¹ Nɔvyee mi, nu ke ko jlo le oji tɛye mɛ kpo nu ke we ɛɖɛ ko nɔ xo nɔ wɛ nyi Fwifuye ni mɔɔ kpɔn hwlɛngan. ² Ɖo ko na ɖekunnu na ye tun ye mɔ ɖo kpakpa na Mawu, vɔ e ko nyi do gbɔn onunyinyɔ mɛ hwɛn. ³ Ye nɔ gbɛ ɛhwɛjijɔ Mawutɔn lɔ, bo nɔ tɛnkpɔn gbɔɔn bo nɔ to ɛhwɛjijɔ yeteteye tɔn. Ye hɔn nɔ sɔ yeɖe sɔ hwe le ɛhwɛjijɔ Mawutɔn we agɔ. ⁴ Ɖoo Klisu wɛ nyi mɛ ke kɔn na Mɔyizi we osɛn lɔ o kplɔ mí do yi nɔ, na mɛ ke na ɖi nu ni-i ye bisese a do nyi ɛhwɛjijɔnɔ. ⁵ Mɔyi lɔ tete o wlan do ɛhwɛjijɔ ke le osɛn lɔ mɛ wu tun: «Mɛ ke na na wasi do ɛhwɛjijɔ xin lɔ ji, na nɔ ɛgbɛ gbɔn ɛhwɛjijɔ xin lɔ mɛ.» ⁶ Vɔ ɛhwɛjijɔ ke tɔn sɔn xɔse mɛ bo lɔ tun:« Ka mɔ lɔ le oji tɔwe mɛ tun: "mɛnɛ lɛ na va yi sɛxwe?" (Klisu lɔ xɛn ova dɔn do yi odo nɔ xin.) ⁷ Bo ka mɔ lɔ tun "mɛnɛ lɛ na va yi ogun ɖaxo ma ɖo ojlɛ xin lɔ mɛ?" '(O ba ɖe Klisu tɔn le ɛmɛkukuye mɛ nɔ xɛn xin.)» ⁸ Vɔ ŋunɛ lɛ oxo lɔ lɔ?«Oxo lɔ le axa na we, e le onu tɔwe mɛ bo mɔ le oji tɔwe mɛ.» Ɖemɔ wɛ mi nɔ lɔ xo kpo xɔse ɖo. ⁹ Ɖo na o lɔ-ɛ tɔn sɔn onu tɔwe mɛ tun Klisu mɛ mɔ nyi Xwetɔ lɔ, bo kan do eji sɔn oji tɔwe mɛ tun Mawu mɔ fɔn-ɛ tɛ sɔn ɛmɛ kukuye mɛ, o na kpɔn hwlɛngan. ¹⁰ Ɖo sɔn oji mɛ wɛ gbɛtɔ nɔ kandeji le tun he mɔ nyi ɛhwɛjijɔ nɔ, bo nɔ lɔ kpo onu itetetɔn kpo tun he mɔ kpɔn hwlɛngan. ¹¹ Ɖo e nyi winwlan tun:«Mɛɖekpokpwe ke na kan do eji hun flu nɔ.» ¹² Ovogbigbɔn ti hɔn le mɛ ke nyi Jwifuye kpo mɛ ke nyi glɛkiye mɛ nɔ. Mawu ɖokpo lɔ wɛ nyi xwetɔ na mɛ bi bo nɔ ɖo dɔmɛ faa ɖodan mɛɖekpokpwe ke nɔ yɔ nyikɔ etɔn. ¹³ Ɖo mɛɖekpokpwe ke yɔ nyikɔ Xwetɔ Yesu tɔn na kpɔn hwlɛngan. ¹⁴ Elɔ ke ji na ye hɔn kan do lɔ, naɖe lɛ ye na hɛnɖo a do yɔ nyikɔ etɔn? Naɖe lɛ ye bo na hɛnɖo a do kan do eji, elɔ ke na ye hɔn se mɛɖe lɔ oxo etɔn na ye kpɔn? Naɖe lɛ ye na hɛnɖo a do se i we oxo lɔ na mɛɖe hɔn va lɔ na ye? ¹⁵ Naɖe lɛ ye bo na hɛnɖo a do lɔ oxo etɔn lɔ na ye hɔn ɖo ye ɖodan? Ɖi kena e nyi winwlan ɖo ha tun:«Mɛ ke nɔ jla mawu we oxo lɛye we afɔye mɔ nɔ nyɔ kpɔn ɖo ha.» ¹⁶ Vɔ ye mɛ bisese hɔn se Ɛwɛn nywɛ lɔ. Ɖo Ezayi lɔ tun:«Xwetɔ mɛɛ lɛ kando oxo ke mí jla lɔ ji?» ¹⁷ Ɖo, onu kena ye se mɛ wɛ ye nɔ tɔn tɔn le, onu kena ye se lɔ bo tɔn sɔn Klisu we oxo lɔ mɛ. ¹⁸ Vɔ ko lɔ nɔ tun:«Ye hɔn se wɛɛ?» Ɛɛn, le xojɔxo mɛ taŋu! «Ɖo ogbe yetɔnye do axwa sinsyɔn bo ca le trilili le nyidan lɔ bisese ji wɛ oxo yetɔnye yi gbɔn bo yi ɛgbɛ lɔ we vivɔnu.» ¹⁹ Ke hugan wu emɔ wɛ nyi tun:«Izrayɛli lɔ hɔn nyɔ-ɛ wɛɛ?» Tantɛntɔn, Mɔyizi lɔ lɔ byo:«Ko na wasi wɛ mi na hwan ɛwu do akɔta ke hɔn nyi akɔta xojɔxotɔn. Ko na wasi na akɔta ke hɔn ɖo nunywɛ na va do xomɛsin dɔmɛ na mi.» ²⁰ Ezayi bo triji taŋu bo lɔ tun:«Mɛ kena hɔn ba-a ye wɛ kpɔn-ɔ. Ko bo sɔ ɖye sɔ xlɛ mɛ kena hɔn yɔ ye.» ²¹ Vɔ ke kan Izrayɛli, e lɔ tun:« Ko drɛn alɔ tɛyee do togun ke hɔn nɔ se tonu bo mɔ nɔ fɔngu ji le gbeɖokpo lɔ bi.»