onu masɔgbewiwa miatɔnye wɛ na ɖe Mawu we onu jijɔ wiwa sɔ xlɛ nɔ ɖe, xo nɛ mi na lɔ? Mawu hɔn nɔ tafu wu ɛmɛ le oto dindɔn etɔn mɛ, Mawu le emɔ wɛ? Gbɛtɔ we onukpinkpɔn mɛ wɛ ko lɔ xo do nɔ. ⁶ Na e nyi ɖo emɔha, naɖe lɛ Mawu na ɖɔ ɛhwɛ na ɛgbɛ lɔ ɖo? ⁷ Vɔ na e nyi lɔ byo, gbɔn ojokinkan tɛyee mɛ wɛ Mawu we xojɔxo lɔ na yi kanfu le ŋunɛ dɔn na ye na mɔ do ɖɔ ɛhwɛ na do onunyinyla wiwa tɛyee wu? ⁸ Na e le emɔ, ŋunɛ dɔn na mi hɔn na lɔ byo:«Mia wa nunyinyla na nunywɛ a do tɔn ota? » Mɛɖeye nɔ jlo na kɔn acɔn do wu ye a bo lɔ byo, bo mɛ mɔ lɔ emɔ. Mɛxin lɛye ɛhwɛdido yetɔn jɛ kpo ye. ⁹ Syɛ mi mɛ Jwifuye mi ɖo nu hugan wu mɛɖyɔye wɛɛ? Gbeɖe kpɔn! Ɖo mi o ɖe sɔ xlɛ lɔ byo, mi mɛ bisese, Jwifu o, mɛke hɔn nyi Jwifu o, onu nyinyla we acɛgɔ wɛ mi mɛ bisese le. ¹⁰ Ɖi kena e le wiwlan ɖo lɔ byo:«Ɛmɛ jijɔ ti hɔn le, ɖokpo tete hɔn le can. ¹¹ Mɛ ti hɔn le bo nyizinzin nɔ. Mɛ ti hɔn le bo kan Mawu nɔ. ¹² Ye mɛ bisese wɛ lilɛ godo do Mawu, bo va ny on u vɔvɔ. Ɛmɛ nywɛ ti hɔn le ye mɛ, ɖokpo tete can. ¹³ Hlokpo yetɔnye ci ɖi yɔgun ke le nouvoye ha. Ye bo sɔ onu yetɔnye do blɛ ɛmɛɖu. Oɖi odantɔn wɛ nɔ tɔn sɔn numɛ na ye. ¹⁴ Onu yetɔnye bo gɔ kpo nudoye kpo vivɛsise taŋu. ¹⁵ Ye we afɔye nɔ le wedun nu na gbɛtɔ we ɛhun a do kɔn ɖenyi. ¹⁶ onu gugu kpodo vivɛsise wɛ gɔ omɔ yetɔnye ji. ¹⁷ Ye ko kpewu v a kpɔn fifa we omɔ lɔ. ¹⁸ Ye ŋumɛ yetɔnye ye hɔn nɔ vɔ na Mawu.» ¹⁹ Syɛ, mí nyɔ-ɛ tun,nu bisese kena osɛn lɔ lɔye, e lɔ ye na meɛ ke le osɛn lɔ gɔ ye, e xin onu mɔ do tɛ na mɛɖe kpokpwe, gbɛtɔye bisese mɔ do kpɔnnu jɛ ewu tun lɔ byo hiyee mɔ nyi ɛhwɛhutɔ le ŋukɔn na Mawu. ²⁰ E xin lɔ wɛ dɔn na mɛ ti hɔn do kpewu na gbɔn osɛn we odanwiwa ye ji a bo nyi ɛhwɛjijɔnɔ le ŋumɛ na Mawu, ɖo a do kpɔnnu jɛ onunyinyla wu jan wɛ osɛn lɔ le na. ²¹ Vɔ syɛ, Mawu ɖe kena e nɔ sɔ mi do kpɔn ɛmɛ jijɔ ɖo sɔ xlɛ, osɛn lɔ ko ɖo xo ɖe le emɛ. Osɛn lɔ kpodo oxolɔɖenyitɔ Mawutɔnye o de kunnu do e wu. ²² Mawu nɔ sɔ gbɛtɔye do kpɔn ɛhwɛ jijɔnɔ gbɔn xɔse ke ye ɖo na Yesu Klisu ji. Ɖo mɛɖe hɔn le vo na mɛɖe. ²³ Do gbɛtɔye bisese wɛ hu ɛhwɛ bo ba gigo Mawutɔn dokpo. ²⁴ Mawu gbɔn i we ɛfɛnu mɛ, bo do sɔ ye do kpɔn ɛhwɛjijɔ nɔ gbɔn Yesu Klisu ke tunkan na ye le onunyinyla mɛ lɔ ji. ²⁵ Elɔ lɔ wɛ Mawu sɔ ɖenyi na avɔsinsan, i we ɛhun mɔ do kɔn ɖenyi, exin mɛ ke na kan do eji ye, mɔ do kpɔn ɛhwɛ sɔ kɛ. Ɖemɔke wɛ Mawu ɖe i tete we onujijɔ wiwasi sɔ xlɛ ɖo, ɖo mɛ ke nɔ wa onu nyinyla san ye, e jo ye do, e ko dɔn oto na ye. ²⁶ Mawu ba na ɖe onujijuɔ wiwa etɔn sɔ xlɛ, a bo mɔ ɖe ke e nyi ɛmɛjijɔ ɖo a sɔ xlɛ, gbɔn e xin ji e mɔ do kpɔn mɛ kena e o hwlɛngan gbɔn Yesu ji ye do kpɔn ɛmɛ jijɔ. ²⁷ Ɛhwɛjijɔ ɖe le na ye na do mla wɛɛ? Ti hɔn le. Dodonu nɛ? Odanwiwa wu wɛɛ? Ee wo, vɔ gbɔn xɔse ji wɛ. ²⁸ Mi na lɔ a do tu ta ni tun, Mawu dogbɔn xɔse ji mɛ e mɔ nɔ sɔ gbɛtɔ do kpɔn ɛhwɛjijɔ nɔ le, e mɔ ko nyi dogbɔn osɛn lɔ we odanwiwa ji mɔ hwɛn. ²⁹ Alo Mawu lɔ, Jwifuye kɛɖeɛ we Mawu wɛ e nyi? E hɔn nyi mɛ ke na hɔn nyi Jwifuye can tɔn wɛ? Ɛɛn, e nyi ye can gba tɔn. ³⁰ E le emɔ e bo ny tun Mawu lɔ ɖokpo jan mɛ e mɔ nyi, hune na sɔ me ke gbo adaye a do kpɔn ɛmɛ jijɔye gbɔn xɔse mɛ, a bo sɔ mɛ ke hɔn gbo adaye can do ɛmɛjijɔye gbɔn xɔse mɛ. ³¹ Mia sɔ xɔse do gukun na osɛn lɔ wɛɛ? Ni ka nyi emɔ gbeɖe; Hun mía mɔ ɖo ɛkpɛn osɛn lɔ ji.