1 Ma kanse o, Mawu gbɛ togun etɔn wɛɛ? Gbeɖe kpɔn. Ɖo blɔ can Izrayɛlitɔ wɛ ko nyi, bo nyi jijimɛvi Ablaxamutɔn, bo tɔn sɔn kunkan Bejamɛtɔn mɛ. 2 Mawu hɔn gbɛ togun etɔn ke e o can san lɔ; Alo mi hɔn nyɔ onu kena mawuxo lɔ lɔ do Eli wu wɛ tun e mɔ jɛ Izrayɛli we vikpeye we ehwɛ na Mawu ɖo wɛɛ? 3 Xwetɔ ye hu oxolɔɖenhyitɔ tɔweye bo gba agba ke ji na ye sanvɔ le na we ye bisese. Bo ɖokpo gee wɛ drɔn vɔ ye bo mɔ ba a nɔ na hu.» 4 Vɔ oxo nɛ lɛ Mawu ɖo ewu ni-i?«Ko sɔ ɛmɛ akpo acowe (7000) ke hɔ̵n jɛ klita na yehwe balu kpɔn sɔ hwla.» 5 Ɖemɔha ke le syɛ e mɔ gbɛ drɔn mɛ kena Mawu can le dɔmɛfaa etɔn mɛ ye viɖe. 6 E hɔn nyi do gbɔn odanwiwa yetɔnye mɛ hwɛn vɔ do gbɔn ɛfɛnu etɔn mɛ wɛ. E dɛn hwɛn ɛfɛnu lɔ hɔn mɔ nyi ɛfɛnu nɔ. 7 Ŋunɛ lɛ jɔ syɛ hin? Onu kena Izrayɛli we tàogun o kan nɔ lɔ, e hɔn kpɔn-ɛ, vɔ mɛ kena Mawu can ye wɛ va kpɔn yi. Ɛmɛ gbokpweye bo tri oto. 8 E sɔgbe ɖi kena e o nyi winwlan ɖo le Mawuxo lɔ mɛ tun lɔ byo:«Mawu na na ye ɖo ayixa ke hɔn nɔ sɔ ɖe le ɖe mɛ, bo na ye ŋukunsin kena hɔn kpewu na kpɔnnu, bo mɔ na ye oto kena hɔn kpewu na se onu gbɔɔn do va jɛ egbe.» 9 Davidi bo lɔ tun: «Na tavo yetɔn ke ji ye nɔ ɖu onu le ye ni ci ɖi oɖɔ ha na yee, a bo mɔ ci ɖi omɔ ha na yee, a bo nyi ɛkpɛn ke wu na ye na gba afɔ do na ye a bo mɔ do nyi otodindɔn ke ye jɛ na n a yee. 10 Na ŋukunsin yetɔnye ni do vuvlu na ye ni ka mɔ do kpɔn nuti. Na ye ni xakpo.» 11 Ko lɔ nɔ syɛ tun: «Ye klɛn afɔ gbɔɔn bo va jɛnyi nɔ wɛɛ?» Gbeɖe kpɔn. Vɔ gbɔn onyijijɛ yetɔn mɛ, mɛ ke hɔn nyi Jwifuye kpɔn hwlɛngan, na mɛ ke hɔn nyi Jwifuye mɔ do bɛ ɛwuhwinhwan. 12 Na onyijijɛ yetɔn nyi dɔkun na ɛgbɛ lɔ bi, bo nyi dɔkun na mɛ ke hɔn nyi Jwifuye, maxɔsetɔye nɛmu-nɛmu lɛ na va nyi ale ke Mawu na va na ye lɛye? 13 Syɛ mɛ ke hɔn nyi Jwifuye wɛ ko lɔxo na nɔ. Sɔn hwekenu gbɔn na ko nyi ɛmɛdindɔn mɛ ke hɔn nyi Jwifuyetɔn, oji nɔ jɔɔ do odan tɛye wu. 14 Tanyɔ e hɛn e na do xomɛsin na nɔvyee. Tanyɔ e bo hɛn e na mɔ hwlɛn mɛɖeye gan le mía mɛ. 15 Na e nyi lɔ byo, ovo kena ye klan ye ɖo wɛ dɔn na ɛgbɛ lɔ bisese mɔ do trɔ va jɛ kpɔkpɔ kpo Mawu, naɖe lɛ e na va nyi ɖo na ye va yi ye, na e hɔn na va nyi tun ye fɔn sɔn mɛkukuye mɛ va ɛgbɛ? 16 E nyi tun ye kan le kpɔnɔ ɖe wu bo sɔ xle Mawu hun kpɔnnɔ kinkan gbokpwe ke drɔn lɔ nyi onu mimɛ. E nyi tun otin we aɖɔ lɛye nyi onu mimɛ, hun i we alwɛ lɛye can nyi onu mimɛ. 17 Vɔ e nyi tun ye gbo otin we alwɛ ɖye, wɛ lɔ ke nyi olivutin hɔntuntɔn, ye bo va sɔ we sɔ ca do fi kena ye gbo otin we alwɛ ɖelɛye le, o bo va ɖo mima le dɔkun olivutin lɔ we aɖɔ mɛ nɔ, 18 ka va mla le otin we alwɛ ke ye gbo lɛye wu. Ɖo na o mla nɔ, nyɔ-ɛ tun he wuye mɔ hwɛn otinɖɔ lɔ mɔ le, vɔ otinɖɔ lɔ mɛ mɔ hɛn hɛ. 19 O ɖo na l̵ɔ tun otinlwɛ diye wɛ ye gbo tɛ na blɔ ko do kpɔn tɛnxo.» 