¹ Ko byɔ mi nɔ nɔvyee, tun do gbɔn dɔŋuɖunu kpɔn na ɛmɛ Mawutɔn mɛ tun, mi mɔɔ sɔ miaɖeye do wasi avɔsinsan ke gbɛgbɛ, ke mɛ, ke Mawu na yi, ke nyi sinsɛn adodwe kena mi na wasi ni-i. ² Mi ka wa onu ɖi kena gbɛtɔ ke le ɛgbɛ lɔ mɛ egbeye o wa onu ɖo nɔ ha, vɔ nunywɛ zinzin miatɔn ke gbɔn va yɔyɔ, ni na mia ɖɔli, e xin mi mɔ do ɖo josi wu Mawu we ojlo, i wɛ nyi onu kena nyɔhwɛn, onu ke nɔ jɛŋu ni-i, bo mɔ sɔgbe ofɛn ti ko le e wu. ³ Dàogbɔn ɛfɛnu Mawutɔn ke e na-a mɛ, ko lɔ na mi nɔ lɔ byo ɖokpo-ɖokpo miatɔnye mi ka mɔ kpɔn le susu miatɔnmɛ tun mi mɔ hugan wu onu kena mi nyi. Vɔ mi nɔ bu susu kpo zinzin kpo ɖi kena Mawu na xɔse wu mɛɖokpo-ɖokpo ɖo ha. ⁴ Ɖo alɔklan susu wɛ le gbaza miatɔn wu, vɔ bisese ko nɔ wa odan ɖokpo lɛye. ⁵ Ɖemɔha ke wɛ mí́ye ke nyi ɛmɛ susu mí trɔ zun alɔklan gbaza ɖokpo gee tɔn le Klisu mɛ. ⁶ Onunina vwevwe wɛ Mawu na mí dogbɔ ɛfɛnu etɔn mɛ. E nyi tun Mawu na oxolɔɖenyi we onunina wu mɛɖe, ni bo zan-ɛ dogbɔn xɔse ke e ɖo lɔ mɛ. ⁷ Na mɛɖe yi odansɔvi we nunina, ni bo sɔ odan ma ɛmɛ. Na mɛɖe yi okplan na ɛmɛ we onunina, ni bo kplan onu wu ɛmɛ. ⁸ Na mɛɖe yi hɔnhlɔn do lanmɛ na ɛmɛ we onunina, ni bo nɔ do hɔnhlɔn lanmɛ na ɛmɛ. Na mɛɖe yi onuna ɛmɛ we onunina, ni bo nɔ wa onywɛ ɖodan ɛmɛye. Na mɛɖe yi onunina ɛmɛkpikplɔtɔn, ni bo nɔ kpeŋu d'ewu ganji. Na mɛɖe yi onunina dɔŋuɖunu kpinkpɔn na ɛmɛ tɔn, ni bo nɔ wasi-i kpo jijwɛ kpo. ⁹ Na wanyiyi ke mi ɖo ni ka nyi yɛmɛnuwiwa tɔn. Mi gbɛwan na onunyinyla, a bo bla miaɖe do onu nywɛ wu. ¹⁰ Mi yi wan na miaɖe titeŋugbetɔn ɖi kena nɔvi-nɔviye nɔ yiwan na yeɖe ɖo ha, mɛɖokpo-ɖokpo mɔ ɖo sisi ke jɛ na nɔvyɔ. ¹¹ Mi nɔ bizo do odanwiwa wu, mi ko o nɔ wa ɖiɖɔ, mi nɔ sɔ ke kan Gbigbɔ lɔ, mi nɔ wadan na Mawu kpo kpakpa kpo, a bo nɔ xodwe. ¹² Mi nɔ kpɔn jijwɛ do omɔkpinkpɔn miatɔn wu. Mi nɔ ɖo hunkuku le tintɛnkpɔn miatɔnye mɛ; a bo nɔ do vivɛnu le ɛɖɛxixo mɛ. ¹³ Mi gɔ alɔ na xɔsetɔ kena le ohyan mɛ yee. Mi mɔ nyɔ ke ye nɔ yi jonɔ ganji ɖo. ¹⁴ Mi nɔ xo fifa we ɛɖɛ na mɛ ke nɔ ɖefun na mi yee; mi bo kaa do onu wu yee. ¹⁵ Mi nɔ kpɔn jijwɛ kpo mɛ ke o kpɔn jijwɛ nɔ yee. Mi vi avi kpo mɛ kena vi avi nɔ yee. ¹⁶ Mi mɔ ɖo susu ɖokpo lɛye ɖodan miaɖeye. Mi ka mɔ nɔ nyigo le susu miatɔnye mɛ, vɔ mi nɔ yi wan na mɛ ke ɖo nu bisese yee. Mi bo ka mɔ nɔ sɔ miaɖeye do kpɔn onunyɔtɔyee. ¹⁷ Mi ka sɔ onunyinyla a do tu nyinyla we axɔ na mɛɖe. Mi nɔ wa onunywɛ na mɛ bi. ¹⁸ Na e nyi tun miye wu jan wɛ e sɔn, hun mi nɔ fifamɛ kpodo mɛ bisese. ¹⁹ Mi ka mɔ vi hlɔn miye tetetɔn, vɔ mi jo xomɛsin Mawutɔn do na ni vi hlɔn do ota miatɔn mɛ. Ɖo e nyi winwlan tun: «Bo wɛ nɔ vi hlɔn, bo wɛ nɔ tu onu ke mɛɖe wa we axɔ» Xwetɔ Mawu wɛ lɔ ɛmɔ. ²⁰ Vɔ na xovɛ ci kɛntɔ tɔwe na nuɖuɖu wu-i. Na kɔmɛci-i, na ɛsinwu-i ni nu. Ɖo na mi wasi ɖemɔha nɔ, zokan zozo wɛ mi kple do ota ni-i nɔ. ²¹ Onunyinyla wiwa ni kaa ɖu le miaji, vɔ mi sɔ onunywɛ wiwa a do ɖu le onunyinyla wiwa ji.