¹ Lɔ ke ɖɔ ɛhwɛ na ɛmɛ nɔ, na o mɔ do nyi nuɖe kpokpwe nɔ can, ɛhwɛ sɔ kɛ ti hɔn le na we, ɖo hwekenu na o ɖɔ ɛhwɛ na ɛmɛye nɔ, o do ɛhwɛ na ɖiwe nɔ zɔnɖokpo-zɔnɖokpo, ɖo lɔ kena ɖɔ ɛhwɛ nɔ lɔ, onu ɖokpo ŋumyɔ ke na mɛɖe lɛye o wa nɔ ye, ke wɛ lɔ can o nɔ wa ɖi ye ha. ² Mi nyɔ-ɛ byo Mawu mɔ nɔ ɖɔ ɛhwɛ kpo xojɔxo kpo na mɛ kena nɔ wa nuxinhaye. ³ Vɔ lɔ mɛ ke ɖɔ ɛhwɛ na mɛɖyɔ nɔ, vɔ bo mɔ wa nu nɔ ɖi ye ha, o bu-i nɔ lɔ byo ɛhwɛɖiɖɔ Mawutɔn mɔ naa gbɔn akpa na he wɛ ha? ⁴ Alo, o do, vwɛ dɔmɛ nyinyɔ ke we dɔkun, Mawu jɛ wɛɛ, Mawu we oto ɖɔn na ɛmɛ ke dɛn afɔ kpo hunkuku ke Mawu ɖo kpo, hɔn nyɔ-ɛ byo le e xin ye mɛ, Mawu we dɔmɛ nywɛ mɔ tintrin we nɔ na a do trɔ ji mɛ wɛɛ? ⁵ Vɔ, o tri oto, bo gbɛ oji mɛ titrɔ, e xin lɔ wɛ dɔn na i tete do kple xɔmɛsin ɖaxo ɛ d'ony na ɖiwe nɔ, e bo le onyi na gbekegbe na Mawu na bva ɖe aɖidido etɔn kpo ɛhwɛ ɖidɔjijɔ etn sɔ xlɛ. ⁶ E na tu odan ke ɛmɛ okpo-ɖokpo wa we axɔ ni-i. ⁷ Ɛmɛ ke nɔ do vivɛnu a do wasi onun ywɛ nɔ ye, a bo kan gigo, bubu kpo ɛgbɛ didɔ, e na na ye ɛgbɛ mavɔmavɔ. ⁸ Vɔ mɛ ke nɔ fɔn ogu, a bo cite kpan ŋukɔn xojɔxo lɔ, a bo jo yeɖe do na on u masɔgbe wiwasi ye, Mawu na dɔn oto na ye taŋu kpo xomɛsin ɖaxo kpo. ⁹ Ɛmɛ ɖekpokpwe ke nɔ wa onu nyinylaye, vivɛsise kpo onulilo wɛ na jɛ e ji. Jɛŋukɔn, Jwifuye, e xin we go mɛ ke hɔn nyi Jwifuye. ¹⁰ Vɔ, Mawu na do gigɔ, bubu, a bo na fifa mɛɖe kpokpwe ke nɔ wa onywɛ. Jɛŋukɔ, Jwifu, e xin we godo ɛmɛ ke hɔn nyi Jwifuye. ¹¹ Ɖo, Mawu hɔn nɔ ɖe mɛɖe do vo na mɛɖe. ¹² Ɛmɛ bisese ke hɔn nyɔ osɛn lɔ vɔ bo wa onu nyinylaye, ye na mɔ crɔ ye ko sɔ osɛn lɔ do dɔn oto na ye nɔ. Vɔ ɛmɛ bi ke nyɔ osɛn lɔ, bo wa onu nyinyla ye, ye na sɔ osɛn lɔ a do ɖɔ ɛhwɛ na ye. ¹³ Le xojɔxo mɛ, e hɔn nyi ɛmɛ ke nɔ ɖo oto osɛn lɔ hwɛn nyi ɛmɛ jijɔ le ŋumɛ na Mawu, vɔ mɛ ke nɔ zɔn gbɔn osɛn lɔ ji wɛ Mawu nɔ sɔ do kpɔn ɛmɛ jijɔ ye. ¹⁴ Na e nyi tun ɛmɛ ke hɔn nyi Jwifu hɔn nyɔ osɛn lɔ, vɔ le ninɔmɛ yetɔn mɛ ye bo wasi onu kena osɛn lɔ byɔ nɔ, ye mɛ xinye hɔn nyɔ osɛn lɛye, ye nyi osɛn na yetete