20 Xojɔxo wɛ! Xɔse maɖo yetɔn wɛ dɔn na ye do gboye tɛ, vɔ lɔ, nɔte gliŋu le xɔse tɔwe lɔ mɛ. Ka va nyigo onu ke hugan wu we tɔn ɖe, vɔ nɔ vɔ na Mawu. 21 Ɖo na Mawu hɔn d'emɛ na otinlwɛ ke jɔ kpo otin lɔ kpo ye, hun e hɔn va kpɔn d'emɛ na i can gba nɔ. 22 Kpɔn kena Mawu nɔ nyɔ dɔmɛ ɖo, a bo mɔ kpɔn kena e nɔ nyla ɛhun ɖo. Mawu nylahun kpanŋukɔn Jwifu ke jɛnyi ye. Vɔ bo nyɔ dɔmɛ ɖodan lɔ, o ɖo na nɔ dɔmɛ nyinyɔ xin lɔ mɛ. Edinhwɛn ye na ɖe i can gba tɛ. 23 Na ye va lɛkɔ le maxɔse yetɔn mɛ, Mawu na mɔ sɔ ye sɔ ca do ofi kena ye nɔ nɔ san lɔ. Ɖo Mawu kpewu bo na mɔ do ca ye. 24 Ɖo na e nyi tun olivutin hɔntuntɔn wu wɛ ye gbo we le, bo gbɔnvo na ke jɔ kpo-e yee, ye bo sɔ we sɔ ca do olivutin ganji lɔ wu, naɖe lɛ e hɔn na nyɔ ganji tun Mawu a mɔ sɔ Jwifuye ke nyi otinlwɛ ke jɔ kpo olivutin ganji lɔ, a mɔ mɔ sɔ ca do olivutin lɔ wu ɖo? 25 Ɖo nɔvyee mi, ko hɔn jlo tun na mia nɔ manywɛ mɛ le onumakpɔndona ke lɔ mɛ, na mi ko na do va sɔ miaɖe do kpɔn onunywɛwatɔye nɔ. Onumakpɔndona ke lɔ wɛ nyi lɔ byo Izrayɛli we togun lɔ we akpaɖeye na tri oto nɔ gbɔɔn do jɛ hwekenu na mɛ ke hɔn nyi jwifuye bisese na kpɔn hwlɛngan do. 26 Ɖemɔha wɛ Izrayɛli we togun lɔ bisese na kpɔn hwlɛngan ɖo, ɖi kena e o nyi winwlan ɖo san ha: «Okantun na ɛmɛtɔ lɔ na sɔn Syɔn. E na tunkan na Jakɔbu sɔn sisi ma ɖo na Mawu mɛ. 27 E ke lɔ wɛ na va nyi okancica ke ko na va wasi kpoye le gankemɛ na ko na va sɔ ɛhwɛ yetɔnye sɔ kɛ ye.» 28 Le akpaɖexwe, ye nyi kɛntɔ na ɛwɛn nywɛ lɔ do miawu; vɔ le akpaɖexwe, do gbɔn cincan Mawutɔn mɛ, ye nyi wanwinnanɔ dogbɔn yetɔye wu. 29 Ɖo onunina kpo oyɔ Mawutɔ lɛye hɔn nɔ ɖɔli kpɔn gbeɖe. 30 Ɖo mi o vɛ toli na Mawu san, vɔ syɛ ye va kpɔn dɔŋuɖunu na mi do tolivivɛ ye lɛyetɔn wu. 31 Ɖemɔke wɛ Jwifu xin lɛye nyi tolivɛtɔye ɖo. Hun gbeta ke va tɔn lɔ wɛ nyi tun lɔ byo, dogbɔn dɔŋuɖunu ke ye kpɔn na mi mɛ, ye va kpɔn dɔŋuɖunu na ye lɛye can. 32 Ɖo Mawu sɔ gbɛtɔye bisese do wasi mɛ ka le gankpamɛ dogbɔ tolivyɔ yetɔn wu, na ni a do va kpɔn dɔŋuɖunu na mɛ bisese. 33 Ô Mawu we dɔkun glo ke! Onunyinyɔ etɔn kpodo i we onumɛkpɔnnujɛ tito ke! Mɛɛ lɛ na kpɔnnu jɛ i we ɛhwɛɖiɖɔ wu, mɛ ti ko kpewu na se tito etɔnye we gɔnmɛ. 34 Ɖo mɛ nɛ lɛ nyɔ linlin Xwetɔ lɔ tɔn? Alo mɛnɛ lɛ nyi oga bɔd'ewutɔ etɔn ke nɔ do okplangbe ni-i? 35 Alo mɛnɛ lɛ o na onuɖe wu Mawu na Mawu a do va tu axɔ etɔn ni-i? 36 Ɖo elɔ kɔn wɛ onu bisese sɔn, elɔ ji wɛ onu bisese gbɔn do le ɛgbɛ lɔ mɛ, onywɛye bisese bo nyi etɔn. Mawutɔn wɛ nyi gigo tɛgbɛ kaka do yi mavɔmavɔ. Ami!