nɔ. ¹⁵ Ye mɔ ɖexlɛ nɔ tun odan ke osɛn lɔ byɔ tunye mɔ wasi mɔ le wiwlan le oji yetɔn mɛ. Ayixa yetɔnye can bo nɔ ɖe kunnu nɔ ɖ'emɔha, emɔha ke susu yetɔnye nɔ do ɛhwɛ na ye le ganɖeye mɛ, a bo yi ɛhwɛ na ye le ganɖeye mɛ. ¹⁶ Emɔha wɛ e na va jɔ ɖo le gbekegbe na Mawu na ɖɔ ɛhwɛ gbɔn Klisu Yesu ji na o u hwihwla ke gbɛtɔye nɔ wasi nɔ ye, ɖi ke ɛwɛn ke ko jla nɔ lɔ-ɛ ɖo ha. ¹⁷ Vɔ lɔ o lɔ tun he mɔ nyi Jwifu. O nɔ zyɔn osɛn lɔ, bo nɔ sɔ Mawu do mla. ¹⁸ O nyɔ Mawu we ojlo, osɛn lɔ bo kplan we ke o na sɔ onu nywɛ ɖo, ¹⁹ lɔ ke nɔ kpɔn ɖiwe tu he mɔ nyi kplɔtɔ na ŋuvanɔye, bo kinklɛn na mɛ ke le vuvlu me ye, ²⁰ onukplan-ɛmɛtɔ na oklenɔye kpodo ɛmɛ ke hɔn nyɔ onu ɖeye, ɖo onu nyinyɔ adodwe lɔ kpodo xojɔxo lɔ le osɛn lɔ mɛ na we. ²¹ Lɔ ke nɔ kplan onu wu ɛmɛ gbokpweye, o hɔn nɔ kplan onu wu ɖiwe, o nɔ lɔ na ɛmɛye tun ye mɔ ka fin ɛfin, vɔ o bo nɔ fin ɛfin. ²² O nɔ lɔ tun ye ni mɔ ka do afɔgbe, vɔ o mɔ nɔ do afɔgbe. O gbɛ owan na yehwe sinsɛn, vɔ omɔ nɔ ve fin onu ke le yehwe xɔmɛye. ²³ O nɔ sɔ osɛn lɔ do mla, lɔ ke wɛ nɔ gba osɛn lɔ, e bo nɔ do oɖyu wu mawu we nyikɔ lɔ nɔ. ²⁴ Ɖo, Mawu we oxo mɔ lɔ tun:«Ye nɔ kɔn acɔn do Mawu wu nɔ le ɛmɛ ke hɔn nyi Jwifuye mɛ do miye wu. ²⁵ Na e nyi tuno zɔn do osɛn lɔ ji nɔ, hun ada gbigbo na ɖe ale na we, vɔ na o hɔn zɔn gbɔn osen lɔ ji, hun o gbo ada co bo le ɖi mɛ ke na hɔn gbo ada ha. ²⁶ Na e nyi tun adamagbotɔ va zɔn gbɔn onu kena osɛn lɔ ji nɔ, Mawu hɔn sɔ-ɛ do kpɔn mɛ ke gbo ada nɔ wɔ ke hɛɛ? ²⁷ I wɛ e lɔn gbo ada le gbazamɛ, vɔ bo zɔn do sɛn lɔ ji nɔ, na ɖɔ ɛhwɛ na lɔ ke gbo ada, osɛn lɔ bo le wiwlan na we ganke o ko zɔn do e ji nɔ. ²⁸ Le xojɔxo mɛ, Jwifu tete lɔ , e hɔn nyi onu ke ye kpɔn le ŋuta nɔ hwɛn, adagbigbo tete lɔ ko gbazamɛ we adagbigbo ke mi kpɔn nɔ. ²⁹ Vɔ Jwifu tete lɔ wɛ nyi ɛmɛ ke nyi Jwifu le ayixa mɛ, adagbigbo tete lɔ bo nyi jimɛtɔn, gbigbɔ lɔ wɛ nɔ wasi-i, e ko nyi onu ke ye wlan do osɛn we wema mɛ, hwɛn nɔ wasi-i. Jwifu tete xin lɔ, kanfu etɔn hɔn nɔ sɔ gbɛtɔye kɔn, vɔ Mawu kɔn wɛ e nɔ sɔn.